الأنفال

اور اگر وہ لوگ صلح کی طرف جھکیں تو تم بھی اُس کی طرف جھک جاؤ، اور اﷲ پر بھروسہ رکھو۔ یقین جانو وہی ہے جو ہر بات سنتا، سب کچھ جانتا ہے

اور اگر وہ تمہیں دھوکا دینے کا ارادہ کریں گے تو اﷲ تمہارے لئے کافی ہے۔ وہی تو ہے جس نے اپنی مدد کے ذریعے اور مومنوں کے ذریعے تمہارے ہاتھ مضبوط کئے

اور اُن کے دلوں میں ایک دوسرے کی اُلفت پیدا کردی۔ اگر تم زمین بھر کی ساری دولت بھی خرچ کر لیتے تو ان کے دلوں میں یہ اُلفت پیدا نہ کرسکتے، لیکن اﷲ نے ان کے دلوں کو جوڑ دیا۔ وہ یقینا اقتدار کا بھی مالک ہے، حکمت کا بھی مالک

اے نبی ! تمہارے لئے تو بس اﷲ اور وہ مومن لوگ کافی ہیں جنہوں نے تمہاری پیروی کی ہے

اے نبی ! مومنوں کو جنگ پر اُبھارو۔ اگرتمہارے بیس آدمی ایسے ہوں جو ثابت قدم رہنے والے ہوں تو وہ دوسو پر غالب آ جائیں گے۔اور اگر تمہارے سو آدمی ہوں گے تو وہ کافروں کے ایک ہزار پر غالب آجائیں گے، کیونکہ وہ ایسے لوگ ہیں جو سمجھ نہیں رکھتے

لو اَب اﷲ نے تم سے بوجھ ہلکا کر دیا، اور اُس کے علم میں ہے کہ تمہارے اندر کچھ کمزوری ہے۔ لہٰذا (اب حکم یہ ہے کہ) اگر تمہارے ثابت قدم رہنے والے سو آدمی ہوں تو وہ دو سو پر غالب آجائیں گے، اور اگر تمہارے ایک ہزار آدمی ہوں تو وہ اﷲ کے حکم سے دو ہزار پر غالب آجائیں گے، اور اﷲ ثابت قدم رہنے والوں کے ساتھ ہے

یہ بات کسی نبی کے شایانِ شان نہیں ہے کہ اُس کے پاس قیدی رہیں ، جب تک کہ وہ زمین میں (دشمنوں کا) خون اچھی طرح نہ بہا چکا ہو (جس سے ان کا رُعب پوری طرح ٹوٹ جائے) تم دنیا کا سازوسامان چاہتے ہو، اور اﷲ (تمہارے لئے) آخرت (کی بھلائی) چاہتا ہے، اور اﷲ صاحبِ اقتدار بھی ہے، صاحبِ حکمت بھی

اگر اﷲ کی طرف سے ایک لکھا ہوا حکم پہلے نہ آچکا ہوتا تو جو راستہ تم نے اختیار کیا، اُس کی وجہ سے تم پر کوئی بڑی سزا آجاتی

لہٰذا اب تم نے جو مالِ غنیمت میں حاصل کیا ہے، اُسے پاکیزہ حلال مال کے طور پر کھاؤ، اور اﷲ سے ڈرتے رہو۔ یقینا اﷲ بہت بخشنے والا، بڑا مہربان ہے

اے نبی ! تم لوگوں کے ہاتھوں میں جو قیدی ہیں ، (اور جنہوں نے مسلمان ہونے کا ارادہ ظاہر کیا ہے) اُن سے کہہ دو کہ : ’’ اگر اﷲ تمہارے دلوں میں بھلائی دیکھے گا تو جو مال تم سے (فدیہ میں ) لیا گیا ہے، اُس سے بہتر تمہیں دیدے گا، اور تمہاری بخشش کردے گا، اور اﷲ بہت بخشنے والا، بڑا مہربان ہے۔ ‘‘