ايامِ حج كا ذكر

آیت 197:    اَلْحَجُّ اَشْہُرٌ مَّعْلُوْمٰتٌ:   حج کے معلوم مہینے ہیں۔   

            یعنی عرب میں جو بھی پہلے سے رواج چلا آ رہا تھا اُس کی توثیق فرما دی گئی کہ واقعی حج کے مواقیت کا تعین اللہ تعالیٰ کی طرف سے ہے۔

             فَمَنْ فَرَضَ فِیْہِنَّ الْحَجَّ:   تو جس نے اپنے اوپر لازم کر لیا ان مہینوں میں حج کو،  

            لازم کرنے سے مراد حج کا عزم اور نیت پختہ کرنا ہے اور اس کی علامت احرام باندھ لینا ہے۔

             فَلاَ رَفَثَ وَلاَ فُسُوْقَ وَلاَ جِدَالَ فِی الْْحَجِّ:   تو (اس کو خبردار رہنا چاہیے کہ) دورانِ حج نہ تو شہوت کی کوئی بات کرنی ہے،  نہ فسق و فجور کی اور نہ لڑائی جھگڑے کی۔   

            زمانہ ٔحج میں جن باتوں سے روکا گیا ہے ان میں اوّلین یہ ہے کہ شہوت کی کوئی بات نہیں ہونی چاہیے۔  میاں بیوی بھی اگر ساتھ حج کر رہے ہوں تو احرام کی حالت میں ان کے لیے وہی قید ہے جو اعتکاف کی حالت میں ہے۔  باقی یہ کہ فسوق و جدال یعنی اللہ کی نافرمانی اور باہم لڑائی جھگڑا تو ویسے ہی نا جائز ہے،  دورانِ حج اس سے خاص طور پر روک دیا گیا۔  اس لیے کہ بہت بڑی تعداد میں لوگوں کا اجتماع ہوتا ہے،  سفر میں بھی لوگ ساتھ ہوتے ہیں۔  اس حالت میں لوگوں کے غصوں ّکے پارے جلدی چڑھ جانے کا امکان ہوتا ہے۔  لہٰذا اس سے خاص طو رپر روکا گیا تاکہ مناسک ِحج کی ادائیگی کے دوران امن اور سکون ہو۔ واقعہ یہ ہے کہ آج بھی یہ بات معجزات میں سے ہے کہ دنیا بھر سے اتنی بڑی تعداد میں لوگوں کے جمع ہونے کے باوجود وہاں امن و سکون رہتا ہے اور جنگ و جدال اور جھگڑا و فساد وغیرہ کہیں نظر نہیں آتا۔  مجھے الحمد للہ پانچ چھ مرتبہ حج کی سعادت حاصل ہوئی ہے،  لیکن وہاں پر جھگڑا اور گالم گلوچ کی کیفیت میں نے کبھی اپنی آنکھوں سے نہیں دیکھی۔  

             وَمَا تَفْعَلُوْا مِنْ خَیْرٍ یَّعْلَمْہُ اللّٰہُ:   اور نیکی کے جو کام بھی تم کرو گے اللہ اس کو جانتا ہے۔   

            حج کے دوران مناسک ِحج پر مستزاد جو بھی نیکی کے کام کر سکو،  مثلاً نوافل پڑھو یا اضافی طواف کرو تو تمہاری یہ نیکیاں اللہ کے علم میں ہوں گی،  کسی اور کو دکھانے کی ضرورت نہیں ہے۔  

             وَتَزَوَّدُوْا فَاِنَّ خَیْرَ الزَّادِ التَّقْوٰی:   اور زادِ راہ ساتھ لے لیا کرو،  یقینا بہترین زادِ راہ تقویٰ ہے۔   

