غافر

یقین رکھو کہ ہم اپنے پیغمبروں اور ایمان لانے والوں کی دُنیوی زندگی میں بھی مدد کرتے ہیں ، اور اُس دن بھی کریں گے جب گواہی دینے والے کھڑے ہوں گے

جس دن ظالموں کو اُن کی معذرت کچھ بھی فائدہ نہیں دے گی، اور اُن کے حصے میں پھٹکار ہوگی، اور اُن کیلئے رہائش کی بدترین جگہ

اور ہم نے موسیٰ کو ہدایت عطا کی، اور بنی اِسرائیل کو اُس کتاب کا وارث بنایا

جو عقل رکھنے والوں کیلئے سراپا ہدایت اور نصیحت تھی

لہٰذا (اے پیغمبر !) صبر سے کام لو، یقین رکھو کہ اﷲ کا وعدہ سچا ہے، اور اپنے قصور پر اِستغفار کرتے رہو، اور صبح و شام اپنے پروردگار کی حمد کے ساتھ تسبیح کرتے رہو

یقین جانو کہ جو لوگ اﷲ کی آیتوں کے بارے میں جھگڑے نکالتے ہیں ، جبکہ اُن کے پاس (اپنے دعوے کی) کوئی سند نہیں آئی، اُن کے سینوں میں اور کچھ نہیں ، بلکہ اُس بڑائی کا ایک گھمنڈ ہے جس تک وہ کبھی پہنچنے والے نہیں ہیں ۔ لہٰذا تم اﷲ کی پنا ہ مانگو۔ یقینا وہی ہے جو ہر بات سننے والا، سب کچھ دیکھنے والا ہے

یقینی بات ہے کہ آسمانوں اور زمین کا پیدا کرنا انسانوں کے پیدا کرنے سے زیادہ بڑا کام ہے، لیکن اکثر لوگ (اتنی سی بات) نہیں سمجھتے

اور اَندھا اور بینائی رکھنے والا دونوں برابر نہیں ہوتے، اور نہ وہ لوگ جو ایمان لائے، اور اُنہوں نے نیک عمل کئے، وہ اور بدکار برابر ہیں ، (لیکن) تم لوگ بہت کم دھیان دیتے ہو

یقین رکھو کہ قیامت کی گھڑی ضرور آنے والی ہے، جس میں کسی شک کی گنجائش نہیں ہے، لیکن اکثر لوگ ایمان نہیں لاتے

اور تمہارے پروردگار نے کہا ہے کہ : ’’ مجھے پکارو، میں تمہاری دعائیں قبول کروں گا، بیشک جو لوگ تکبر کی بنا پر میری عبادت سے منہ موڑتے ہیں ، وہ ذلیل ہو کر جہنم میں داخل ہوں گے۔‘‘