الحُـجُـرات

اے ایمان والو ! اﷲ اور اس کے رسول کے آگے نہ بڑھا کرو، اور اﷲ سے ڈرتے رہو۔ اﷲ یقینا سب کچھ سنتا، سب کچھ جانتا ہے

اے ایمان والو ! اپنی آوازیں نبی کی آواز سے بلند مت کیا کرو، اور نہ اُن سے بات کرتے ہوئے اس طرح زور سے بولا کرو جیسے تم ایک دوسرے سے زور سے بولتے ہو، کہیں ایسا نہ ہو کہ تمہارے اعمال برباد ہوجائیں ، اور تمہیں پتہ بھی نہ چلے

یقین جانو جو لوگ اﷲ کے رسول صلی اللہ علیہ وسلم کے پاس اپنی آوازیں نیچی رکھتے ہیں ، یہ وہی لوگ ہیں جن کے دلوں کو اﷲ نے خوب جانچ کر تقویٰ کیلئے منتخب کر لیا ہے۔ اُن کو مغفرت بھی حاصل ہے، اور زبردست اَجر بھی

(اے پیغمبر !) جو لوگ تمہیں حجروں کے پیچھے سے آواز دیتے ہیں ، اُن میں سے اکثر کو عقل نہیں ہے

اور اگر یہ لوگ اُس وقت تک صبر کرتے جب تک تم خود باہر نکل کر ان کے پاس آجاتے، تو ان کیلئے بہتر ہوتا، اور اﷲ بہت بخشنے والا، بہت مہربان ہے

اے ایمان والو ! اگر کوئی فاسق تمہارے پاس کوئی خبر لے کر آئے، تو اچھی طرح تحقیق کرلیا کرو، کہیں ایسا نہ ہو کہ تم نادانی سے کچھ لوگوں کو نقصان پہنچا بیٹھو، اور پھر اپنے کئے پر پچھتاؤ

اور یہ بات اچھی طرح سمجھ لوکہ تمہارے درمیان اﷲ کے رسول موجود ہیں ۔ بہت سی باتیں ہیں جن میں وہ اگر تمہاری بات مان لیں تو خود تم مشکل میں پڑجاؤ۔ لیکن اﷲ نے تمہارے دل میں ایمان کی محبت ڈال دی ہے، اور اُسے تمہارے دلوں میں پُر کشش بنادیاہے، اور تمہارے اندر کفر کی اور گناہوں اور نافرمانی کی نفرت بٹھادی ہے۔ ایسے ہی لوگ ہیں جو ٹھیک ٹھیک راستے پر آچکے ہیں

جو اﷲ کی طرف سے فضل اور نعمت کا نتیجہ ہے، اور اﷲ علم کا بھی مالک ہے، حکمت کا بھی مالک

اور اگر مسلمانوں کے دو گروہ آپس میں لڑ پڑیں تو اُن کے درمیان صلح کراؤ۔ پھر اگر اُن میں سے ایک گروہ دُوسرے کے ساتھ زیادتی کرے تو اُس گروہ سے لڑو جو زیادتی کررہا ہو، یہاں تک کہ وہ اﷲ کے حکم کی طرف لوٹ آئے۔ چنانچہ اگر وہ لوٹ آئے، تو اُن کے درمیان انصاف کے ساتھ صلح کرادو، اور (ہر معاملے میں ) انصاف سے کام لیا کرو، بیشک اﷲ انصاف سے کام لیا کرو، بیشک اﷲ انصاف کرنے والوں سے محبت کرتا ہے

حقیقت تو یہ ہے کہ تمام مسلمان بھائی بھائی ہیں ، اس لئے اپنے دو بھائیوں کے درمیان تعلقات اچھے بناؤ، اور اﷲ سے ڈرو تاکہ تمہارے ساتھ رحمت کا معاملہ کیا جائے