غافر

(اور تمہارا حال بھی ویسا نہ ہو) جیسا حال نوح (علیہ السلام) کی قوم کا، اور عاد و ثمود کا اور اُن کے بعد کے لوگوں کا ہوا تھا۔ اور اﷲ بندوں پر ظلم کرنا نہیں چاہتا

اور اے میری قوم ! مجھے تم پر اس دن کا خوف ہے جس میں چیخ پکار مچی ہوگی

جس دن تم پیٹھ پھیر کر اس طرح بھاگو گے کہ کوئی بھی تمہیں اﷲ سے بچانے والا نہیں ہوگا، اور جسے اﷲ بھٹکا دے، اُسے کوئی راستہ دِکھانے والا میسر نہیں آتا

اور حقیقت یہ ہے کہ اس سے پہلے یوسف (علیہ السلام) تمہارے پاس روشن دلیلیں لے کر آئے تھے، تب بھی تم اُن کی لائی ہوئی باتوں کے متعلق شک میں پڑے رہے۔ پھر جب وہ وفات پاگئے تو تم نے کہا کہ اُن کے بعد اﷲ اب کوئی پیغمبر نہیں بھیجے گا۔ اسی طرح اﷲ اُن تمام لوگوں کو گمراہی میں ڈالے رکھتا ہے جو حد سے گذرے ہوئے، شکی ہوتے ہیں

جو اپنے پا س کسی واضح دلیل کے آئے بغیر اﷲ کی آیتوں میں جھگڑے نکالا کرتے ہیں ۔ یہ بات اﷲ کے نزدیک بھی قابلِ نفرت ہے، اور اُن لوگوں کے نزدیک بھی جو اِیمان لے آئے ہیں ۔ اسی طرح اﷲ ہر متکبر جابر شخص کے دِل پر مہر لگا دیتا ہے۔‘‘

اور فرعون نے (اپنے وزیر سے) کہا کہ : ’’ اے ہامان ! میرے لئے ایک اُونچی عمارت بنادو، تاکہ میں اُن راستوں تک پہنچوں

جو آسمانوں کے راستے ہیں ، پھر میں موسیٰ کے خدا کو جھانک کر دیکھوں ۔ اور یقین رکھو کہ میں تو اُسے جھوٹا ہی سمجھتا ہوں ۔‘‘ اسی طرح فرعون کی بدکرداری اُس کی نظر میں خوشنما بنا دی گئی تھی، اور اُسے راستے سے روک دیا گیا تھا۔ اور فرعون کی کوئی چال ایسی نہیں تھی جو بربادی میں نہ گئی ہو

اور جو شخص ایمان لے آیا تھا اُس نے کہا : ’’ اے قوم ! میری بات مانو، میں تمہیں ہدایت کے راست پر لے جاؤں گا

اے میری قوم ! یہ دُنیوی زندگی تو بس تھوڑا سا مزہ ہے، اور یقین جانو کہ آخرت ہی رہنے بسنے کا اصل گھر ہے

او ر جس شخص نے کوئی بُرائی کی ہوگی، اُسے اُسی کے برابر بدلہ دیا جائے گا، اور جس نے نیک کا م کیا ہوگا، چاہے وہ مرد ہو یا عورت، جب کہ وہ مومن ہو، تو ایسے لوگ جنت میں داخل ہوں گے۔ وہاں اُنہیں بے حساب رزق دیا جائے گا