لقمان

اور جب اُن سے کہا جاتا ہے کہ : ’’ اُس چیز کی اِتباع کرو جو اﷲ نے اُتاری ہے‘‘ تو وہ کہتے ہیں : ’’ نہیں ، بلکہ ہم تو اُس طریقے کے پیچھے چلیں گے جس پر ہم نے اپنے باپ دادوں کو پایا ہے۔‘‘ بھلا اگر شیطان اُن (باپ دادوں ) کو بھڑکتی آگ کی طرف بلاتا رہا ہو، کیا تب بھی (وہ اُنہی کے پیچھے چلیں گے؟)

اور جو شخص فرماں بردار بن کر اپنا رُخ اﷲ کی طرف کر دے، اور نیک عمل کرنے والا ہو، تو اُس نے یقینا بڑا مضبوط کنڈا تھام لیا۔ اور تمام کاموں کا آخری انجام اﷲ ہی کے حوالے ہے

(اے پیغمبر !) جس کسی نے کفر اپنا لیا ہے، تمہیں اُس کا کفر صدمے میں نہ ڈالے۔ آخر انہیں ہمارے پاس ہی تو لوٹنا ہے، پھر ہم اُنہیں بتائیں گے کہ اُنہوں نے کیا کیا ہے؟ یقینا اﷲ سینوں میں چھپی ہوئی باتوں کو بھی خوب جانتا ہے

ہم اُنہیں کچھ مزے اُڑانے کا موقع دے رہے ہیں ، پھر ہم انہیں ایک سخت عذاب کی طرف کھینچ کر لے جائیں گے

اور اگر تم ان سے پوچھو کہ وہ کون ہے جس نے آسمانوں اور زمین کو پیدا کیا ہے؟ تو وہ ضرور یہ کہیں گے کہ : ’’ اﷲ !‘‘ کہو : ’’ الحمد ﷲ !‘‘ اس کے باوجود ان میں سے اکثر لوگ سمجھ سے کام نہیں لیتے

اﷲ ہی کا ہے جو کچھ آسمانوں اور زمین میں ہے، بیشک اﷲ ہی ہے جو سب سے بے نیاز ہے، بذاتِ خود قابلِ تعریف

اور زمین میں جتنے درخت ہیں ، اگر وہ قلم بن جائیں ، اور یہ جو سمندر ہے، اُس کے علاوہ سات سمندر اس کے ساتھ اور مل جائیں ، (اور وہ روشنائی بن کر اﷲ کی صفات لکھیں ) تب بھی اﷲ کی باتیں ختم نہیں ہوں گی۔ حقیقت یہ ہے کہ اﷲ اقتدار کا بھی مالک ہے، حکمت کا بھی مالک

تم سب کو پیدا کرنا اور دوبارہ زندہ کرنا (اﷲ کیلئے) ایسا ہی ہے جیسے ایک انسان کو (پیدا کرنا اور دوبارہ زندہ کرنا) ۔ یقینا اﷲ ہر بات سنتا، ہر چیز دیکھتا ہے

کیا تم نے نہیں دیکھا کہ اﷲ رات کو دن میں داخل کر دیتا ہے، اور دن کورات میں داخل کر دیتا ہے، اور اُس نے سور ج اور چاند کو کام میں لگا رکھا ہے کہ ہرایک کسی متعین میعاد تک رواں دواں ہے، اور (کیا تمہیں یہ معلوم نہیں ) کہ اﷲ پوری طرح باخبر ہے کہ تم کیا کرتے ہو؟

یہ سب کچھ اس لئے ہے کہ اﷲ ہی کا وجودسچا ہے، اور جن (معبودوں ) کو یہ (مشرک) پکارتے ہیں ، وہ بے بنیاد ہیں ، اور اﷲ ہی وہ ہے جس کی شان بہت اُونچی ہے، جس کی ذات بہت بڑی