الشعراء

موسیٰ نے کہا کہ : ’’ میرے پروردگار ! مجھے ڈر ہے کہ وہ مجھے جھوٹا بنائیں گے

اور میرا دل تنگ ہونے لگتا ہے، اور میری زبان نہیں چلتی۔ اس لئے آپ ہارون کو بھی (نبوت کا) پیغام بھیج دیجئے

اور میرے خلاف ان لوگوں نے ایک جرم بھی عائد کر رکھا ہے، جس کی وجہ سے مجھے ڈر ہے کہ وہ مجھے قتل نہ کر ڈالیں ۔‘‘

اﷲ نے فرمایاکہ : ’’ ہر گز نہیں ! تم دونوں ہماری نشانیاں لے کر جاؤ۔ یقین رکھو کہ ہم تمہارے ساتھ ہیں ، ساری باتیں سنتے رہیں گے

اب تم دونوں فرعون کے پاس جاؤ، اور کہو کہ : ’’ ہم دونوں رَبّ العالمین کے پیغمبر ہیں

(اور یہ پیغام لائے ہیں ) کہ تم بنو اسرائیل کو ہمارے ساتھ بھیج دو۔‘‘

فرعون نے (جواب میں موسیٰ علیہ السلام سے) کہا : ’’ کیا ہم نے تمہیں اُس وقت اپنے پاس رکھ کر نہیں پالا تھا جب تم بالکل بچے تھے؟ اور تم نے اپنی عمر کے بہت سے سال ہمارے یہاں رہ کر گذارے

اور جو حرکت تم نے کی تھی وہ بھی کر گذرے، اور تم بڑے ناشکرے آدمی ہو۔‘‘

موسیٰ نے کہا : ’’ اُس وقت وہ کام میں ایسی حالت میں کر گذرا تھا کہ مجھے پتہ نہیں تھا

چنانچہ جب مجھے تم لوگوں سے خوف ہوا تو میں تمہارے پاس سے فرار ہوگیا، پھر اﷲ نے مجھے حکمت عطافرمائی، اور پیغمبروں میں شامل فرما دیا