وصيت اور ميراث كے احكام

آیت 180:    کُتِبَ عَلَیْکُمْ اِذَا حَضَرَ اَحَدَکُمُ الْمَوْتُ اِنْ تَرَکَ خَیْرَ الْوَصِیَّۃُ لِلْوَالِدَیْنِ وَالْاَقْرَبِیْنَ بِالْمَعْرُوْفِ:   جب تم میں سے کسی کی موت کا وقت آ پہنچے اور وہ کچھ مال چھوڑ رہا ہو تو تم پر فرض کر دیا گیا ہے والدین اور رشتہ داروں کے حق میں انصاف کے ساتھ وصیت ّکرنا۔   

            ابھی قانونِ وراثت نازل نہیں ہوا تھا،  اس ضمن میں یہ ابتدائی قدم اٹھایا گیا۔  دورِ جاہلیت میں وراثت کی تقسیم اس طرح ہوتی تھی جیسے آج بھی ہندوؤں میں ہوتی ہے،  کہ مرنے والے کی ساری جائیداد کا مالک بڑا بیٹا بن جاتا تھا۔  اس کی بیوی،  بیٹیاں،  حتیٰ کہ دوسرے بیٹے بھی وراثت سے محروم رہتے۔  چنانچہ یہاں وراثت کے بارے میں پہلا حکم دیا گیا کہ مرنے والا والدین اور اقرباء کے بارے میں وصیت کر جائے تاکہ ان کے حقوق کا تحفظ ہو سکے۔  پھر جب سورۃ النساء میں پورا قانونِ وراثت آ گیا تو اب یہ آیت منسوخ شمار ہوتی ہے۔ البتہ اس کے ایک جزو کو رسول اللہ  نے باقی رکھا ہے کہ مرنے والا اپنے ایک تہائی مال کے بارے میں وصیت کر سکتا ہے،  اس سے زیادہ نہیں،  اور یہ کہ جس شخص کا وراثت میں حق مقرر ہو چکا ہے،  اُس کے لیے وصیت نہیں ہوگی۔  وصیت غیر وارث کے لیے ہو گی۔  مرنے والا کسی یتیم کو،  بیوہ کو،  کسی یتیم خانہ کو یا کسی دینی ادارے کو اپنی وراثت میں سے کچھ دینا چاہے تو اسے حق حاصل ہے کہ ایک تہائی کی وصیت کر دے۔  باقی دو تہائی میں لازمی طور پر قانونی وراثت کی تنفیذ ہو گی۔  

             حَقًّا عَلَی الْمُتَّقِیْنَ:    اللہ تعالیٰ کا تقویٰ رکھنے والوں پر یہ حق ہے۔              

            ان پر واجب اور ضروری ہے کہ وہ وصیت کر جائیں کہ ہمارے والدین کو یہ مل جائے،  فلاں رشتہ دار کو یہ مل جائے،  باقی جو بھی ورثاء ہیں ان کے حصے میں یہ آ جائے۔ 

آیت 181:    فَمَنْ بَدَّلَہ بَعْدَ مَا سَمِعَہ:   تو جس نے بدل دیا اس وصیت کو اس کے بعد کہ اس کو سنا تھا،  

             فَاِنَّمَآ اِثْمُہ عَلَی الَّذِیْنَ یُبَدِّلُوْنَہ:   تو اس کا گناہ ان ہی پر آ ئے گا جو اسے تبدیل کرتے ہیں۔   

            وصیت کرنے والا ان کے اس گناہ سے َبری ہے،  اُس نے تو صحیح وصیت کی تھی۔  اگر گواہوں نے بعد میں وصیت میں تحریف اور تبدیلی کی تو اُس کا وبال اور اس کا بوجھ ان ہی پر آئے گا۔

             اِنَّ اللّٰہَ  سَمِیْعٌ عَلِیْمٌ:   یقینا اللہ تعالیٰ سب کچھ سننے والا (اور) جاننے والا ہے۔   

