العنكبوت

اور اگر تم اُن سے پوچھو کہ : ’’ کون ہے جس نے آسمانوں اور زمین کو پیدا کیا، اور سورج اور چاند کو کام پر لگایا؟‘‘ تو وہ ضرور یہ کہیں گے کہ : ’’ اﷲ !‘‘ پھر آخر یہ لوگ کہاں سے اوندھے چل پڑتے ہیں؟

اﷲ اپنے بندوں میں سے جس کیلئے چاہتاہے، رزق میں کشادگی کر دیتا ہے، اور جس کیلئے چاہتا ہے، تنگی کر دیتا ہے۔ یقینا اﷲ ہر چیز کا مکمل علم رکھتا ہے

اور اگر تم ان سے پوچھو کہ : ’’ کو ن ہے جس نے آسمان سے پانی برسایا، پھر اُس کے ذریعے زمین کے مردہ ہونے کے بعد اُسے زندگی بخشی؟‘‘ تو وہ ضرور یہ کہیں گے کہ : ’’ اﷲ !‘‘ کہو : ’’ الحمدﷲ !‘‘ لیکن ان میں سے اکثر لوگ عقل سے کام نہیں لیتے

اور یہ دُنیوی کھیل کود کے سوا کچھ بھی نہیں ، اور حقیقت یہ ہے کہ دارِ آخرت ہی اصل زندگی ہے، اگر یہ لوگ جانتے ہوتے !

چنانچہ جب یہ کشتی میں سوار ہوتے ہیں تو اﷲ کو اس طرح پکارتے ہیں کہ ان کا اعتقاد خالص اُسی پر ہوتا ہے۔ پھر جب وہ اُنہیں بچاکر خشکی پر لے آتا ہے تو فوراً شرک کرنے لگتے ہیں

کرلیں یہ لوگ ناشکری اُس نعمت کی جو ہم نے اُن کو دی ہے، اور اُڑالیں کچھ مزے ! پھر وہ وقت دور نہیں جب اِنہیں سب پتہ چل جائے گا

بھلا کیا اِنہوں نے یہ نہیں دیکھا کہ ہم نے (ان کے شہر کو) ایک پر امن حرم بنادیا ہے، جبکہ ان کے اِردگرد لوگوں کا حال یہ ہے کہ اُنہیں اُچک لیا جاتاہے۔ کیا پھر بھی یہ باطل پر ایمان لاتے ہیں ، اور اﷲ کی نعمت کی ناشکری کرتے ہیں؟

اور اُس شخص سے بڑا ظالم کون ہوگا جو اﷲ پر جھوٹا بہتان باندھے، یا جب اُس کے پاس حق کی بات پہنچے تو وہ اُسے جھٹلائے؟ کیا جہنم میں (ایسے) کافروں کا ٹھکانا نہیں ہوگا؟

اور جن لوگوں نے ہماری خاطر کوشش کی ہے، ہم اُنہیں ضرور بالضرور اپنے راستوں پر پہنچائیں گے، اور یقینا اﷲ نیکی کرنے والوں کے ساتھ ہے