قربانى كا جانور بے عيب هو

 آیت ۳۰:  ذٰلِکَ وَمَنْ یُّعَظِّمْ حُرُمٰتِ اللّٰہِ فَہُوَ خَیْرٌ لَّہُ عِنْدَ رَبِّہِ:   «یہ سن چکے! اور جو کوئی تعظیم کرے اللہ کی حرمتوں کی تو وہ اس کے لیے بہتر ہے اس کے رب کے نزدیک۔»

            اللہ نے جس جس چیز کو محترم ٹھہرایا ہے وہ سب «حرمات اللہ» ہیں۔ اس میں خود بیت اللہ اور حرمت والے مہینے بھی شامل ہیں۔ پھر جیسا کہ سورۃ المائدۃ میں ہم پڑھ چکے ہیں کہ قربانی کے جانور جن کی گردنوں میں قلادے ڈالے گئے ہوں وہ بھی اور خود عازمین ِحج: آٰمِّیْنَ الْبَیْتَ الْحَرَامَ: (آیت: ۲) بھی محترم ہیں۔ یہ سب حرمات اللہ ہیں اور ان سب کی تعظیم لازمی ہے۔

            وَاُحِلَّتْ لَکُمُ الْاَنْعَامُ اِلَّا مَا یُتْلٰی عَلَیْکُمْ:   «اور حلال کر دیے گئے تمہارے لیے تمام چوپائے سوائے اس کے جو تمہیں پڑھ کر سنا دیا گیا ہے»

            یعنی خنزیر کے بارے میں واضح طور پر بتا دیا گیا کہ وہ حرام ہے۔ باقی بکری، بھیڑ، گائے، اونٹ وغیرہ کی قربانی دی جا سکتی ہے۔

            فَاجْتَنِبُوا الرِّجْسَ مِنَ الْاَوْثَانِ وَاجْتَنِبُوْا قَوْلَ الزُّوْرِ:   «تو تم بچو بتوں کی گندگی سے اور بچو جھوٹ بات سے۔»

            یعنی شرک سے بچنا تمہاری پہلی ترجیح ہونی چاہیے۔ مکہ میں اس وقت بت پرستی عام تھی جو شرک کی بد ترین شکل ہے۔ 

 آیت ۳۱:  حُنَفَآءَ لِلّٰہِ غَیْرَ مُشْرِکِیْنَ بِہِ:   «یکسُو ہو جاؤ اللہ کے لیے، اس کے ساتھ کسی کو شریک نہ کرتے ہوئے۔»

            اللہ کی بندگی میں کسی اعتبار اور کسی پہلو سے شرک کا شائبہ تک نہ آنے پائے۔ نہ ذات میں، نہ صفات میں، نہ حقوق میں، نہ اختیارات میں۔

            وَمَنْ یُّشْرِکْ بِاللّٰہِ فَکَاَنَّمَا خَرَّ مِنَ السَّمَآءِ:   «اور جو کوئی اللہ کے ساتھ شرک کرے گا تو وہ ایسے ہے جیسے آسمان سے گر پڑا»

            شرک کرنے والے انسان کی مثال ایسے ہے جیسے وہ کسی بلند ی پر رسّی کی مدد سے لٹکا ہوا تھا تو اس کی رسّی کٹ گئی اور وہ یکدم تیزی سے نیچے آ رہا ہے۔

            فَتَخْطَفُہُ الطَّیْرُ اَوْ تَہْوِیْ بِہِ الرِّیْحُ فِیْ مَکَانٍ سَحِیْقٍ:   «تو اسے پرندے اُچک لیں یا ہوا اُڑا پھینکے کسی دور دراز جگہ پر۔»

