الإسراء

اور اِنسان برائی اس طرح مانگتا ہے جیسے اُسے بھلائی مانگنی چاہیئے، اور اِنسان بڑا جلد باز واقع ہوا ہے

اور ہم نے رات اور دن کو دو نشانیوں کے طور پر پیدا کیا ہے۔ پھر رات کی نشانی کو تو اندھیری بنا دیا، اور دن کی نشانی کو روشن کر دیا، تاکہ تم اپنے رَبّ کا فضل تلاش کرسکو، اور تاکہ تمہیں سالوں کی گنتی اور (مہینوں کا) حساب معلوم ہو سکے۔ اور ہم نے ہر چیز کو الگ الگ واضح کر دیا ہے

اور ہر شخص (کے عمل) کا انجام ہم نے اُس کے اپنے گلے سے چمٹا دیا ہے، اور قیامت کے دن ہم (اُس کا) اعمال نامہ ایک تحریر کی شکل میں نکال کر اُس کے سامنے کریں گے جسے وہ کھلا ہوا دیکھے گا

(کہا جائے گا کہ) لو پڑھ لو اپنا اعمال نامہ ! آج تم خود اپنا حساب لینے کیلئے کافی ہو

جو شخص سیدھی راہ پر چلتا ہے، تو وہ خود اپنے فائدے کیلئے چلتا ہے، اور جو گمراہی کا راستہ اختیار کرتا ہے، وہ اپنے ہی نقصان کیلئے اختیار کرتا ہے۔ اور کوئی بوجھ اُٹھانے والا کسی دوسرے کا بوجھ نہیں اُٹھائے گا۔ اور ہم کبھی کسی کو اُس وقت تک سزا نہیں دیتے جب تک کوئی پیغمبر (اُس کے پاس) نہ بھیج دیں

اور جب ہم کسی بستی کو ہلاک کرنے کا ارادہ کرتے ہیں تو اُس کے خوش حال لوگوں کو (ایمان اور اطاعت کا) حکم دیتے ہیں ، پھر وہ وہاں نافرمانیاں کرتے ہیں ، تو ان پر بات پوری ہو جاتی ہے، چنانچہ ہم اُنہیں تباہ وبرباد کر ڈالتے ہیں

اور کتنی ہی نسلیں ہیں جو ہم نے نوح کے بعد ہلاک کیں ! اور تمہارا رَبّ اپنے بندوں کے گناہوں سے پوری طرح باخبر ہے، سب کچھ دیکھ رہا ہے

جو شخص دنیا کے فوری فائدے ہی چاہتا ہے تو ہم جس کیلئے چاہتے ہیں ، جتنا چاہتے ہیں ، اُسے یہیں پر جلدی دے دیتے ہیں ، پھر اُس کیلئے ہم نے جہنم رکھ چھوڑی ہے جس میں وہ ذلیل وخوار ہو کر داخل ہوگا

اور جو شخص آخرت (کا فائدہ) چاہے، اور اُس کیلئے ویسی ہی کوشش کرے جیسی اُس کیلئے کرنی چاہیئے، جبکہ وہ مومن بھی ہو، تو ایسے لوگوں کی کوشش کی پوری قدردانی کی جائے گی

(اے پیغمبر!) جہاں تک (دنیا میں ) تمہارے رَبّ کی عطا کا تعلق ہے، ہم اِن کو بھی اُس سے نوازتے ہیں ، اور اُن کو بھی۔ اور (دنیا میں ) تمہارے رَبّ کی عطا کسی کیلئے بند نہیں ہے