آیت 182:     فَمَنْ خَافَ مِنْ مُّوْصٍ جَنَفًا اَوْ اِثْمًا:   پھر جس کو اندیشہ ہو کسی وصیت کرنے والے کی طرف سے جانب داری یا حق تلفی کا،  

            اگر کسی کو یہ اندیشہ ہو اور دیانت داری کے ساتھ اس کی یہ رائے ہو کہ وصیت کرنے والے نے ٹھیک وصیت نہیں کی،  بلکہ بے جا جانبداری کا مظاہرہ کیا ہے یا کسی کی حق تلفی کر کے گناہ کمایا ہے ۔

             فَاَصْلَحَ بَیْنَہُمْ:   اور وہ ان کے ما بین صلح کرا دے،  

            اس طرح کے اندیشے کے بعد کسی نے ورثاء کو جمع کیا اور ان سے کہا کہ دیکھو!  ان کی وصیت تو یہ تھی  لیکن اس میں یہ زیادتی والی بات ہے،  اگر تم لوگ متفق ہو جاؤ تو اس میں اتنی تبدیلی کر دی جائے؟

             فَلَآ اِثْمَ عَلَیْہِ:   تو اس پر کوئی گناہ نہیں ہے۔   

            یعنی ایسی بات نہیں ہے کہ اس وصیت کو ایسا تقدس حاصل ہو گیا کہ اب اس میں کوئی تبدیلی نہیں ہو سکتی،  بلکہ باہمی مشورے سے اور اصلاح کے جذبے سے وصیت میں تغیر و تبدل ہو سکتا ہے۔   ّ

             اِنَّ اللّٰہَ غَفُوْرٌ رَّحِیْمٌ:    یقینا اللہ تعالیٰ بخشنے والا، رحم فرمانے والا ہے۔   

            اب بیوہ عورتوں کے بارے میں مزید ہدایات آ رہی ہیں۔  

 آیت 240:    وَالَّذِیْنَ یُتَوَفَّوْنَ مِنْکُمْ وَیَذَرُوْنَ اَزْوَاجًا :   «اور جو لوگ تم میں سے وفات دے دیے جائیں اور وہ چھوڑ جائیں بیویاں»

             وَّصِیَّۃً لِاَّزْوَاجِہِمْ مَّتَاعًا اِلَی الْحَوْلِ غَیْرَ اِخْرَاجٍ :   «تو وہ وصیت کر جائیں اپنی بیویوں کے لیے ایک سال تک کے لیے نان نفقہ کی‘ بغیر اس کے کہ انہیں گھروں سے نکالا جائے۔ »

            مثال کے طور پر ایک شخص فوت ہوا ہے اور اس کی چار بیویاں ہیں‘ جن میں سے ایک کے ہاں اولاد ہے‘ جبکہ باقی تین اس اولاد کی سوتیلی مائیں ہیں۔  اب یہ اولاد سگی ماں کو تو اپنی ماں سمجھ کر اس کی خدمت کرے گی اور باقی تین کو خواہ مخواہ کی ذمہ ّداری (liability) سمجھے گی۔  تو فرمایا کہ ایسا نہ ہو کہ ان بیواؤں کو فوراً گھر سے نکال دو‘ کہ جاؤ اپنا راستہ لو‘ جس سے تمہاری شادی تھی وہ تو فوت ہو گیا ‘ بلکہ ایک سال کے لیے انہیں گھر سے نہ نکالا جائے اور ان کا نان نفقہ دیا جائے۔ ان آیات کے نزول تک قانونِ وراثت ابھی نہیں آیا تھا‘ لہٰذا بیواؤں کے بارے میں وصیت کا عبوری حکم دیا گیا‘ جیسا کہ قبل ازیں آیت: 180 میں والدین اور قرابت داروں کے لیے وصیت کا عبوری حکم دیا گیا۔  سورۃ النساء میں قانونِ وراثت نازل ہوا تو اس میں والدین کا حق بھی معین ّکر دیا گیا اور شوہر کی وفات کی صورت میں بیوی کے حق کا اور بیوی کی وفات کی صورت میں شوہر کے حق کا بھی تعین ّکر دیا گیا اور اب والدین و عزیز و اقارب اور بیوگان کے حق میں وصیت کی ہدایات منسوخ ہو گئیں۔

