الفتح

وہ دیہاتی جو (حدیبیہ کے سفر میں ) پیچھے رہ گئے تھے، اب وہ تم سے ضرور یہ کہیں گے کہ : ’’ ہمارے مال ودولت اور ہمارے اہل و عیال نے ہمیں مشغول کر لیا تھا، اس لئے ہمارے لئے مغفرت کی دُعا کر دیجئے۔‘‘ وہ اپنی زبانوں سے وہ باتیں کہتے ہیں جو ان کے دلوں میں نہیں ہوتیں ۔ (ان سے) کہو کہ : ’’ اچھا تو اگر اﷲ تمہیں کوئی نقصان پہنچانا چاہے یا فائدہ پہنچانا چاہے تو کون ہے جو اﷲ کے سامنے تمہارے معاملے میں کچھ بھی کرنے کی طاقت رکھتا ہو؟ بلکہ جو کچھ تم کرتے ہو، اﷲ اُس سے پوری طرح باخبر ہے

حقیقت تو یہ ہے کہ تم نے یہ سمجھا تھا کہ رسول صلی اللہ علیہ وسلم اور دوسرے مسلمان کبھی اپنے گھر والوں کے پاس لوٹ کر نہیں آئیں گے، اور یہی بات تمہارے دلوں کو اچھی معلوم ہوتی تھی، اور تم نے بُرے بُرے گمان کئے تھے، اور تم ایسے لوگ بن گئے تھے جنہیں برباد ہونا تھا

اور جو شخص اﷲ اور اُس کے رسول پر اِیمان نہ لائے، تو (وہ یادرکھے کہ) ہم نے کافروں کیلئے بھڑکتی ہوئی آگ تیار کر رکھی ہے

اور آسمانوں اور زمین کی سلطنت تمام تر اﷲ ہی کی ہے، وہ جس کو چاہے، بخش دے، اور جس کو چاہے، عذاب دے، اور اﷲ بہت بخشنے والا، بہت مہربان ہے

(مسلمانو !) جب تم غنیمت کے مال لینے کیلئے چلو گے تو یہ (حدیبیہ کے سفر سے) پیچھے رہنے والے تم سے کہیں گے کہ : ’’ ہمیں بھی اپنے ساتھ چلنے دو۔‘‘ وہ چاہیں گے کہ اﷲ کی بات کو بدل دیں ۔ تم کہہ دینا کہ : ’’ تم ہرگز ہمارے ساتھ نہیں چلو گے۔ اﷲ نے پہلے سے یوں ہی فرما رکھا ہے۔‘‘ اس پر وہ کہیں گے کہ : ’’ دراصل آپ لوگ ہم سے حسد رکھتے ہیں ۔‘‘ نہیں ! بلکہ حقیقت یہ ہے کہ یہ لوگ خود ہی ایسے ہیں کہ بہت کم بات سمجھتے ہیں

ان پیچھے رہنے والے دیہاتیوں سے کہہ دینا کہ : ’’ عنقریب تمہیں ایسے لوگوں کے پاس (لڑنے کیلئے) بلایا جائے گا جو بڑے سخت جنگجو ہوں گے، کہ یا تو اُن سے لڑتے رہو، یا وہ اطاعت قبول کر لیں ۔ اُس وقت اگر تم (جہاد کے اُس حکم کی) اطاعت کروگے تو اﷲ تمہیں اچھا اَجر دے گا، اور اگر تم منہ موڑوگے جیسا کہ تم نے پہلے منہ موڑا تھا تو اﷲ تمہیں دردناک عذاب دے گا

اندھے آدمی پر (جہاد نہ کرنے کا) کوئی گناہ نہیں ہے، نہ لنگڑے آدمی پر کوئی گناہ ہے، اور نہ بیمار آدمی پر گناہ ہے۔ اور جو شخص بھی اﷲ اور اُس کے رسول کا کہنا مانے، اﷲ اُس کو ایسی جنتوں میں داخل کرے گا جن کے نیچے نہریں بہتی ہوں گی۔ اور جو کوئی منہ موڑے گا، اُسے دردناک عذاب دے گا

یقینا اﷲ اِن مومنوں سے بڑا خوش ہوا جب وہ درخت کے نیچے تم سے بیعت کر رہے تھے، اور ان کے دلوں میں جو کچھ تھا وہ بھی اﷲ کو معلوم تھا، اس لئے اُس نے اُن پر سکینت اُتار دی، اور اُن کو اِنعام میں ایک قریبی فتح عطا فرمادی

 اور بہت غنیمتیں جن کو وہ لیں گے، اور اللہ زبردست حکمت  والا ہے

اﷲ نے تم سے بہت سے مالِ غنیمت کا وعدہ کر رکھا ہے جو تم حاصل کروگے، اب فوری طور پر اُس نے تمہیں یہ فتح دے دی ہے، اور لوگوں کے ہاتھوں کو تم سے روک دیا، تاکہ یہ مومنوں کیلئے ایک نشانی بن جائے، اور تمہیں اﷲ سیدھے راستے پر ڈال دے