رحمة للعالمين عليه الصلاة والسلام كا فرض منصبى

 آیت 20:    فَاِنْ حَآجُّوْکَ: «پھر (اے نبی )  اگر وہ آپ سے حجت بازی کریں»

      دلیل بازی اور مناظرے کی روش اختیار کریں۔

     فَقُلْ اَسْلَمْتُ وَجْہِیَ لِلّٰہِ وَمَنِ اتَّــبَـعَنِ:  «تو آپ کہہ دیں کہ میں نے تو اپنا چہرہ اللہ کے سامنے جھکا دیا ہے اور انہوں نے بھی جو میرا اتباع کر رہے ہیں۔»

     آپ ان سے دو ٹوک انداز میں یہ آخری بات کہہ دیں کہ ہم نے تو اللہ کے آگے سراطاعت خم کر دیا ہے۔ ہم نے ایک راستہ اختیار کر لیا ہے۔ تم جدھر جانا چاہتے ہو جاؤ‘ جس پگڈنڈی پر مڑنا چاہتے ہو مڑ جاؤ‘ جس کھائی میں گرنا چاہتے ہو گر جاؤ۔  لَـکُمْ دِیْنُـکُمْ وَلِیَ دِیْنِ.  (الکافرون) ۔

      وَقُلْ لِّلَّذِیْنَ اُوْتُوا الْکِتٰبَ وَالْاُمِّيّيْنَ ءَاَسْلَمْتُمْ:  «اور (اے نبی !)  آپ کہہ دیجیے اُن سے بھی کہ جنہیں کتاب دی گئی تھی (یعنی یہود اور نصاریٰ)  اور اُمّییّن سے بھی کہ کیا تم بھی اسی طرح اسلام لاتے ہو؟»

       کیا تم بھی سرتسلیم خم کرتے ہو یا نہیں؟ تابع ہوتے ہو یا نہیں؟ اپنے آپ کو اللہ کے سپرد کرتے ہویا نہیں؟

       فَاِنْ اَسْلَمُوْا فَقَدِ اہْتَدَوْا:  «پس اگر وہ بھی اسی طرح اسلام لے آئیں تو ہدایت پر ہو جائیں گے۔»

       وَاِنْ تَوَلَّوْا فَاِنَّمَا عَلَیْکَ الْبَلٰغُ:  «اور اگر وہ منہ موڑ لیں تو (اے نبی!)  آپ پر ذمہ داری صرف پہنچا دینے کی ہے۔»

       آپ نے ہمارا پیغام ان تک پہنچا دیا‘ ہماری دعوت اُن تک پہنچا دی‘ ہماری آیات انہیں پڑھ کر سنا دیں‘ اب قبول کرنا یا نہ کرنا ان کا اپنا اختیار (choice) ہے۔ آپ پر ذمہ داری نہیں ہے کہ یہ لوگ ایمان کیوں نہیں لائے۔ سورۃ البقرۃ میں ہم یہ الفاظ پڑھ آئے ہیں:  وَلَا تُسْئَلُ عَنْ اَصْحٰبِ الْجَحِیْمِ ۔

       وَاللّٰہُ بَصِیْرٌم بِالْعِبَادِ:  «اوراللہ اپنے بندوں کے حال کو دیکھ رہا ہے۔»

       وہ اُن سے حساب کتاب کر لے گا اور ان سے نمٹ لے گا۔ آپ کے ذمہ جو فرض ہے آپ اُس کو ادا کرتے رہیے۔

آیت 67:    یٰٓــاَیـُّـہَا الرَّسُوْلُ بَـلِّـغْ مَـآ اُنْزِلَ اِلَـیْکَ مِنْ رَّبِّکَ:  ،،اے رسول پہنچا دیجیے جو کچھ نازل کیا گیا ہے آپ کی طرف آپ کے رب کی جانب سے۔ ،،

             وَاِنْ لَّـمْ تَفْعَلْ فَمَا بَلَّغْتَ رِسَالَـتَہ:   ،،اور اگر (بالفرض)  آپ نے ایسا نہ کیا تو گویا آپ نے اُس کی رسالت کا حق ادا نہیں  کیا۔ ،،

            اپنے مضمون کے اعتبار سے یہ بہت سخت آیت ہے۔  اس سے یہ بھی پتا چلتا ہے کہ اگر وحی میں  کہیں  رسول اللہ پر تنقید نازل ہوئی ہے تو وہ بھی قرآن میں  جوں  کی توں  موجود ہے۔  ایسا ہرگز نہیں  کہ ایسی چیزوں  کو چھپا لیا گیا ہو۔  تیسویں  پارے میں  سورۃ عبس کی ابتدائی آیات:  عَبَسَ وَتَوَلّٰیٓ  اَنْ جَآء ہُ الْاَعْمٰی.  بھی ویسے ہی موجود ہیں جیسے نازل ہوئی تھیں۔   سورہ آل عمران میں بھی ہم پڑھ کر آئے ہیں  کہ حضور کو مخاطب کرکے فرمایا گیا:  لَــیْسَ لَکَ مِنَ الْاَمْرِشَیْئٌ… .   (آیت: 128)۔ اس طرح کی آیات اپنی جگہ پرمن وعن موجود ہیں ،  اوریہ قرآن کے محفوظ من اللہ  ہونے پر حجت ہیں ۔  آیت زیر نظر میں  تنبیہہ کی جا رہی ہے کہ وحی ٔالٰہی میں  سے کوئی چیز کسی وجہ سے پہنچنے سے رہ نہ جائے۔  لوگوں  کے خوف سے یا اپنی کسی مصلحت کی وجہ سے بالفرض اگر ایسا ہوا تو گویا آپ فریضہ ٔرسالت کی ادائیگی میں  کوتاہی کا ثبوت دیں  گے۔  اَلْعَبْدُ عَبْدٌ وَاِنْ تَرَقّٰی،  وَالرَّبُّ رَبٌّ وَاِنْ تَـنَزَّل!