فَاِنْ خَرَجْنَ فَلاَ جُنَاحَ عَلَیْکُمْ فِیْ مَا فَعَلْنَ فِیْ اَنْفُسِہِنَّ مِنْ مَّعْرُوْفٍ :   «پھر اگر وہ عورتیں خود نکل جائیں تو تم پر اس کا کوئی گناہ نہیں جو کچھ وہ اپنے حق میں معروف طریقے پر کریں۔ »

            اگر کوئی عورت عدت گزارنے کے بعد دوسری شادی کر کے کہیں َبسنا چاہے تو تم اسے سال بھر کے لیے روک نہیں سکتے۔  وہ اپنے حق میں معروف طریقے پر جو بھی فیصلہ کریں وہ اس کی مجاز ہیں‘ اس کا کوئی الزام تم پر نہیں آئے گا۔

             وَاللّٰہُ عَزِیْـزٌ حَکِیْمٌ :  «اور یقینا اللہ تعالیٰ زبردست ہے ‘ حکمت والا ہے۔ »

 آیت 7:     لِلرِّجَالِ نَصِیْبٌ مِّمَّا تَرَکَ الْوَالِدٰنِ وَالْاَقْرَبُوْنَ: ’’مردوں کے لیے بھی حصہ ہے اس میں سے جو ترکہ چھوڑا ہو والدین نے اور رشتہ داروں نے‘‘   َ

             وَلِلنِّسَآئِ نَصِیْبٌ مِّمَّا تَرَکَ الْوَالِدٰنِ وَالْاَقْرَبُوْنَ: ’’اور عورتوں کا بھی حصہ ہے اس میں سے جو ترکہ ہے والدین اور رشتہ داروں کا‘‘    ّ

            یہاں اب پہلی مرتبہ عورتوں کو وراثت کا حق دیا جا رہا ہے‘ ورنہ قبل از اسلام عرب معاشرے میں عورت کا کوئی حق وراثت نہیں تھا۔    َ

              مِمَّا قَلَّ مِنْہُ اَوْ کَثُرَ: ’’چاہے وہ وراثت تھوڑی ہو یا زیادہ ہو۔‘‘

            اللہ تعالیٰ کا قانون اس پر ہر صورت میں پوری طرح نافذ ہونا چاہیے۔

               نَصِیْبًا مَّفْرُوْضًا: ’’یہ حصہ ہے (اللہ کی طرف سے) فرض کیا گیا۔‘‘

            آگے آپ دیکھیں گے کہ اس قانونِ وراثت کی کس طرح بار بار تاکید آ رہی ہے۔ ساتھ ہی آپ یہ بھی دیکھتے رہیں کہ ہمارے معاشرے کے اندر اللہ تعالیٰ کے اس حکم کی کس طرح دھجیاں بکھرتی ہیں۔ خاص طور پر ہمارے شمالی علاقے میں ویسے تونماز روزہ کا بہت اہتمام ہوتا ہے‘ لیکن وہاں کے لوگ بیٹیوں کو وراثت میں حصہ دینے کو کسی صورت تیار نہیں ہوتے‘ بلکہ اپنے رواج کی پیروی کرتے ہیں۔ شریعت کی کچھ چیزیں بہت اہم ہیں اور قرآن میں ان کا حکم انتہائی تاکید کے ساتھ آتا ہے۔