            اس کے دو معنی لیے گئے ہیں ۔ ایک تو یہ کہ بہترین زادِ راہ تقویٰ ہے۔  یعنی سفر ِحج میں مادی زادِ راہ کے علاوہ تقویٰ کی پونجی بھی ضروری ہے۔  اگر آپ نے اخراجاتِ سفر کے لیے روپیہ پیسہ تو وافر لے لیا،  لیکن تقویٰ کی پونجی سے تہی دامن رہے تو دورانِ حج اچھی سہولیات تو حاصل کر لیں گے مگر حج کی روح اور اس کی برکات سے محروم رہیں گے۔

            لیکن اس کا ایک دوسرا مفہوم بھی بہت اہم ہے کہ اگر انسان خود اپنا زادِ راہ ساتھ نہ لے تو پھر وہاں دوسروں سے مانگنا پڑتا ہے۔  اس طرح یہاں « تقویٰ»  سے مراد سوال سے بچنا ہے۔  یعنی بہتر یہ ہے کہ زادِ راہ لے کر چلو تاکہ تمہیں کسی کے سامنے سائل نہ بننا پڑے۔  اگر تم صاحب ِاستطاعت نہیں ہو تو حج تم پر فرض ہی نہیں ہے۔  اور ایک شے جو تم پر فرض نہیں ہے اس کے لیے خواہ مخواہ وہاں جا کر بھیک مانگنا یا یہاں سے بھیک مانگ کر یا چندہ اکٹھا کر کے جانا قطعاً غلط حرکت ہے۔

             وَاتَّقُوْنِ یٰٓــاُولِی الْاَلْبَابِ:   اور میرا ہی تقویٰ اختیار کرو اے ہوش مندو !  

آیت 198:   لَـیْسَ عَلَیْکُمْ جُنَاحٌ اَنْ تَـبْتَغُوْا فَضْلاً مِّنْ رَّبِّکُمْ: «تم پر اس امر میں کوئی گناہ نہیں ہے کہ تم (سفر حج کے دوران) اپنے ربّ کا فضل بھی تلاش کرو۔ »

            آدمی ہندوستان سے یا پاکستان سے حج کے لیے جا رہا ہے اور وہ اپنے ساتھ کچھ ایسی اجناس لے جائے جنہیں وہاں پر بیچ کر کچھ نفع حاصل کر لے تو یہ تقویٰ کے منافی نہیں ہے۔

            فَاِذَآ اَفَضْتُمْ مِّنْ عَرَفٰـتٍ فَاذْکُرُوا اللّٰہَ عِنْدَ الْمَشْعَرِ الْحَرَامِ: «پس جب تم عرفات سے واپس لوٹو تو اللہ کو یاد کرو مشعر ِحرام کے نزدیک۔ »

