التوبة

لہٰذا اگر یہ توبہ کرلیں ، اور نماز قائم کریں ، اور زکوٰۃ اداکریں ، تو یہ تمہارے دینی بھائی بن جائیں گے۔ اور ہم احکام کی یہ تفصیل اُن لوگوں کیلئے بیان کر رہے ہیں جو جاننا چاہیں

اور اگر ان لوگوں نے اپنا عہد دے دینے کے بعد اپنی قسمیں توڑ ڈالی ہوں ، اورتمہارے دین کو طعنے دیئے ہوں ، تو ایسے کفر کے سربراہوں سے اس نیت سے جنگ کرو کہ وہ باز آجائیں ، کیونکہ یہ ایسے لوگ ہیں کہ ان کی قسموں کی کوئی حقیقت نہیں

کیا تم اُن لوگوں سے جنگ نہیں کروگے جنہوں نے اپنی قسموں کو توڑا، اور رسول کو (وطن سے) نکالنے کا ارادہ کیا، اور وہی ہیں جنہوں نے تمہارے خلاف (چھیڑ چھاڑ کرنے میں ) پہل کی ؟ کیا تم اُس سے ڈرتے ہو ؟ (اگر ایسا ہے) تو اﷲ اس بات کا زیادہ حق رکھتا ہے کہ تم اُس سے ڈرو، اگر تم مومن ہو

ان سے جنگ کرو، تاکہ اﷲ تمہارے ہاتھوں سے ان کو سزا دلوائے، اُنہیں رُسوا کرے، اُن کے خلاف تمہاری مدد کے، اور مومنوں کے دل ٹھنڈے کر دے

اور اُن کے دل کی کڑھن دور کردے، اور جس کی چاہے توبہ قبول کرلے۔ اور اﷲ کا علم بھی کامل ہے، حکمت بھی کامل

بھلا کیا تم نے یہ سمجھ رکھا ہے کہ تمہیں یونہی چھوڑ دیاجائے گا، حالانکہ ابھی اﷲ نے یہ تو دیکھا ہی نہیں کہ تم میں سے کون لوگ جہاد کرتے ہیں ، اور اﷲ، اُس کے رسول اور مومنوں کے سوا کسی اور کو خصوصی رازدار نہیں بناتے؟ اور تم جو کچھ کرتے ہو، اﷲ اُس سے پوری طرح باخبر ہے

مشرکین اس بات کے اہل نہیں ہیں کہ وہ اﷲ کی مسجدوں کو آباد کریں ، حالانکہ وہ خود اپنے کفر کے گواہ بنے ہوئے ہیں ۔ ان لوگوں کے تو اعمال ہی غارت ہو چکے ہیں، اور دوزخ ہی میں اُن کو ہمیشہ رہنا ہے

اﷲ کی مسجدوں کو تووہی لوگ آباد کرتے ہیں جو اﷲ اور یومِ آخرت پر ایمان لائے ہوں ، اور نماز قائم کریں ، اور زکوٰۃ ادا کریں ، اور اﷲ کے سوا کسی سے نہ ڈریں ۔ ایسے ہی لوگوں سے یہ توقع ہوسکتی ہے کہ وہ صحیح راستہ اختیار کرنے والوں میں شامل ہوں گے

کیا تم لوگوں نے حاجیوں کو پانی پلانے اور مسجدِ حرام کے آباد رکھنے کو اُس شخص کے (اعمال کے) برابر سمجھ رکھا ہے جو اﷲ اور یومِ آخرت پر ایمان لایا ہے، اور جس نے اﷲ کے راستے میں جہاد کیا ہے۔ اﷲ کے نزدیک یہ سب برابر نہیں ہوسکتے۔ اور اﷲ ظالم لوگوں کو منزلِ مقصود تک نہیں پہنچاتا

جو لوگ ایمان لے آئے ہیں ، اور انہوں نے اﷲ کے راستے میں ہجرت کی ہے، اورا پنے مال اور اپنی جانوں سے جہاد کیا ہے، وہ اﷲ کے نزدیک درجے میں کہیں زیادہ ہیں ، اور وہی لوگ ہیں جو کامیاب ہونے والے ہیں