العنكبوت

بھلا کیا ان کیلئے یہ (نشانی) کافی نہیں ہے کہ ہم نے تم پر کتاب اُتاری ہے جو ان کو پڑھ کر سنائی جارہی ہے؟ یقینا اس میں اُن لوگوں کیلئے بڑی رحمت اور نصیحت ہے جو ماننے والے ہوں

کہہ دو کہ : ’’ میرے اور تمہارے درمیان گواہی دینے کیلئے اﷲ کافی ہے، اُسے اُن تمام چیزوں کا علم ہے جو آسمانوں اور زمین میں موجود ہیں ۔ اور جو لوگ باطل پر ایمان لائے ہیں ، اوراﷲ کا انکار کیا ہے، وہی ہیں جو سخت نقصان اُٹھانے والے ہیں ۔‘‘

اور یہ لوگ عذاب کی جلدی مچا رہے ہیں ۔ اگر (عذاب کا) ایک معین وقت نہ ہوتا تو ان پر ضرور عذاب آجاتا، اور وہ آئے گا ضرور (مگر) اتنا اچانک کہ ان کو پتہ بھی نہیں چلے گا

یہ عذاب کی جلدی مچارہے ہیں ، اور یقینا جہنم ان کو گھیرے میں لے لے گی

اُس دن جب عذاب اُن پر اُوپر سے بھی چھا جائے گا، اور ان کے پاؤں کے نیچے سے بھی، اور کہے گا کہ : ’’ چکھو اُن کاموں کا مزہ جو تم کیا کرتے تھے۔‘‘

اے میرے بندو جو ایمان لا چکے ہو ! یقین جانو میری زمین بہت وسیع ہے، لہٰذا خالص میری عبادت کرو

ہر متنفس کو موت کا ذائقہ چکھنا ہے، پھر ہماری ہی طرف تم سب کو واپس لایا جائے گا

اور جو لوگ ایمان لائے ہیں ، اور اُنہوں نے نیک عمل کئے ہیں ، اُن کو ہم ضرور جنت کے ایسے بالا خانوں میں آباد کریں گے جن کے نیچے نہریں بہتی ہوں گی، جہاں وہ ہمیشہ ہمیشہ رہیں گے۔ بہترین اجر ہے ان عمل کرنے والوں کا

جنہوں نے صبر سے کام لیا، اور جو اپنے پروردگار پر بھروسہ کرتے ہیں

اور کتنے جانور ہیں جو اپنا رزق اُٹھائے نہیں پھرتے ! اﷲ اُنہیں بھی رزق دیتا ہے، اور تمہیں بھی، اور وہی ہے جو ہر بات سنتا، ہر چیز جانتا ہے