            تو ایسے شخص کی اب کیفیت یہ ہے یا تو وہ باز اور عقاب جیسے شکاری پرندوں کے رحم و کرم پر ہو گا یا پھر تیز ہوا کا کوئی جھونکا اسے کسی کھائی میں پٹخ دے گا۔ مشرک کا ایسا انجام اس لیے ہوتا ہے کہ اللہ کا دامن چھوڑ کر وہ بے سہارا ہو جاتا ہے، جبکہ توحید پرست شخص ایک مضبوط سہارے پر قائم ہوتا ہے۔ جیسا کہ سورۂ ابراہیم کی آیت: ۲۷ میں فرمایا گیا ہے:  یُثَبِّتُ اللّٰہُ الَّذِیْنَ اٰ مَنُوْا بِالْقَوْلِ الثَّابِتِ فِی الْْحَیٰوۃِ الدُّنْیَا وَفِی الْاٰخِرَۃِ:   «ثابت قدم رکھتا ہے اللہ اہل ِایمان کو قول ِثابت (کلمہ ٔتوحید) کے ساتھ دنیا کی زندگی میں بھی اور آخرت میں بھی۔»

 آیت ۳۲:  ذٰلِکَ وَمَنْ یُّعَظِّمْ شَعَآئِرَ اللّٰہِ فَاِنَّہَا مِنْ تَقْوَی الْقُلُوْبِ:   «یہ سب کچھ (تم نے سن لیا)، اور جو اللہ کے شعائر کی تعظیم کرے گا تو یقینا یہ دلوں کے تقویٰ کی بات ہے۔»

            شعائر کی واحد «شعیرہ» ہے۔ لغوی اعتبار سے اس لفظ کا تعلق «شعور» سے ہے۔ اس مفہوم میں ہر وہ چیز «شعائر اللہ» میں سے ہے جس کے حوالے سے اللہ کی ذات، اس کی صفات اور اس کی بندگی کا شعور انسان کے دل میں پیدا ہو۔ اسی حوالے سے سورۃ البقرۃ میں صفا اور مروہ کو بھی شعائر اللہ کہا گیا ہے: اِنَّ الصَّفَا وَالْمَرْوَۃَ مِنْ شَعَآئِرِ اللّٰہِ: (آیت: ۱۵۸)۔ چنانچہ خود بیت اللہ، مقامِ ابراہیم، صفا اور مروہ سب شعائر اللہ میں شامل ہیں۔

 آیت ۳۳:  لَـکُمْ فِیْہَا مَنَافِعُ اِلٰٓی اَجَلٍ مُّسَمًّی:   «تمہارے لیے ان (قربانی کے جانوروں) میں نفع ہے ایک وقت معین تک»

            یعنی قربانی کے جانوروں سے فائدہ اٹھانے کی اجازت ہے۔ مثلاً ان پر سواری کی جا سکتی ہے، ان کی اون وغیرہ کو استعمال میں لایا جا سکتا ہے، دودھ پیا جا سکتا ہے اور اس طرح کے دوسرے فوائد بھی حاصل کیے جا سکتے ہیں۔

            ثُمَّ مَحِلُّہَآ اِلَی الْبَیْتِ الْعَتِیْقِ:   «پھر ان کی اصل منزل یہ قدیم گھر ہی ہے۔»

            یعنی پھر قربانی کے دن ان جانوروں کو لے جا کر بیت اللہ میں پیش کرنا ہے۔ اصل «مَنْحَر» (قربان گاہ) تو بیت اللہ ہی ہے، مگراسے منیٰ تک وسعت دے دی گئی ہے۔ پرانے زمانے میں قربان گاہ مروہ کی پہاڑی کے پاس ہوا کرتی تھی اور منیٰ کے جس علاقے میں آج کل قربانی کی جاتی ہے وہ بھی دراصل اسی وادی میں شامل ہے جو مروہ سے شروع ہوتی ہے۔ 

 آیت ۳۶:  وَالْبُدْنَ جَعَلْنٰہَا لَکُمْ مِّنْ شَعَآئِرِ اللّٰہِ:   «اور قربانی کے اونٹوں کو ہم نے تمہارے لیے شعائر اللہ میں سے بنایا ہے»