 آیت 8:   وَاِذَا حَضَرَ الْقِسْمَۃَ اُولُوا الْقُرْبٰی وَالْیَتٰمٰی وَالْمَسٰکِیْنُ: ’’اور جب حاضر ہوں تقسیم کے وقت قرابت دار اور یتیم اور محتاج‘‘

            جب وراثت کی تقسیم ہو رہی ہو تو اب اگر وہاں کچھ قرابت دار‘ کچھ یتیم اور کچھ محتاج بھی آ جائیں۔

             فَارْزُقُوْہُمْ مِّنْہُ وَقُوْلُوْا لَـہُمْ قَوْلاً مَّعْرُوْفًا: ’’تو انہیں بھی کچھ دے دلا دو اس میں سے اور ان سے معقول انداز میں بات کرو۔‘‘

            وہ دیکھ رہے ہیں کہ اس وقت وراثت تقسیم ہو رہی ہے اور وہ بالکل محتاج ہیں‘ تو ان کے احساسِ محرومیت کا جو بھی مداوا ہو سکتا ہے کرو‘ اور ان سے بڑے اچھے انداز میں بات کرو۔ انہیں جھڑکو نہیں کہ ہماری وراثت تقسیم ہو رہی ہے اور یہاں تم کون آ گئے ہو؟ 

 آیت ۱۱    یُوْصِیْکُمُ اللّٰہُ فِیْ اَوْلاَدِکُمْ: ’’اللہ تعالیٰ تمہیں وصیت کرتا ہے تمہاری اولاد کے بارے میں‘‘   

             لِلذَّکَرِ مِثْلُ حَظِّ الْاُنْـثَـیَیْنِ: ’’کہ لڑکے کے لیے حصہ ہے دو لڑکیوں کے برابر۔‘‘

             فَاِنْ کُنَّ نِسَآءً فَوْقَ اثْـنَـتَـیْنِ فَلَہُنَّ ثُـلُـثَا مَا تَرَکَ: ’’پھر اگر لڑکیاں ہی ہوں (دو یا) دو سے زیادہ تو ان کے لیے ترکے کا دو تہائی ہے۔‘‘

             وَاِنْ کَانَتْ وَاحِدَۃً فَلَہَا النِّصْفُ: ’’اور اگر ایک ہی لڑکی ہے تو اس کے لیے آدھا ہے۔‘‘

            ظاہر ہے اگر ایک ہی بیٹا ہے تو وہ پورے ترکے کا وارث ہو جائے گا ۔لہٰذا جب بیٹی کا حصہ بیٹے سے آدھا ہے تو اگر ایک ہی بیٹی ہے تو اسے آدھی وراثت ملے گی‘ آدھی دوسرے لوگوں کو جائے گی۔ وہ ایک علیحدہ معاملہ ہے۔

             وَلِاَبَوَیْہِ لِکُلِّ وَاحِدٍ مِّنْہُمَا السُّدُسُ مِمَّا تَرَکَ اِنْ کَانَ لَـہ وَلَــدٌ: ’’اور میت کے والدین میں سے ہر ایک کے لیے چھٹا حصہ ہے جو اُس نے چھوڑا اگر میت کے اولاد ہو۔‘‘

            اگر کوئی شخص فوت ہوجائے اور اس کے والدین یا دونوں میں سے کوئی ایک زندہ ہو تو اس کی وراثت میں سے ان کا بھی معین حصہ ہے۔ اگر وفات پانے والا شخص صاحب اولاد ہے تو اس کے والدین میں سے ہر ایک کے لیے وراثت میں چھٹا حصہ ہے۔ یعنی میت کے ترکے میں سے ایک تہائی والدین کو چلا جائے گا اور دو تہائی اولاد میں تقسیم ہو گا۔   ّ

             فَاِنْ لَّـمْ یَکُنْ لَّــہ وَلَــدٌ وَّوَرِثَہ اَبَوٰہُ فَلاُِمِّہِ الثُّلُثُ: ’’اور اگر اُس کے اولاد نہ ہو اور اُس کے وارث ماں باپ ہی ہوں تو اُس کی ماں کا ایک تہائی ہے۔‘‘

