النساء

یہ وہ لوگ ہیں جن پر اﷲ نے پھٹکار ڈال رکھی ہے، اور جس پر اﷲ پھٹکار ڈال دے، اس کیلئے تم کوئی مددگار نہیں پاؤ گے

توکیا ان کو (کائنات کی) بادشاہی کا کچھ حصہ ملا ہوا ہے ؟ اگر ایسا ہوتا تو یہ لوگوں کو گٹھلی کے شگاف کے برابر بھی کچھ نہ دیتے

یا یہ لوگوں سے اس بنا پر حسد کرتے ہیں کہ اﷲ نے ان کو اپنا فضل (کیوں ) عطا فرمایا ہے ؟ سو ہم نے تو ابراہیم کے خاندان کو کتاب اور حکمت عطا کی تھی اور انہیں بڑی سلطنت دی تھی

چنانچہ ان میں سے کچھ ان پر ایمان لائے اور کچھ نے ان سے منہ موڑ لیا۔ اور جہنم ایک بھڑکتی آگ کی شکل میں (ان کافروں کی خبر لینے کیلئے) کافی ہے

بیشک جن لوگوں نے ہماری آیتوں سے انکار کیا ہے ہم انہیں آگ میں داخل کریں گے۔جب بھی ان کی کھ الیں جل جل کر پک جا ئیں گی، تو ہم انہیں ان کے بدلے دوسری کھالیں دے دیں گے تاکہ وہ عذابکا مزہ چکھیں ۔ بیشک اﷲ صاحبِ اقتدار بھی ہے، صاحبِ حکمت بھی

اور جو لوگ ایمان لائے ہیں اور انہوں نے نیک عمل کئے ہیں ، ان کو ہم ایسے باغات میں داخل کریں گے جن کے نیچے نہریں بہتی ہوں گی، جن میں وہ ہمیشہ ہمیشہ رہیں گے۔ وہاں ان کیلئے پاکیزہ بیویاں ہوں گی، اور ہم انہیں گھنی چھاؤں میں داخل کریں گے۔

 (مسلمانو!) یقینا اﷲ تمہیں حکم دیتا ہے کہ تم امانتیں ان کے حق داروں تک پہنچاؤ، اور جب لوگوں کے درمیان فیصلہ کرو تو انصاف کے ساتھ فیصلہ کرو۔ یقین جانو اﷲ تم کو جس بات کی نصیحت کرتا ہے وہ بہت اچھی ہوتی ہے۔ بیشک اﷲ ہر بات کو سنتا اور ہر چیز کو دیکھتا ہے

اے ایمان والو ! اﷲ کی اطاعت کرو اور اس کے رسول کی بھی اطاعت کرو اور تم میں سے جو لوگ صاحبِ اختیار ہوں ، اُن کو بھی۔ پھر اگر تمہارے درمیان کسی چیز میں اختلاف ہو جائے تو اگر واقعی تم اﷲ اور یومِ آخرت پر ایمان رکھتے ہوتو اُسے اﷲ اور رسول کے حوالے کر دو۔ یہی طریقہ بہترین ہے اور اس کا انجام بھی سب سے بہتر ہے

 (اے پیغمبر !) کیا تم نے ان لوگوں کو نہیں دیکھا جو دعویٰ یہ کرتے ہیں کہ وہ اُس کلام پر بھی ایمان لے آئے ہیں جو تم پر نازل کیا گیا ہے اور اُس پر بھی جو تم سے پہلے نازل کیا گیا تھا، (لیکن) ان کی حالت یہ ہے کہ وہ اپنا مقدمہ فیصلے کیلئے طاغوت کے پاس لے جانا چاہتے ہیں ؟ حالانکہ ان کو حکم یہ دیا گیا تھا کہ وہ اس کا کھل کر انکار کریں ۔ اور شیطان چاہتا ہے کہ انہیں بھٹکا کر پر لے درجے کی گمراہی میں مبتلا کر دے

اور جب ان سے کہا جاتا ہے کہ آؤ اس حکم کی طرف جو اﷲ نے اُتا را ہے اور آؤ رسول کی طرف، تو تم ان منافقوں کو دیکھو گے کہ وہ تم سے پوری طرح منہ موڑ بیٹھتے ہیں