النّور

کیا تم نے نہیں دیکھا کہ آسمان اور زمین میں جو بھی ہیں ، اﷲ ہی کی تسبیح کرتے ہیں ، اور وہ پرندے بھی جو پر پھیلائے ہوئے اُڑتے ہیں ۔ ہر ایک کو اپنی نماز اور اپنی تسبیح کا طریقہ معلوم ہے۔ اور اﷲ ان کے سارے کاموں سے پوری طرح باخبر ہے

اور آسمانوں اور زمین کی بادشاہی اﷲ ہی کیلئے ہے، اور اﷲ ہی کی طرف (سب کو) لوٹ کر جانا ہے

کیا تم نے دیکھا نہیں کہ اﷲ بادلوں کو ہنکاتا ہے، پھر ان کو ایک دوسرے سے جوڑ دیتا ہے، پھر انہیں تہہ بر تہہ گھٹا میں تبدیل کر دیتا ہے، پھر تم دیکھتے ہو کہ بارش اُس کے درمیان سے برس رہی ہے۔ اور آسمان میں (بادلوں کی شکل میں ) جو پہاڑ کے پہاڑ ہوتے ہیں ، اﷲ ان سے اولے برساتا ہے، پھر جس کیلئے چاہتاہے، ان کو مصیبت بنا دیتا ہے، اور جس سے چاہتا ہے، اُن کا رُخ پھیر دیتا ہے۔ ایسا لگتا ہے کہ اُس کی بجلی کی چمک آنکھوں کی بینائی اُچک لے جائے گی

وہی اﷲ رات دن کا اُلٹ پھیر کرتا ہے۔ یقینا ان سب باتوں میں اُن لوگوں کیلئے نصیحت کا سامان ہے جن کے پاس دیکھنے والی آنکھیں ہیں

اور اﷲ نے زمین پر چلنے والے جو جاندار کو پانی سے پیدا کیا ہے۔ پھر ان میں سے کچھ وہ ہیں جو اپنے پیٹ کے بل چلتے ہیں ، کچھ وہ ہیں جو وہ پاؤں پر چلتے ہیں ، اور کچھ وہ ہیں جو چار (پاؤں ) پر چلتے ہیں ۔اﷲ جو چاہتا ہے پیدا کرتا ہے۔ یقینا اﷲ ہر بات پر قدرت رکھتا ہے

بیشک ہم نے وہ آیتیں نازل کی ہیں جو حقیقت کو کھول کھول کر بیان کرنے والی ہیں ، اور اﷲ جس کو چاہتا ہے، سیدھے راستے تک پہنچا دیتا ہے

اور یہ (منافق) لوگ کہتے ہیں کہ ہم اﷲ پر اور رسول پر ایمان لے آئے ہیں ، پھر ان میں سے ایک گروہ اس کے بعد بھی منہ موڑ لیتا ہے۔ یہ لوگ (حقیقت میں ) مومن نہیں ہیں

اور جب انہیں اﷲ اور اُس کے رسول کی طرف بلایا جاتا ہے تاکہ رسول ان کے درمیان فیصلہ کریں تو ان میں سے کچھ لوگ ایک دم رُخ پھیر لیتے ہیں

اور اگر خود اُنہیں حق وصول کرنا ہو تو وہ بڑے فرماں بردار بن کر رسول کے پاس چلے آتے ہیں

کیا ان کے دلوں میں کوئی روگ ہے، یا یہ شک میں پڑے ہوئے ہیں ، یا انہیں یہ اندیشہ ہے کہ اﷲ اور اُس کا رسول ان پر ظلم ڈھائے گا؟ نہیں ، بلکہ ظلم ڈھانے والے تو خود یہ لوگ ہیں