            قربانی کے جانور خاص طور پر اونٹ بھی اللہ کے شعائر میں سے ہیں۔

            لَکُمْ فِیْہَا خَیْرٌ:   «تمہارے لیے ان میں بھلائی ہے»

            کہ ان کا گوشت تم خود بھی کھا تے ہو اور غرباء کو بھی کھلاتے ہو۔

            فَاذْکُرُوا اسْمَ اللّٰہِ عَلَیْہَا صَوَآفَّ:   «تو تم ان پر اللہ کا نام لو انہیں صفوں میں کھڑا کر کے۔»

            صَوَافّ، صافَّۃ کی جمع ہے، یعنی صف میں کھڑے ہوئے۔ یہ اونٹوں کی قربانی کا طریقہ بتایا گیا ہے کہ انہیں قبلہ رو صف بستہ کھڑے کر کے نحر کرو۔ چونکہ اونٹ کو گرا کر ذبح کرنا بہت مشکل ہے، اس لیے کھڑے کھڑے ہی اس کی گردن میں برچھا مارا جاتا ہے۔ اس سے اس کی گردن کی بڑی رگ سے خون کا فوارہ چھوٹتا ہے اورجب زیادہ خون نکل جاتا ہے تو وہ خود بخود نیچے گر پڑتا ہے۔ حدیث میں آتا ہے کہ حجۃ الوداع کے موقع پر حضور نے سو اونٹوں کی قربانی دی تھی، جن میں سے تریسٹھ اونٹوں کو آپ نے اسی طریقے سے خود اپنے دست مبارک سے نحر فرمایا تھا۔ حضور جونہی ایک اونٹ کو برچھا مارتے تھے اگلا اونٹ فوراً اپنی گردن حاضر کر دیتا تھا۔ گویا آپ کے ہاتھوں ذبح ہونا ان کے لیے ایک بہت بڑا عزاز تھا:

نشود نصیب ِدشمن کہ شود ہلاکِ تیغت

سردوستاں سلامت کہ تو خنجر آزمائی!

            یہ شعور انہیں اللہ تعالیٰ کی طرف سے عطا ہوا تھا۔ اونٹ تو پھر جاندار ہے، اللہ تعالیٰ نے تو ایک سوکھی لکڑی کو ایسا شعور عطا فرما دیا تھا کہ وہ حضور کے فراق میں بے قرار ہو کر رونے لگ پڑی تھی۔ یہ ایمان افروز واقعہ احادیث میں تفصیل سے بیان ہوا ہے، جس کا خلاصہ یوں ہے کہ شروع شروع میں مسجد نبوی کے اندر حضور جس جگہ پر کھڑے ہو کر خطبہ دیا کرتے تھے وہاں کھجور کا ایک خشک تنا موجود تھا۔ آپ خطبہ کے لیے کھڑے ہوتے تو اس کے ساتھ ٹیک لگا لیتے۔ بعد میں اس مقصد کے لیے جب منبر بن گیا تو آپ نے اس پر کھڑے ہو کر خطبہ دینا پسند فرمایا۔ لیکن جب آپ پہلے دن منبر پر تشریف فرما ہوئے تو اس خشک لکڑی سے ایسی آوازیں آنا شروع ہو گئیں جیسے کوئی بچہ بلک بلک کر رو رہا ہو۔ یعنی وہ خشک لکڑی اپنی محرومی پر رو رہی تھی کہ آج کے بعد اسے حضور کی معیت نصیب نہیں ہو گی۔ اس روز سے اس کا نام «حنانہ» (رقت والی) پڑ گیا۔ بعد میں اس جگہ پر ایک ستون تعمیر کر دیا گیا، جو «ستونِ حنانہ» سے موسوم ہے۔ مولانا روم نے اپنے اس شعر میں اسی واقعہ کی طرف اشارہ کیا ہے:

فلسفی کو منکرِ حنانہ است

از حواسِ انبیاء  بیگانہ است

کہ فلسفی کو «حنانہ» جیسے معاملہ کی سمجھ نہیں آ سکتی، اس لیے کہ وہ انبیاء کے مقام و مرتبہ سے واقف نہیں ہے۔ وہ تو انبیاء کرام کو بھی عام لوگوں پر ہی قیاس کرتا ہے۔ ایک عقلیت پسند شخص تو ایسے واقعہ کو تسلیم کرنے سے فوراً انکار کر دے گا۔ سر سید احمد خاں بھلا کیسے تسلیم کرتا کہ ایک سوکھی لکڑی سے رونے کی آواز آ سکتی ہے۔ بہر حال پرانے زمانے میں ایسی باتوں کا انکار فلسفی کیا کرتے تھے، آج کل سائنس دان اور عقلیت پرست دانشور ان باتوں کے منکر ہیں۔

            فَاِذَا وَجَبَتْ جُنُوْبُہَا:   «تو جب ان کے پہلو زمین پر ٹک جائیں»

            جب خون بہنے سے اونٹ کمزور ہو جاتا ہے تو پھر وہ ایک طرف کو اپنی کروٹ کے بل زمین پر گر پڑتا ہے۔

            فَکُلُوْا مِنْہَا وَاَطْعِمُوا الْقَانِعَ وَالْمُعْتَرَّ:   «تو اب اس میں سے خود بھی کھاؤ اور قناعت سے بیٹھ رہنے والے اور سوال کرنے والے کو بھی کھلاؤ!»

            ایسے مواقع پر ان سفید پوش ناداروں کو بھی مت بھولو جو اپنی خود داری اور قناعت کے سبب کسی کے آگے دست سوال دراز نہیں کرتے۔ لیکن اس کے ساتھ ساتھ ان محتاجوں کو بھی کھلاؤ جو اپنی محرومی کے ہاتھوں بے قرار ہو کر مانگنے کے لیے آپ کے پاس آ گئے ہیں۔

            کَذٰلِکَ سَخَّرْنٰہَا لَکُمْ لَعَلَّکُمْ تَشْکُرُوْنَ:   «اسی طرح ہم نے ان کو تمہارے لیے مسخر کردیا ہے تا کہ تم شکر ادا کرو۔»

            اونٹ اتنا بڑا جانور ہے مگر اللہ تعالیٰ نے اسے تمہارے لیے اس انداز سے مسخر کر دیا ہے کہ تم اسے برچھا مار کر نحر کر لیتے ہو اور پھر اس کا گوشت کھاتے ہو۔ اس کے لیے تم پر لازم ہے کہ تم اللہ کی نعمتوں کا شکر ادا کیا کرو۔

 آیت ۳۷:  لَنْ یَّنَالَ اللّٰہَ لُحُوْمُہَا وَلَا دِمَآءُٔہَا وَلٰکِنْ یَّنَالُہُ التَّقْوٰی مِنْکُمْ:   «اللہ تک نہ تو ان کے گوشت پہنچتے ہیں اورنہ ان کے خون، لیکن اس تک پہنچتا ہے تمہاری طرف سے تقویٰ۔»

            قربانی کا اصل فلسفہ یہی ہے، بلکہ ہر عبادت کا فلسفہ یہی ہے۔ کسی بھی عبادت کا ایک ظاہری پہلو یا ڈھانچہ ہے اور ایک اس کی روح ہے۔ ظاہری ڈھانچہ اپنی جگہ اہم ہے اور وہ اس لیے ضروری ہے کہ اس کے بغیر اس عبادت کا بجا لانا ممکن نہیں، لیکن یہ ظاہری پیکر اصل دین اور اصل مقصود نہیں ہے۔ کسی بھی عبادت سے اصل مقصود اس کی روح ہے۔ اسی نکتہ کو علامہ اقبال نے ان اشعار میں واضح کیا ہے: 

رہ گئی رسم ِاذاں، روحِ بلالی نہ رہی

 فلسفہ رہ گیا،   تلقین ِغزالی نہ رہی

اور:

نماز   و روزہ   و قربانی   و حج

یہ سب باقی ہیں، تُو باقی نہیں ہے!

