محمّـد

اور ہم ضرور تمہیں آزمائش میں ڈالیں گے، تاکہ ہم یہ دیکھ لیں کہ تم میں سے کون ہیں جو مجاہد اور ثابت قد م رہنے والے ہیں ، اور تاکہ تمہارے حالات کی جانچ پڑتال کر لیں

یقین رکھو کہ جن لوگوں نے کفر اَپنا لیا ہے، اور دُوسروں کو اﷲ کے راستے سے روکا ہے، اور پیغمبر سے دُشمنی ٹھانی ہے باوجودیکہ ان کے سامنے ہدایت واضح ہو کر آگئی تھی، وہ اﷲ کو ہرگز کوئی نقصان نہیں پہنچا سکتے، اور عنقریب اﷲ ان کا سارا کیا دھرا غارت کردے گا

اے ایما ن والو ! اﷲ کی اطاعت کرو، اور رسول کی اطاعت کرو، اور اپنے اعمال کو برباد نہ کرو

جن لوگوں نے کفر اَپنا لیا ہے، اور دُوسروں کو اﷲ کے راستے سے روکا ہے، پھر کفر ہی کی حالت میں مر گئے ہیں ، اﷲ کبھی اُن کو نہیں بخشے گا

لہٰذا (اے مسلمانو !) تم کمزور پڑ کر صلح کی دعوت نہ دو، تم ہی سربلند رہو گے، اﷲ تمہارے ساتھ ہے، اور وہ تمہارے اعمال کو ہر گز برباد نہیں کرے گا

یہ دُنیوی زندگی تو بس کھیل تماشا ہے، اور اگر تم ایمان لاؤ، اور تقویٰ اختیار کرو تو اﷲ تمہارے اَجر تمہیں دے گا، اور تمہارے مال تم سے نہیں مانگے گا

اگر وہ تم سے تمہارے مال طلب کرے، اور تم سے سب کچھ سمیٹ لے تو تم بخل سے کام لوگے، اور وہ تمہارے دل کی ناراضیوں کو ظاہر کر دے گا

دیکھو ! تم ایسے ہو کہ تمہیں اﷲ کے راستے میں خرچ کرنے کیلئے بلایا جاتا ہے تو تم میں سے کچھ لوگ ہیں جو بخل سے کام لیتے ہیں ، اور جو شخص بھی بخل کرتا ہے، وہ خود اپنے آپ ہی سے بخل کرتا ہے۔ اور اﷲ بے نیاز ہے، اور تم ہو جو محتاج ہو۔ اور اگر تم منہ موڑوگے تو وہ تمہاری جگہ دوسری قوم پیدا کردے گا، پھر وہ تم جیسے نہیں ہوں گے