            اگر کوئی شخص لاولد فوت ہو جائے تو اس کے ترکے میں سے اس کی ماں کو ایک تہائی اور باپ کو دو تہائی ملے گا۔ یعنی باپ کا حصہ ماں سے دوگنا ہو جائے گا۔

             فَاِنْ کَانَ لَـہ اِخْوَۃٌ فَلاُِمِّـہِ السُّدُسُ: ’’پھر اگر میت کے بہن بھائی ہوں تو اس کی ماں کا چھٹا حصہ ہے‘‘   

            اگر مرنے والا بے اولاد ہو لیکن اس کے بہن بھائی ہوں تو اس صورت میں ماں کا حصہ مزید کم ہو کر ایک تہائی کے بجائے چھٹا حصہ رہ جائے گا اور باقی باپ کو ملے گا‘ لیکن بہن بھائیوں کو کچھ نہ ملے گا۔ وہ باپ کی طرف سے وراثت کے حق دار ہوں گے۔ لیکن ساتھ ہی فرما دیا:

             مِنْ بَعْدِ وَصِیَّۃٍ یُّوْصِیْ بِہَـآ اَوْ دَیْنٍ: ’’بعد اس وصیت کی تعمیل کے جو وہ کر جائے یا بعد ادائے قرض کے۔‘‘

            وراثت کی تقسیم سے پہلے دو کام کر لینے ضروری ہیں۔ ایک یہ کہ اگر اس شخص کے ذمے کوئی قرض ہے تو وہ ادا کیا جائے۔ اور دوسرے یہ کہ اگر اُس نے کوئی وصیت کی ہے تو اس کو پورا کیا جائے۔پھر وراثت تقسیم ہو گی۔

             اٰبَــآؤُکُمْ وَاَبْـنَــآؤُکُمْ لاَ تَدْرُوْنَ اَیُّـہُـمْ اَقْرَبُ لَــکُمْ نَفْعًا: ’’تمہارے باپ اور تمہارے بیٹے‘ تم نہیں جانتے کہ ان میں سے کون تمہارے لیے زیادہ نافع ہے۔‘‘

              فَرِیْضَۃً مِّنَ اللّٰہِ:  ’’یہ اللہ کی طرف سے مقرر کیا ہوا فریضہ ہے۔‘‘

            تم اپنی عقلوں کو چھوڑو اور اللہ کی طرف سے مقرر کردہ حصوں کے مطابق وراثت تقسیم کرو۔ کوئی آدمی یہ سمجھے کہ میرے بوڑھے والدین ہیں‘ میری وراثت میں خواہ مخواہ ان کے لیے حصہ کیوں رکھ دیا گیا ہے؟ یہ تو کھاپی‘چکے‘ زندگی گزار چکے‘ وراثت تو اب میری اولاد ہی کو ملنی چاہیے‘ تو یہ سوچ بالکل غلط ہے۔ تمہیں بس اللہ کا حکم مانناہے۔

             اِنَّ اللّٰہَ کَانَ عَلِیْمًا حَکِیْمًا:  ’’یقینا اللہ تعالیٰ علم و حکمت والا ہے۔‘‘

            اس کا کوئی حکم علم اور حکمت سے خالی نہیں ہے۔ 

 آیت 12:    وَلَــکُمْ نِصْفُ مَا تَرَکَ اَزْوَاجُکُمْ اِنْ لَّــمْ یَکُنْ لَّـہُنَّ وَلَــدٌ: ’’اور تمہارا حصہ تمہاری بیویوں کے ترکے میں سے آدھا ہے اگر ان کے کوئی اولاد نہ ہو۔‘‘

