الفرقان

اور (اے پیغمبر !) جب یہ لوگ تمہیں دیکھتے ہیں تو ان کا کوئی کام اس کے سوا نہیں ہوتا کہ یہ تمہارا مذاق بناتے ہیں کہ : ’’ کیا یہی وہ صاحب ہیں جنہیں اﷲ نے پیغمبر بنا کر بھیجا ہے؟

اگر ہم اپنے خداؤں (کی عقیدت) پر مضبوطی سے جمے نہ رہتے تو اِن صاحب نے تو ہمیں اُن سے بھٹکانے میں کوئی کسر نہیں چھوڑی تھی۔‘‘ (جو لوگ یہ باتیں کہہ رہے ہیں ) جب اُنہیں عذاب آنکھوں سے نظر آجائے گا تب انہیں پتہ چلے گا کہ کون راستے سے بالکل بھٹکا ہوا تھا؟

بھلا بتلاؤ جس شخص نے اپنا خدا اپنی نفسانی خواہش کو بنالیا ہو، تو (اے پیغمبر !) کیا تم اُس کی ذمہ داری لے سکتے ہو؟

یا تمہارا خیال یہ ہے کہ ان میں سے اکثر لوگ سنتے یا سمجھتے ہیں؟ نہیں ! ان کی مثال تو بس چارپاؤں کے جانوروں کی سی ہے، بلکہ یہ اُن سے زیادہ راہ سے بھٹکے ہوئے ہیں

کیا تم نے اپنے پروردگار (کی قدرت) کو نہیں دیکھا کہ وہ کس طرح سائے کو پھیلاتا ہے؟ اور اگر وہ چاہتا تو اُسے ایک جگہ ٹھہرا دیتا۔ پھر ہم نے سورج کو اُس کیلئے رہنما بنا دیا ہے

 پھر کھینچ لیا ہم نے اس کو اپنی طرف سہج سہج سمیٹ کر

اور وہی ہے جس نے تمہارے لئے رات کو لباس بنایا، اور نیند کو سراپا سکون، اور دن کو دوبارہ اُٹھ کھڑے ہونے کا ذریعہ بنا دیا

اور وہی ہے جس نے اپنی رحمت (یعنی بارش) سے پہلے ہوائیں بھیجیں جو (بارش کی) خوشخبری لے کر آتی ہیں ، اور ہم نے ہی آسمان سے پاکیزہ پانی اُتارا ہے

تاکہ ہم اُس کے ذریعے مردہ زمین کو زندگی بخشیں ، اور اپنی مخلوق میں سے بہت سے مویشیوں اور انسانوں کو اُس سے سیراب کریں

اور ہم نے لوگوں کے فائدے کیلئے اُس (پانی) کی اُلٹ پھیر کر رکھی ہے، تاکہ وہ سبق حاصل کریں ۔ لیکن اکثر لوگ ناشکری کے سوا ہر بات سے انکاری ہیں