آیت 28:  وَاِذَا فَعَلُوْا فَاحِشَۃً قَالُــوْا وَجَدْنَا عَلَیْہَآ اٰبَـآءَنَا وَاللّٰہُ اَمَرَنَا بِہَا:  ’’اور جب یہ لوگ کوئی بے حیائی کا کام کرتے ہیں توکہتے ہیں کہ ہم نے پایا ہے یہی کچھ کرتے ہوئے اپنے آباء و اَجداد کو‘ اور اللہ نے ہمیں اس کا حکم دیا ہے۔‘‘

            یہ لوگ جب ننگے ہو کر خانہ کعبہ کا طواف کرتے تو اس شرمناک فعل کا جواز پیش کرتے ہوئے کہتے کہ ہم نے اپنے آباء و اَجداد کو ایسے ہی کرتے دیکھا ہے اور یقینا اللہ ہی نے اس کا حکم دیا ہو گا۔ یہ گویا ان کے نزدیک ایک ٹھوس، قرائنی شہادت (circumstantial evidence) تھی کہ جب ایک رِیت اور رسم چلی آ رہی ہے تو یقینا یہ سب کچھ اللہ کی مرضی اور اس کے حکم کے مطابق ہی ہو رہا ہو گا۔

            قُلْ اِنَّ اللّٰہَ لاَ یَاْمُرُ بِالْفَحْشَآءِ اَتَقُوْلُوْنَ عَلَی اللّٰہِ مَا لاَ تَعْلَمُوْنَ:  ’’(اے نبی! ان سے) کہہ دیجیے کہ اللہ تعالیٰ بے حیائی کا حکم نہیں دیتا، تو کیا تم اللہ کی طرف منسوب کر رہے ہو وہ کچھ جس کا تمہیں کوئی علم نہیں۔‘‘