            بیوی فوت ہو گئی ہے اور اس کے کوئی اولاد نہیں ہے تو جو وہ چھوڑ گئی ہے اس میں سے نصف شوہر کا ہو جائے گا۔ باقی جو نصف ہے وہ مرحومہ کے والدین اور بہن بھائیوں میں حسب قاعدہ تقسیم ہو گا۔   ِ

             فَاِنْ کَانَ لَہُنَّ وَلَــدٌ فَـلَـکُمُ الرُّبُعُ مِمَّا تَرَکْنَ: ’’اور اگر اُن کے اولاد ہے تو تمہارے لیے چوتھائی ہے اس میں سے جو انہوں نے چھوڑا‘‘

             مِنْ بَعْدِ وَصِیَّۃٍ یُّوْصِیْنَ بِہَـآ اَوْ دَیْنٍ: ’’بعد اُس وصیت کی تعمیل کے جو وہ کر جائیں یا بعد ادائے قرض کے۔‘‘    ّ

            اگر مرنے والی نے اولاد چھوڑی ہو تو موجودہ شوہر کو مرحومہ کے مال سے ادائے دَین و انفاذِ وصیت کے بعد کل مال کا چوتھائی حصہ ملے گا اور باقی تین چوتھائی دوسرے ورثاء میں تقسیم ہو گا۔

             وَلَہُنَّ الرُّبُعُ مِمَّا تَرَکْتُمْ اِنْ لَّـمْ یَکُنْ لَّــکُمْ وَلَــدٌ: ’’اور ان کے لیے چوتھائی ہے تمہارے ترکے کا اگر تمہارے اولاد نہیں ہے۔‘‘

             فَاِنْ کَانَ لَــکُمْ وَلَـدٌ فَلَہُنَّ الثُّمُنُ مِمَّا تَرَکْتُمْ: ’’اور اگر تمہارے اولاد ہے تو ان کے لیے آٹھواں حصہ ہے تمہارے ترکے میں سے‘‘

              مِّنْ بَعْدِ وَصِیَّۃٍ تُوْصُوْنَ بِہَآ اَوْ دَیْنٍ: ’’اُس وصیت کی تعمیل کے بعد جو تم نے کی ہو یا قرض ادا کرنے کے بعد۔‘‘     ّ

            اگر مرنے والے نے کوئی اولاد نہیں چھوڑی تو ادائے دَین و انفاذِ وصیت کے بعد اس کی بیوی کو اُس کے ترکے کا چوتھائی ملے گا‘ اور اگر اُس نے کوئی اولاد چھوڑی ہے تو اس صورت میں بعد ادائے دَین و وصیت کے بیوی کو آٹھواں حصہ ملے گا۔ اگر بیوی ایک سے زائد ہے تو بھی مذکورہ حصہ سب بیویوں میں تقسیم ہو جائے گا۔

             وَاِنْ کَانَ رَجُلٌ یُّوْرَثُ کَلٰلَۃً اَوِ امْرَاَۃٌ: ’’اور اگر کوئی شخص جس کی وراثت تقسیم ہو رہی ہے کلالہ ہو‘ یا عورت ہو ایسی ہی‘‘

            ’’کلالہ‘‘ وہ مرد یا عورت ہے جس کے نہ تو والدین زندہ ہوں اور نہ اس کی کوئی اولاد ہو۔

             وَّلَـہ اَخٌ اَوْ اُخْتٌ فَلِکُلِّ وَاحِدٍ مِّنْہُمَا السُّدُسُ: ’’اور اُس کا ایک بھائی یا ایک بہن ہو تو ان میں سے ہر ایک کے لیے چھٹا حصہ ہے۔‘‘

             فَاِنْ کَانُوْآ اَکْثَرَ مِنْ ذٰلِکَ فَہُمْ شُرَکَآءُ فِی الثُّلُثِ: ’’اور اگر وہ اس سے زیادہ ہوں تو وہ سب ایک تہائی میں شریک ہوں گے‘‘

