القصص

پھر ہو ایہ کہ ہم نے اُسے اور اُس کے گھر کو زمین میں دھنسا دیا، پھر اُسے کوئی ایسا گروہ میسر نہ آیا جو اﷲ کے مقابلے میں اُس کی مدد کرتا اور نہ و ہ خود اپنا بچاؤ کرسکا

اور کل جو لوگ اُس جیسا ہونے کی تمنا کر رہے تھے، کہنے لگے : ’’ اوہو ! پتہ چل گیا کہ اﷲ اپنے بندوں میں سے جس کیلئے چاہتاہے رزق میں وسعت کر دیتا ہے، اور (جس کیلئے چاہتا ہے) تنگی کر دیتا ہے۔ اگر اﷲ نے ہم پر اِحسان نہ کیا ہوتا تو وہ ہمیں بھی زمین میں دھنسا دیتا۔ اوہو ! پتہ چل گیا کہ کافر لوگ فلاح نہیں پاتے۔‘‘

وہ آخرت والا گھر تو ہم اُن لوگوں کیلئے مخصوص کر دیں گے جو زمین میں نہ تو بڑائی چاہتے ہیں ، اور نہ فساد، اور آخری انجام پرہیز گاروں کے حق میں ہوگا

جو شخص کوئی نیکی لے کر آئے گا تو اُس کو اُس سے بہتر چیز ملے گی، اور جو کوئی بدی لے کر آئے گا تو جنہوں نے برے کام کئے ہیں ، اُن کو کسی اور چیز کی نہیں ، اُن کے کئے ہوئے کاموں ہی کی سزا دی جائے گی

(اے پیغمبر !) جس ذات نے تم پر اس قرآن کی ذمہ داری ڈالی ہے، وہ تمہیں دوبارہ اُس جگہ پر لاکر رہے گا جو (تمہارے لئے) اُنسیت کی جگہ ہے۔ کہہ دو : ’’ میرا رَبّ اُس سے بھی خوب واقف ہے جو ہدایت لے کر آیا ہے، اور اُس سے بھی جو کھلی گمراہی میں مبتلا ہے۔‘‘

اور (اے پیغمبر !) تمہیں پہلے سے یہ اُمید نہیں تھی کہ تم پر یہ کتاب نازل کی جائے گی، لیکن یہ تمہارے رَبّ کی طرف سے رحمت ہے، لہٰذا کافروں کے ہر گز مددگار نہ بننا

اور جب یہ آیتیں تم پر نازل کر دی گئی ہیں ، تو اس کے بعد یہ لوگ تمہیں ہر گز اُن (پر عمل کرنے) سے روکنے نہ پائیں ۔ اور تم اپنے رَبّ کی طرف لوگوں کو دعوت دیتے رہو، اور ہر گز ان مشرکین میں شامل نہ ہونا

اور اﷲ کے ساتھ کسی اور معبود کو نہ پکارو۔ اُس کے سوا کوئی معبود نہیں ہے۔ ہر چیز فنا ہونے والی ہے، سوائے اُس کی ذات کے۔ حکومت اُسی کی ہے، اور اُسی کی طرف تمہیں لوٹا یا جائے گا