الأحزاب

اے ایمان والو ! اﷲ کو خوب کثرت سے یاد کیا کرو

اور صبح وشام اُس کی تسبیح کرو۔

وہی ہے جو خود بھی تم پر رحمت بھیجتا ہے، اور اُس کے فرشتے بھی، تاکہ وہ تمہیں اندھیروں سے نکال کر روشنی میں لے آئے، اور وہ مومنوں پر بہت مہربان ہے

جس دن مومن لوگ اﷲ سے ملیں گے اُس دن اُن کا استقبال سلام سے ہوگا، اور اﷲ نے اُن کیلئے باعزت انعام تیار کر رکھا ہے

اے نبی ! بیشک ہم نے تمہیں ایسا بنا کربھیجا ہے کہ تم گواہی دینے والے، خوشخبری سنانے والے اور خبر دار کرنے والے ہو

اور اﷲ کے حکم سے لوگوں کو اﷲ کی طرف بلانے والے، اور روشنی پھیلانے والے چراغ ہو

تم مومنوں کو خوشخبری سنادو کہ اُن پر اﷲ کی طرف سے بڑا فضل ہونے والا ہے

اور کافروں اور منافقوں کی بات نہ مانو، اوراُن کی طرف سے جو تکلیف پہنچے، اُس کی پروا نہ کرو، اور اﷲ پر بھروسہ کئے رہو، اور اﷲ رکھوالا بننے کیلئے کافی ہے

اے ایمان والو ! جب تم نے مومن عورتوں سے نکاح کیا ہو، پھر تم نے اُنہیں چھونے سے پہلے ہی طلاق دے دی ہو، تو اُن کے ذمے تمہاری کوئی عدت واجب نہیں ہے جس کی گنتی تمہیں شمار کرنی ہو۔ لہٰذا اُنہیں کچھ تحفہ دے دو، اور اُنہیں خوبصورتی سے رُخصت کردو

اے نبی ! ہم نے تمہارے لئے تمہاری وہ بیویاں حلال کر دی ہیں جن کو تم نے اُن کا مہر ادا کردیا ہے، نیز اﷲ نے غنیمت کا جو مال تمہیں عطا کیا ہے، اُس میں سے جو کنیزیں تمہاری ملکیت میں آچکی ہیں وہ بھی (تمہارے لئے حلال ہیں ) اور تمہاری وہ چچا کی بیٹیاں اور پھوپی کی بیٹیاں اور ماموں کی بیٹیاں اور خالاؤں کی بیٹیاں بھی جنہوں نے تمہارے ساتھ ہجرت کی ہے، نیز کوئی مسلمان عورت جس نے مہر کے بغیر نبی کو اپنے آپ (سے نکاح کرنے) کی پیشکش کی ہو، بشرطیکہ نبی اُس سے نکاح کرنا چاہے۔ یہ سارے اَحکام خاص تمہارے لئے ہیں ، دُوسرے مومنوں کیلئے نہیں ۔ ہمیں وہ اَحکام خوب معلوم ہیں جو ہم نے اُن کی بیویوں اور کنیزوں کے بارے میں اُن پر عائد کئے ہیں ، (اور تمہیں ان سے مستثنیٰ کیا ہے) تاکہ تم پر کوئی تنگی نہ رہے، اور اﷲ بہت بخشنے والا، بڑا مہربان ہے