سبإ

تمام تعریف اُس اﷲ کی ہے جس کی صفت یہ ہے کہ آسمانوں اور زمین میں جو کچھ ہے، سب اُسی کا ہے، اور آخرت میں بھی تعریف اُسی کی ہے، اور وہی ہے جو حکمت کا مالک ہے، مکمل طور پر باخبر !

وہ اُن چیزوں کو بھی جانتا ہے جو زمین کے اندر جاتی ہیں ، اوراُن کو بھی جو اُس سے باہر نکلتی ہیں ، اُن کو بھی جو آسمان سے اُترتی ہیں ، اور اُن کو بھی جو اُس میں چڑھتی ہیں ، اور وہی ہے جو بڑا مہربان ہے، بہت بخشنے والا ہے

اور جن لوگوں نے کفر اپنا لیا ہے، وہ کہتے ہیں کہ: ’’ ہم پر قیامت نہیں آئے گی‘‘ کہہ دو : ’’ کیوں نہیں آئے گی؟ میرے عالم الغیب پروردگار کی قسم ! وہ تم پر ضرور آکر رہے گی۔ کوئی ذرّہ برابر چیز اُس کی نظر سے دُور نہیں ہوتی، نہ آسمانوں میں ، نہ زمین میں ، اور نہ اُس سے چھوٹی کوئی چیز ایسی ہے نہ بڑی جو ایک کھلی کتاب (یعنی لوحِ محفوظ) میں درج نہ ہو

(اور قیامت اس لئے آئے گی) تاکہ جو لوگ ایمان لائے ہیں ، اور اُنہوں نے نیک عمل کئے ہیں ، اﷲ اُن کو انعام دے۔ ایسے لوگوں کیلئے مغفرت ہے، اور باعزت رزق

اور جن لوگوں نے ہماری آیتوں کے بارے میں یہ کوشش کی ہے کہ اُنہیں ناکام بنائیں ، اُن کیلئے بلا کا دردناک عذاب ہے

اور (اے پیغمبر !) جن لوگوں کو علم عطا ہوا ہے، وہ خوب سمجھتے ہیں کہ تم پر تمہارے رَبّ کی طرف سے جو کچھ نازل کیا گیا ہے، وہ حق ہے، اور اُس (اﷲ) کا راستہ دکھاتا ہے جو اِقتدار کا مالک بھی ہے، ہر تعریف کا مستحق بھی

اور یہ کافر لوگ (ایک دوسرے سے) کہنے لگے : ’’ کیا ہم تمہیں ایک ایسے شخص کا پتہ بتائیں جو تمہیں یہ خبر دیتا ہے کہ جب تم (مر کر) بالکل ریزہ ریزہ ہوچکو گے، اُس وقت تم ایک نئے جنم میں آؤ گے؟

پتہ نہیں اس شخص نے اﷲ پر جھوٹ باندھا ہے، یا اُسے کسی طرح کا جنون لاحق ہے؟‘‘۔ نہیں ! بلکہ حقیقت یہ ہے کہ جو لوگ آخرت پر ایمان نہیں رکھتے وہ خود عذاب میں اور پرلے درجے کی گمراہی میں مبتلا ہیں

بھلا کیا ان لوگوں نے اُس آسمان و زمین کو نہیں دیکھا جو ان کے آگے بھی موجود ہیں اور ان کے پیچھے بھی۔ اگر ہم چاہیں تو ان کو زمین میں دھنسادیں ، یا آسمان کے کچھ ٹکڑے ان پر گرادیں ۔ حقیقت یہ ہے کہ اس میں ہر اُس بندے کیلئے ایک نشانی ہے جو اﷲ کی طرف رُجوع کرنے والا ہے

اور واقعہ یہ ہے کہ ہم نے داود کو خاص اپنے پاس سے فضل عطا کیا تھا۔ ’’ اے پہاڑو ! تم بھی تسبیح میں ان کے ساتھ ہم آواز بن جاؤ، اور اے پرندو ! تم بھی۔‘‘ اور ہم نے اُن کیلئے لوہے کو نرم کر دیا تھا