            وقوفِ عرفات حج کا رکن ِاعظم ہے۔ رسول اللہ کا ارشاد ہے: ((اَلْحَجُّ عَرَفَۃُ)) یعنی اصل حج تو عرفہ ہی ہے۔ اگر کسی سے حج کے باقی تمام مناسک رہ جائیں‘ صرف قیامِ عرفہ میں شمولیت ہو جائے تو اس کا حج ہو گیا‘ باقی جو چیزیں رہ گئی ہیں ان کا کفارہ ادا کیا جائے گا ۔ لیکن اگر کوئی شخص عرفات کے قیام میں ہی شریک نہیں ہوا تو پھر اس کا حج نہیں ہوا۔ ایّامِ حج کا ٹائم ٹیبل نوٹ کیجیے کہ ۸ ذوالحجہ کو مکہ مکرمہ سے نکل کر رات منیٰ میں گزارنا ہوتی ہے۔ اگلا دن ۹ ذوالحجہ یومِ عرفہ ہے۔ اس روز صبح کو عرفات کے لیے قافلے چلتے ہیں اور کوشش یہ ہوتی ہے کہ دوپہر سے پہلے وہاں پہنچ جایا جائے۔ وہاں پر ظہر کے وقت ظہر اور عصر دونوں نمازیں ملا کر پڑھی جاتی ہیں۔ اس کے بعد سے غروبِ آفتاب تک عرفات کا قیام ہے‘ جس میں کوئی نمازنہیں۔ یعنی روایتی عبادت کے سب دروازے بند ہیں۔ اب تو صرف دعا ہے۔ اگر آپ کے اندر دعا کی ایک روح پیدا ہو چکی ہے‘ آپ اپنے ربّ سے ہم کلام ہو سکتے ہیں اور آپ کو حلاوتِ مناجات حاصل ہو گئی ہے تو بس دعا مانگتے رہیے۔ قیامِ عرفہ کے دوران کھڑے ہو کر یا بیٹھے ہوئے‘ جس طرح بھی ہو اللہ سے مناجات کی جائے۔ یا اس میں اگر کسی وجہ سے کمی ہو جائے تو آدمی تلاوت کرے۔ لیکن عام نماز اب کوئی نہیں۔ ۹ ذوالحجہ کو وقوفِ عرفات کے بعد مغرب کی نماز کا وقت ہو چکنے کے بعد عرفات سے روانگی ہے‘ لیکن وہاں مغرب کی نماز پڑھنے کی اجازت نہیں ہے۔ بلکہ اب مزدلفہ میں جا کر مغرب اور عشاء دونوں نمازیں جمع کر کے ادا کرنی ہیں اور رات وہیں کھلے آسمان تلے بسر کرنی ہے۔ یہ مزدلفہ کا قیام ہے۔ مشعر ِحرام ایک پہاڑ کا نام ہے جو مزدلفہ میںواقع ہے۔

            وَاذْکُرُوْہُ کَمَا ہَدٰيکُمْ: «اور یاد کرو اُسے جیسے کہ اُس نے تمہیں ہدایت کی‘ہے۔ »

            یعنی اللہ کا ذکر کرو جس طرح اللہ نے تمہیں اپنے رسول کے ذریعے سکھایا ہے۔ ذکر کے جو طور طریقے رسول اللہ نے سکھائے ہیں انہیں اختیار کرو اور زمانہ ٔجاہلیت کے طریقے ترک کر دو۔

            وَاِنْ کُنْتُمْ مِّنْ قَبْلِہٖ لَمِنَ الضَّآلِّیْنَ : «اور یقینا اس سے پہلے تو تم گمراہ لوگوں میں سے تھے۔ »

            تم حج کی حقیقت سے نا واقف تھے۔ حج کی بس شکل باقی رہ گئی تھی‘ اس کی روح ختم ہو گئی تھی‘ اس کے مناسک میں بھی ردّوبدل کر دیا گیا تھا۔

آیت 199:   ثُمَّ اَفِیْضُوْا مِنْ حَیْثُ اَفَاضَ النَّاسُ : «پھر تم بھی وہیں سے پلٹو جہاں سے سب لوگ پلٹتے ہیں»

            زمانہ ٔ جاہلیت میں قریش ِمکہ ّعرفات تک نہ جاتے تھے۔ ان کا کہنا تھا کہ ہماری خاص حیثیت ہے‘ لہٰذا ہم منیٰ ہی میں مقیم رہیں گے‘ باہر سے آنے والے لوگ عرفات جائیں اور وہاں سے طواف کے لیے واپس لوٹیں‘ یہ سارے مناسک ہمارے لیے نہیں ہیں۔ یہاں فرمایا گیا کہ یہ ایک غلط بات ہے جو تم نے ایجاد کر لی ہے۔ تم بھی وہیں سے طواف کے لیے واپس لوٹو جہاں سے دوسرے لوگ لوٹتے ہیں‘ یعنی عرفات سے۔

            وَاسْتَغْفِرُوا اللّٰہَ : «اور اللہ سے استغفار کرتے رہو۔ »

            اپنی اگلی تقصیر پر نادم ہو اور اللہ سے اپنے گناہوں کی مغفرت چاہو۔

            اِنَّ اللّٰہَ غَفُوْرٌ رَّحِیْم : «یقینا اللہ بخشنے والا رحم فرمانے والا ہے۔ »