آیت ۳۸:  اَمْ یَقُوْلُوْنَ افْتَرٰہُ:  «کیا یہ کہتے ہیں کہ اس کو پیغمبر نے خود گھڑ لیا ہے؟»

            یہ لوگ اس قرآن کے بارے میں کہتے ہیں کہ یہ محمد کی اپنی تصنیف ہے۔ انہوںنے خود یہ کلام موزوں کر لیا ہے۔

             قُلْ فَاْتُوْا بِسُوْرَۃٍ مِّثْلِہ وَادْعُوْا مَنِ اسْتَطَعْتُمْ مِّنْ دُوْنِ اللّٰہِ اِنْ کُنْتُمْ صٰدِقِیْنَ:  «آپ (ان سے) کہیے کہ لے آؤ تم بھی ایک سورت اس جیسی اور(اس کے لیے) بلا لو جس کو بلا سکتے ہو اللہ کے سوا، اگر تم سچے ہو۔»

            یہ چیلنج سورۃ البقرۃ میں بھی ہے جو کہ مدنی ہے، جبکہ مکی سورتوں میں تو اسے متعدد بار دہرایا گیا ہے۔ سوره ہود میں اس جیسی دس سورتیں بنا کر لے آنے کا چیلنج دیا گیا ہے اور یہاں اس سورت میں یہ چیلنج گویا برسبیل ِتنزل آخری درجہ میں پیش کیا گیا ہے کہ چلو اس جیسی ایک سورت ہی بنا کر دکھا دو۔