الزخرف

اور جس نے آسمان سے ایک خاص اندازے سے پانی اُتارا، پھر ہم نے اُس کے ذریعے ایک مردہ علاقے کو نئی زندگی دے دی۔ اسی طرح تمہیں (قبروں سے) نکال کر نئی زندگی دی جائے گی۔

اور جس نے ہر طرح کے جوڑے پیدا کئے، اور تمہارے لئے وہ کشتیاں اور چو پائے بنائے جن پر تم سواری کرتے ہو

تاکہ تم اُن کی پشت پر چڑھو، پھر جب اُن پر چڑھ کر بیٹھ جاؤ تو اپنے پروردگار کی نعمت کو یاد کرو، اور یہ کہو کہ : ’’ پاک ہے وہ ذات جس نے اس سواری کو ہمارے بس میں دے دیا، ورنہ ہم میں یہ طاقت نہیں تھی کہ اس کو قابو میں لاسکتے

اور بیشک ہم اپنے پروردگار کی طرف لوٹ کر جانے والے ہیں ۔‘‘

اور ان (مشرک) لوگوں نے یہ بات بنائی ہے کہ اﷲ کا خود اُس کے بندوں میں سے کوئی جزء ہے۔ حقیقت یہ ہے کہ انسان کھلم کھلا ناشکرا ہے

بھلا کیا اﷲ نے اپنی مخلوق میں سے اپنے لئے تو بیٹیاں پسند کی ہیں ، اور تمہیں بیٹوں کیلئے منتخب کیا ہے؟

حالانکہ ان میں سے کسی کو جب اُس (بیٹی) کی (ولادت) کی خوشخبری دی جاتی ہے جو اُس نے خدائے رحمن کی طرف منسوب کر رکھی ہے تو اُس کا چہرہ سیا ہ پڑ جاتا ہے، اور وہ دل ہی دل میں گھٹتا رہتا ہے

اور کیا (اﷲ نے ایسی اولاد پسند کی ہے) جو زیوروں میں پالی پوسی جاتی ہے، او ر جو بحث مباحثے میں اپنی بات کھل کر بھی نہیں کہہ سکتی؟

اس کے علاوہ انہوں نے فرشتوں کو جو خدائے رحمن کے بندے ہیں ، مؤنث بنادیا ہے۔ کیا یہ لوگ اُن کی تخلیق کے وقت موجود تھے؟ ان کا یہ دعویٰ لکھ لیا جائے گا، اور ان سے بازپُرس ہوگی

اور یہ کہتے ہیں کہ : ’’ اگر خدائے رحمن چاہتا تو ہم ان (فرشتوں ) کی عبادت نہ کرتے۔‘‘ ان کو اس بات کی حقیقت کا ذرا بھی علم نہیں ہے، اور ان کا کام اس کے سوا کچھ نہیں کہ اندازوں کے تیر چلاتے ہیں