النّور

یہ ایک سورت ہے جو ہم نے نازل کی ہے، اور جس (کے اَحکام) کو ہم نے فرض کیا ہے، اور اُس میں کھلی کھلی آیتیں نازل کی ہیں ، تاکہ تم نصیحت حاصل کرو 

زنا کرنے والی عورت اور زنا کرنے والے مرددونوں کو سو سو کوڑے لگاؤ، اور اگر تم اﷲ اور یومِ آخرت پر ایمان رکھتے ہو، تو اﷲ کے دین کے معاملے میں اُن پر ترس کھانے کا کوئی جذبہ تم پر غالب نہ آئے۔ اور یہ بھی چاہئے کہ مؤمنوں کا ایک مجمع اُن کی سزا کو کھلی آنکھوں دیکھے

زانی مرد نکاح کرتا ہے تو زنا کار یا مشرک عورت ہی سے نکاح کرتا ہے، اور زنا کار عورت سے نکاح کرتا ہے تو وہی مرد جو خود زانی ہو، یا مشرک ہو، اور یہ بات مؤمنوں کیلئے حرام کر دی گئی ہے

اور جو لوگ پاک دامن عورتوں پر تہمت لگائیں ، پھر چار گواہ لے کر نہ آئیں ، تو اُن کو اَسّی کوڑے لگاؤ، اور اُن کی گواہی کبھی قبول نہ کرو، اور وہ خود فاسق ہیں

ہاں جو لوگ اس کے بعد توبہ کر لیں ، اور (اپنی) اصلاح کر لیں ، تو اﷲ بہت بخشنے والا، بڑا رحم کرنے والا ہے

اورجو لوگ اپنی بیویوں پر تہمت لگائیں ، اور خود اپنے سوا اُن کے پاس کوئی اور گواہ نہ ہوں تو ایسے کسی شخص کو جو گواہی دینی ہوگی وہ یہ ہے کہ وہ چار مرتبہ اﷲ کی قسم کھاکر یہ بیان دے کہ وہ (بیوی پر لگائے ہوئے الزام میں ) یقینا سچا ہے

اور پانچویں مرتبہ یہ کہے کہ : ’’اگر میں (اپنے الزام میں ) جھوٹا ہوں تو مجھ پر اﷲ کی لعنت ہو۔‘‘

اور عورت سے (زنا کی) سزا دور کرنے کا راستہ یہ ہے کہ وہ چار مرتبہ اﷲ کی قسم کھا کر یہ گواہی دے کہ اُس کا شوہر (اس الزام میں) جھوٹا ہے

اور پانچویں مرتبہ یہ کہے کہ : ’’ اگر وہ سچا ہوتو مجھ پر اﷲ کا غضب نازل ہو۔‘‘

اور اگر تم پر اﷲ کا فضل نہ ہوتا اور یہ بات نہ ہوتی کہ اﷲ کثرت سے توبہ قبول کرنے والا، حکمت والا ہے (تو خود سوچ لو کہ تمہارا کیا بنتا؟)