الزمر

پھر تم سب قیامت کے دن اپنے پروردگار کے پاس اپنا مقدمہ پیش کروگے

اب بتاؤ کہ اُس شخص سے بڑا ظالم کون ہوگا جو اﷲ پر جھوٹ باندھے، اور جب سچی بات اُس کے پاس آئے تو وہ اُس کو جھٹلا دے؟ کیا جہنم میں ایسے کافروں کا ٹھکانا نہیں ہوگا؟

اور جو لوگ سچی بات لے کر آئیں ، اور خود بھی اُسے سچ مانیں وہ ہیں جو متقی ہیں

اُن کو اپنے پروردگار کے پاس ہر وہ چیز ملے گی جو وہ چاہیں گے۔ یہ ہے نیک لوگوں کا بدلہ

تاکہ اُنہوں نے جو بدترین کام کئے تھے اﷲ اُن کا کفارہ کر دے، اور جو بہترین کام کرتے رہے تھے، اُن کا ثواب اُنہیں عطا فرمائے

(اے پیغمبر !) کیا اﷲ اپنے بندے کیلئے کافی نہیں ہے؟ اور یہ لوگ تمہیں اُس کے سوا دُوسروں سے ڈراتے ہیں ، اور جسے اﷲ راستے سے بھٹکا دے، اُسے کوئی راستے پر لانے والا نہیں

اور جسے اﷲ راہِ راست پر لے آئے، اُسے کوئی راستے سے بھٹکا نے والا نہیں ۔ کیا اﷲ زبردست، انتقام لینے والا نہیں؟

اور اگر تم ان سے پوچھو کہ آسمانوں کو اور زمین کو کس نے پیدا کیا ہے؟ تو وہ ضرور یہی کہیں گے کہ اﷲ نے۔ (ان سے) کہو کہ : ’’ ذرا مجھے یہ بتاؤ کہ تم اﷲ کو چھوڑ کر جن (بتوں ) کو پکارتے ہو، اگر اﷲ مجھے کوئی نقصان پہنچانے کا ارادہ کر لے تو کیا یہ اُس کے پہنچائے ہوئے نقصان کو دور کر سکتے ہیں؟ یا اگر اﷲ مجھ پر مہربانی فرمانا چاہے تو کیا یہ اُس کی رحمت کو روک سکتے ہیں؟‘‘ کہو کہ : ’’ میرے لئے اﷲ ہی کافی ہے۔ بھروسہ رکھنے والے اُسی پر بھروسہ رکھتے ہیں ۔‘‘

کہہ دو کہ : ’’ اے میری قوم کے لوگو ! تم اپنے طریقے پر عمل کئے جاؤ، میں (اپنے طریقے پر) عمل کر رہا ہوں ، پھر عنقریب تمہیں پتہ چل جائے گا

کہ کس پر وہ عذاب آتا ہے جو اُسے رُسوا کر کے رکھ دے گا، اور کس پر وہ عذاب نازل ہوتا ہے جو ہمیشہ جم کر رہے گا۔‘‘