چنانچہ قربانی کا اصل مقصود ہمارے دلوں کا تقویٰ اور اخلاص ہے۔ اللہ کے ہاں جو چیز اہم ہے وہ یہ ہے کہ جو شخص قربانی دے رہا ہے وہ اپنی معمول کی زندگی میں اس کی نا فرمانی سے کتنا ڈرتا ہے؟ وہ اپنے روز مرہ کے معمولات میں اللہ کے احکام و قوانین کا کس قدر پابند ہے؟ کس قدر وہ اپنی توانائیاں، اپنی صلاحیتیں اور اپنا مال اللہ کی راہ میں صرف کر رہا ہے؟ کیا قربانی کے جانور کا اہتمام اس نے رزقِ حلال سے کیا ہے؟ اس قربانی کے پیچھے اس کا جذبۂ اطاعت و ایثار کس قدر کارفرما ہے؟ یہ اور اسی نوعیت کی دوسری شرائط جو قربانی کی اصل روح اورتقویٰ کا تعین کرتی ہیں اگر موجود ہیں تو امید رکھنی چاہیے کہ قربانی اللہ کے حضور قابل قبول ہوگی۔ لیکن اگر یہ سب کچھ نہیں تو ٹھیک ہے آپ نے گوشت کھا لیا، کچھ غریبوں کو بھی اس میں سے حصہ مل گیا، اس کے علاوہ شاید قربانی سے اور کچھ فائدہ حاصل نہ ہو۔

            کَذٰلِکَ سَخَّرَہَا لَکُمْ لِتُکَبِّرُوا اللّٰہَ عَلٰی مَا ہَدٰاکُمْ:   «اسی طرح اُس نے انہیں تمہارے لیے مسخر کر دیا ہے تا کہ تم اللہ کی تکبیر کیا کرو اُس ہدایت پر جو اس نے تمہیں بخشی ہے۔»

            مسلمان سال میں دو عیدیں مناتے ہیں۔ ایک عید الفطر ہے جو روزوں کے بعد آتی ہے اور دوسری عید الاضحیٰ جو حج کے ساتھ منسلک ہے۔ اس ضمن میں یہ نکتہ لائق توجہ ہے کہ سورۃ البقرۃ کے ۲۳ ویں رکوع میں روزوں کے ذکر کے بعد بھی بالکل یہی حکم وارد ہوا ہے:  وَلِتُکَبِّرُوا اللّٰہَ عَلٰی مَا ہَدٰاکُمْ وَلَعَلَّکُمْ تَشْکُرُوْنَ:   «تا کہ تم لوگ اللہ کی تکبیر بیان کرو اُس ہدایت پر جس سے اس نے تمہیں سرفراز کیا ہے اور تاکہ تم شکر ادا کیا کرو»۔ یعنی دونوں مواقع پر اللہ کی تکبیر بلند کرتے ہوئے اس کی کبریائی کا اظہار کرنے کی خصوصی ہدایت کی گئی ہے۔ اسی لیے عیدین کی نمازوں کے لیے آتے جاتے تکبیریں پڑھنے کی تاکید احادیث میں ملتی ہے اور عیدین کی نمازوں کے اندر بھی اضافی تکبیریں پڑھی جاتی ہیں۔

            وَبَشِّرِ الْمُحْسِنِیْنَ:   «اور (اے نبی!) محسنین کو بشارت دے دیجیے۔»

            محسنین سے وہ لوگ مراد ہیں جو اسلام، ایمان اور تقویٰ کی منزلیں طے کرتے ہوئے درجۂ احسان تک پہنچنے کی کوشش کرتے ہیں اور اللہ کی توفیق سے اس درجہ کو حاصل کر لیتے ہیں۔ اَللّٰھُمَّ رَبَّنَا اجْعَلْنَا مِنْھُمْ! اَللّٰھُمَّ رَبَّنَا اجْعَلْنَا مِنْھُمْ! اَللّٰھُمَّ رَبَّنَا اجْعَلْنَا مِنْھُمْ! آمین! ثم آمین!