يونس

اور اگر اﷲ (ان کافر) لوگوں کو برائی (یعنی عذاب) کا نشانہ بنانے میں بھی اتنی ہی جلدی کرتا، جتنی جلدی وہ اچھائیاں مانگنے میں مچاتے ہیں تو اُن کی مہلت تمام کردی گئی ہوتی۔ (لیکن ایسی جلد بازی ہماری حکمت کے خلاف ہے) لہٰذا جو لوگ ہم سے (آخرت میں ) ملنے کی توقع نہیں رکھتے، ہم اُنہیں ان کے حال پر چھوڑ دیتے ہیں کہ وہ اپنی سر کشی میں بھٹکتے پھریں ۔

اور جب انسان کو کوئی تکلیف پہنچتی ہے تو وہ لیٹے بیٹھے اور کھڑے ہوئے (ہر حالت میں ) ہمیں پکارتا ہے۔ پھر جب ہم اُس کی تکلیف دور کر دیتے ہیں ، تو اس طرح چل کھڑا ہوتا ہے جیسے کبھی اپنے آپ کو پہنچنے والی کسی تکلیف میں ہمیں پکارا ہی نہ تھا۔ جو لوگ حد سے گذر جاتے ہیں ، اُنہیں اپنے کرتوت اسی طرح خوشنما معلوم ہوتے ہیں

اور ہم نے تم سے پہلے (کئی) قوموں کو اُس موقع پرہلاک کیا جب اُنہوں نے ظلم کا ارتکاب کیا تھا، اور اُن کے پیغمبر اُن کے پاس روشن دلائل لے کر آئے تھے، اور وہ ایسے نہ تھے کہ ایمان لاتے۔ ایسے مجرم لوگوں کو ہم ایسا ہی بدلہ دیتے ہیں

پھر ہم نے اُن کے بعد زمین میں تم کو جانشین بنایا ہے تاکہ یہ دیکھیں کہ تم کیسے عمل کرتے ہو ؟

اور وہ لوگ جو (آخرت میں ) ہم سے آملنے کی توقع نہیں رکھتے جب ان کے سامنے ہماری آیتیں پڑھی جاتی ہیں ، جبکہ وہ بالکل واضح ہوتی ہیں ، تو وہ یہ کہتے ہیں کہ : ’’ یہ نہیں ، کوئی اور قرآن لے کر آؤ، یا اس میں تبدیلی کرو۔ ‘‘ (اے پیغمبر !) ان سے کہہ دو کہ : ’’ مجھے یہ حق نہیں پہنچتا کہ میں اس میں اپنی طرف سے کوئی تبدیلی کرو ں ۔ میں تو کسی اور چیز کی نہیں ، صرف اُس وحی کی پیروی کرتا ہوں جو مجھ پر نازل کی جاتی ہے۔ اگر کبھی میں اپنے رَبّ کی نافرمانی کر بیٹھوں تو مجھے ایک زبردست دن کے عذاب کا خوف ہے۔ ـ‘‘

کہہ دو کہ : ’’ اگر اﷲ چاہتا تو میں اس قرآن کو تمہارے سامنے نہ پڑھتا، اور نہ اﷲ تمہیں اس سے واقف کراتا۔ آخر اس سے پہلے بھی تو میں ایک عمر تمہارے درمیان بسر کر چکا ہوں ۔ کیا پھر بھی تم عقل سے کام نہیں لیتے ؟

پھر اُس شخص سے بڑا ظالم کون ہوگا جو اﷲ پر جھوٹ بہتان باندھے، یا اُس کی آیتوں کو جھٹلائے ؟ یقین رکھو کہ مجرم لوگ فلاح نہیں پاتے۔ ‘‘

اور یہ لوگ اﷲ کو چھوڑ کر اُن (من گھڑت خداؤں ) کی عبادت کرتے ہیں جو نہ ان کو کوئی نقصان پہنچا سکتے ہیں ، نہ ان کو کوئی فائدہ دے سکتے ہیں ، اور کہتے ہیں کہ یہ اﷲ کے پاس ہماری سفارش کرنے والے ہیں ۔ (اے پیغمبر ! ان سے) کہو کہ : ’’ کیا تم اﷲ کو اُس چیز کی خبر دے رہے ہو جس کا کوئی وجود اﷲ کے علم میں نہیں ہے، نہ آسمانوں میں نہ زمین میں ؟ ‘‘ (حقیقت یہ ہے کہ) اﷲ ان کی مشرکانہ باتوں سے بالکل پاک اور کہیں بالا و بر تر ہے

اور (شروع میں ) تمام انسان کسی اور دین کے نہیں ، صرف ایک ہی دین کے قائل تھے۔ پھر بعد میں وہ آپس میں اختلاف کر کے الگ الگ ہوئے۔ اور اگر تمہارے پروردگار کی طرف سے ایک بات پہلے سے طے نہ ہو چکی ہوتی تو جس معاملے میں یہ لوگ اختلاف کر رہے ہیں ، اُس کا فیصلہ (دنیا ہی میں ) کر دیا جاتا

اور یہ لوگ کہتے ہیں کہ : ’’ اِس نبی پر اُس کے رَبّ کی طرف سے کوئی نشانی کیوں نازل نہیں کی گئی ؟ ‘‘ تو (اے پیغمبر ! تم جواب میں ) کہہ دو کہ : ’’ غیب کی باتیں تو صرف اﷲ کے اختیار میں ہیں ۔ لہٰذا تم انتظار کرو۔ میں بھی تمہارے ساتھ انتظار کرتا ہوں ۔ ‘‘