الروم

(فطرت کی پیروی) اس طرح (کرو) کہ تم نے اُسی (اﷲ) سے لو لگا رکھی ہو، اور اُس سے ڈرتے رہو، اور نماز قائم کرو، اور اُن لوگوں کے ساتھ شامل نہ ہو جو شرک کا ارتکاب کرتے ہیں

وہ جنہوں نے اپنے دین کو ٹکڑے ٹکڑے کر لیا، اور مختلف فرقوں میں بٹ گئے۔ ہر گروہ اپنے اپنے طریقے پر مگن ہے

اور جب لوگوں کو کوئی تکلیف چھو جاتی ہے تو وہ اپنے پروردگار سے لو لگا کر اُسی کو پکارتے ہیں ، پھر جب وہ اپنی طرف سے اُنہیں کسی رحمت کا ذائقہ چکھا دیتا ہے، تو اُن میں سے کچھ لوگ یکایک اپنے پروردگار کے ساتھ شرک کرنے لگتے ہیں

تاکہ ہم نے اُنہیں جو کچھ دیا تھا، اُس کی ناشکری کریں ۔ اچھا ! کچھ مزے اُڑالو، پھر وہ وقت دور نہیں جب تمہیں سب پتہ چل جائے گا

بھلا کیا ہم نے ان پر کوئی ایسی دلیل نازل کی ہے جو اُس شرک کا ارتکاب کرنے کو کہتی ہو جو یہ اﷲ کے ساتھ کے ساتھ کرتے رہے ہیں؟

اور جب ہم لوگوں کو رحمت کا مزہ چکھاتے ہیں تو وہ اِترا جاتے ہیں ، اور اگر انہیں خود اپنے ہاتھوں کے کرتوت کی وجہ سے کوئی برائی پہنچ جائے تو ذرا سی دیر میں وہ مایوس ہونے لگتے ہیں

کیا انہوں نے یہ نہیں دیکھا کہ اﷲ جس کیلئے چاہتا ہے رزق کشادہ کر دیتا ہے، اور (جس کیلئے چاہے) تنگ کر دیتا ہے۔ اس میں یقینا اُن لوگوں کیلئے بڑی نشانیاں ہیں جو ایمان لائیں

لہٰذا تم رشتہ دار کو اُس کا حق دو، اور مسکین اور مسافر کو بھی۔ جو لوگ اﷲ کی خوشنودی چاہتے ہیں ، اُن کیلئے یہ بہتر ہے، اور وہی ہیں جو فلاح پانے والے ہیں

اوریہ جو تم سوددیتے ہو تاکہ وہ لوگوں کے مال میں شامل ہوکر بڑھ جائے تو وہ اﷲ کے نزدیک بڑھتا نہیں ہے، اور جو زکوٰۃ تم اﷲ کی خوشنودی حاصل کرنے کے ارادے سے دیتے ہو، تو جو لوگ بھی ایسا کرتے ہیں وہ ہیں جو (اپنے مال کو) کئی گنا بڑھا لیتے ہیں

اﷲ وہ ہے جس نے تمہیں پیدا کیا، پھر اُس نے تمہیں رزق دیا، پھر وہ تمہیں موت دیتا ہے، پھر تمہیں زندہ کرے گا۔ جن کو تم نے اﷲ کا شریک ماناہوا ہے، کیا اُن میں سے کوئی ہے جو ان میں سے کوئی کام کرتا ہو؟ پاک ہے وہ اور بہت بالا وبرتر اُس شرک سے جس کا ارتکاب یہ لوگ کرتے ہیں