آیت 16: اَمْ حَسِبْتُمْ اَنْ تُتْرَکُوْا وَلَمَّا یَعْلَمِ اللّٰہُ الَّذِیْنَ جٰہَدُوْا مِنْکُمْ: ‘‘کیا تم نے گمان کر لیا ہے کہ تم یوں ہی چھوڑ دیے جاؤ گے‘ حالانکہ ابھی تو اللہ نے یہ دیکھا ہی نہیں کہ تم میں سے کون وہ لوگ ہیں جو جہاد کرنے والے ہیں‘‘

            دوسری قوموں کے خلاف برسر پیکار ہونا اور بات ہے‘ تمہیں اب اپنی قوم کے خلاف جہاد کرنے کے لیے جانا ہے۔ گویا اس حکم کے اندر نسبتاً سخت امتحان ہے۔ چنانچہ اللہ تمہارا یہ امتحان بھی لینا چاہتا ہے۔

            وَلَمْ یَتَّخِذُوْا مِنْ دُوْنِ اللّٰہِ وَلاَ رَسُوْلِہ وَلاَ الْمُؤْمِنِیْنَ وَلِیْجَۃً: ‘‘اور جو نہیں رکھتے اللہ‘ اس کے رسول اور اہل ایمان کے علاوہ کسی کے ساتھ قلبی دوستی کا کوئی تعلق۔‘‘

            یہ دُنیوی رشتوں کے خوشنما بندھن جب تک ایمان کی تلوار سے کٹیں گے نہیں‘ اس وقت تک اللہ اور دین کے ساتھ تمہارا خلوص کیسے ثابت ہو گا!

            وَاللّٰہُ خَبِیْرٌ بِمَا تَعْمَلُوْنَ: ‘‘اور جو کچھ تم کر رہے ہو اللہ اس سے باخبر ہے۔‘‘