             وَاللّٰہُ یَعْصِمُکَ مِنَ النَّاسِ:   ،،اور اللہ آپ کی حفاظت کرے گا لوگوں  سے۔ ،،

            آپ کو لوگوں  سے ڈرنے کی کوئی ضرورت نہیں ۔

             اِنَّ اللّٰہَ لاَ یَہْدِی الْقَوْمَ الْکٰفِرِیْنَ:  ،،یقینا اللہ کافروں  کو راہ یاب نہیں  کرتا۔ ،،

آیت 92:   وَاَطِیْعُوا اللّٰہَ وَاَطِیْعُوا الرَّسُوْلَ وَاحْذَرُوْا:  ،،اور اطاعت کرو اللہ کی اور اطاعت کرو رسول کی اور (ان کی نافرمانی سے)  بچتے رہو۔ ،،

             فَاِنْ تَوَلَّــیْتُمْ فَاعْلَمُوْٓا اَنَّـمَا عَلٰی رَسُوْلِنَا الْبَلٰغُ الْمُبِیْنُ:  ،،پھر اگر تم پیٹھ موڑ لو گے تو جان لو کہ ہمارے رسول  پر تو ذمہ داری ہے بس صاف صاف پہنچا دینے کی۔ ،،

            یہ اللہ کا حکم ہے۔  اللہ کا حکم پہنچانا رسول کے ذمے تھا،  تو رسول نے پہنچا کر اپنی ذمہ داری ادا کر دی،  اب معاملہ اللہ کا اور تمہارا ہو گا۔  اللہ تم سے نمٹ لے گا،  تم سے حساب لے لے گا۔ 

آیت 99:   مَا عَلَی الرَّسُوْلِ اِلاَّ الْبَلٰغُ:   ،،رسول پر سوائے پہنچا دینے کے اور کوئی ذمہ داری نہیں  ہے۔ ،، ّ

              وَاللّٰہُ یَعْلَمُ مَا تُــبْدُوْنَ وَمَا تَـکْتُمُوْنَ:  ،،اور اللہ جانتا ہے جو کچھ تم ظاہر کرتے ہو اور جو کچھ تم چھپاتے ہو۔ ،،

            جب رسول اللہ  نے پیغام پہنچا دیا تو باقی ساری ذمہ داری اب تمہاری ہے۔ 

 آیت ۴۰:  وَاِنْ مَّا نُرِیَنَّکَ بَعْضَ الَّذِیْ نَعِدُہُمْ اَوْ نَتَوَفَّیَنَّکَ: «اور خواہ ہم دکھا دیں آپ کو اس کا کچھ حصہ جس کی ہم ان کو دھمکی دے رہے ہیں، یا ہم آپ کو وفات دے دیں»

            یعنی یہ بھی ہو سکتا ہے کہ آپ کی زندگی ہی میں ان کو عذاب ِالٰہی میں سے کچھ حصہ مل جائے، اور یہ بھی ہو سکتاہے کہ آپ کی زندگی میں ان پر ایسا وقت نہ آئے، بلکہ عذاب کے ظہور میں آنے سے پہلے ہم آپ کو وفات دے دیں۔

             فَاِنَّمَا عَلَیْکَ الْبَلٰغُ وَعَلَیْنَا الْحِسَابُ: «پس آپ کے ذمہ تو پہنچانا ہی ہے اور ہمارے ذمہ حساب لینا ہے۔»

            آپ پر ہمارا پیغام پہنچانے کی ذمہ داری تھی، سو آپ نے یہ ذمہ داری احسن طریقہ سے ادا کر دی۔ اب اُن کو ہدایت دینا یا نہ دینا، اُن پر عذاب بھیجنا یا نہ بھیجنا اور ان کا حساب لینا، یہ سب کچھ ہمارے ذمے ہے اور ہم یہ فیصلے اپنی مشیت کے مطابق کریں گے۔ 

آیت ۴۸:  فَاِنْ اَعْرَضُوْا فَمَآ اَرْسَلْنٰکَ عَلَیْہِمْ حَفِیْظًا: ’’پھر اگر یہ لوگ اعراض کریں تو (اے نبی !) ہم نے آپ کو ان پر کوئی داروغہ بنا کر نہیں بھیجا۔‘‘

        یعنی اگر یہ لوگ اب بھی اپنے رب کی پکار پر لبیک کہتے ہوئے اقامت دین کی جدوجہد کے لیے کمربستہ نہ ہوں تو ان کی اس کوتاہی کی ذمہ داری آپ ؐپرنہیں ہو گی۔

         اِنْ عَلَیْکَ اِلَّا الْبَلٰغُ: ’’نہیں ہے آپ پر کوئی ذمہ داری مگر صاف صاف پہنچا دینے کی۔‘‘

         وَاِنَّآ اِذَا اَذَقْنَا الْاِنْسَانَ مِنَّا رَحْمَۃً فَرِحَ بِہَا: ’’اور جب ہم انسان کو اپنی رحمت کا کوئی مزہ چکھاتے ہیں تو وہ اس پر اتراتا ہے۔‘‘

         وَاِنْ تُصِبْہُمْ سَیِّئَۃٌم بِمَا قَدَّمَتْ اَیْدِیْہِمْ فَاِنَّ الْاِنْسَانَ کَفُوْرٌ: ’’اور اگر ان پر آ پڑے کوئی برائی ان کے اپنے ہاتھوں کے کرتوتوں کی بدولت تو انسان بالکل نا شکرا بن جاتا ہے۔‘‘