آیت ۸۵:   فَلَمْ یَکُ یَنْفَعُہُمْ اِیْمَانُہُمْ لَمَّا رَاَوْا بَاْسَنَا: ’’تو پھر ان کا ایمان لانا ان کے لیے ہر گز مفید نہیں ہوا جبکہ انہوں نے ہمارا عذاب دیکھ لیا۔‘‘

        عذاب کے واضح آثار سامنے آ جانے کے بعد توبہ کا دروازہ بند ہو جاتا ہے اور ایسے وقت کا ایمان اللہ کے ہاں قابل قبول نہیں۔ یہ اللہ تعالیٰ کا اٹل قانون ہے اور اس قانون سے استثناء نوعِ انسانی کی پوری تاریخ میں صرف ایک ہی قوم کو ملا اوروہ تھی حضرت یونس کی قوم۔ اس استثناء کا ذکر ہم سورۂ یونس کی آیت: ۹۸ میں پڑھ چکے ہیں۔ دراصل حضرت یونس اللہ تعالیٰ کی طرف سے ہجرت کی واضح اجازت آنے سے پہلے ہی اپنی قوم کو چھوڑ کر چلے گئے تھے۔ چنانچہ نبی ؑ کے کھاتے میں جو debit آیا وہ قوم کے لیے  credit  بن گیا۔ جدید اکائونٹنگ کے ماہرین خوب جانتے ہیں کہ ایک طرف کا debit دوسری طرف کا credit کیسے بن جاتا ہے۔ چنانچہ حضرت یونس کی قوم نے عذاب کے واضح آثار دیکھ لینے کے بعد توبہ کر لی اور ان کی یہ توبہ اللہ تعالیٰ نے قبول فرمالی۔

         سُنَّتَ اللّٰہِ الَّتِیْ قَدْ خَلَتْ فِیْ عِبَادِہٖ وَخَسِرَ ہُنَالِکَ الْکٰفِرُوْنَ : ’’یہ اللہ کا وہ دستور ہے جو اُس کے بندوں میں جاری رہا ہے‘ اور اُس وقت کافرلوگ خسارے میں رہے۔‘‘

        واقعہ یہ ہے کہ اصل خسارہ تو کافروں ہی کے لیے ہے۔