            ّ مفسرین کا اجماع ہے کہ یہاں کلالہ کی میراث کے حکم میں بھائی اور بہنوں سے مراد اَخیافی (ماں شریک) بھائی اور بہن ہیں۔ رہے عینی اور علاتی بھائی بہن تو ان کا حکم اسی سورت کے آخر میں ارشاد ہوا ہے۔ عربوں میں دراصل تین قسم کے بہن بھائی ہوتے ہیں۔ ایک ’’عینی‘‘ جن کا باپ بھی مشترک ہو اور ماں بھی‘ جنہیں ہمارے ہاں ’’حقیقی‘‘ کہتے ہیں۔ دوسرے ’’علاتی‘‘ بہن بھائی‘ جن کا باپ ایک اور مائیں جدا ہوں۔ اہل عرب کے ہاں یہ بھی حقیقی بہن بھائی ہوتے ہیں اور ان کا حکم وہی ہے جو ’’عینی‘‘ بہن بھائیوں کا ہے، وہ انہیں ’’سوتیلا‘‘ نہیں سمجھتے۔ ان کے ہاں سوتیلا وہ کہلاتا ہے جو ایک ماں سے ہو لیکن اس کا باپ دوسرا ہو۔ یہ ’’اَخیافی‘‘ بہن بھائی کہلاتے ہیں۔ ایک شخص کی اولاد تھی‘ وہ فوت ہو گیا۔ اس کے بعد اس کی بیوی نے دوسری شادی کر لی۔ تو اب اس دوسرے خاوند سے جو اولاد ہے وہ پہلے خاوند کی اولاد کے اَخیافی بہن بھائی ہیں۔ تو کلالہ کی میراث کے حکم میں یہاں اَخیافی بھائی بہن مراد ہیں۔

             مِنْ بَعْدِ وَصِیَّۃٍ یُّوْصٰی بِہَـآ اَوْ دَیْنٍ: ’’اس وصیت کی تعمیل کے بعد جو کی گئی یا ادائے قرض کے بعد‘‘

            یہ دو شرطیں بہرصورت باقی رہیں گی۔ مرنے والے کے ذمے اگر کوئی قرض ہے تو پہلے وہ ادا کیا جائے گا‘ پھر اس کی وصیت کی تعمیل کی جائے گی‘ اس کے بعد میراث وارثوں میں تقسیم کی جائے گی۔

              غَیْرَ مُضَآرٍّ: ’’بغیر کسی کو ضرر پہنچائے۔‘‘

            یہ سارا کام ایسے ہونا چاہیے کہ کسی کو ضرر پہنچانے کی نیت نہ ہو۔

             وَصِیَّۃً مِّنَ اللّٰہِ: ’’یہ تاکید ہے اللہ کی طرف سے۔‘‘

             وَاللّٰہُ عَلِیْمٌ حَلِیْمٌ:’’اور اللہ تعالیٰ سب کچھ جاننے والا کمالِ حلم والاہے۔‘‘

            ّاُس کے حلم اور بردباری پر دھوکہ نہ کھاؤ کہ وہ تمہیں پکڑ نہیں رہا ہے۔ ع 

’’نہ جا ا ُس کے تحمل پر کہ ہے بے ڈھب گرفت اُس کی!‘‘

اُس کی پکڑ جب آئے گی تو اس سے بچنا ممکن نہیں ہو گا: اِنَّ بَطْشَ رَبِّکَ لَشَدِیْدٌ:  (البروج)  ’’یقینا تمہارے رب کی پکڑ بڑی سخت ہے۔‘‘

 آیت 33:  وَلِکُلٍّ جَعَلْنَا مَوَالِیَ مِمَّا تَرَکَ الْوَالِدٰنِ وَالْاَقْرَبُوْنَ: ’’اور ہر ایک کے لیے ہم نے وارث مقرر کر دیے ہیں جو بھی والدین اور رشتہ دار چھوڑیں۔‘‘

            قانونِ وراثت کی اہمیت کو دیکھئے کہ اب آخر میں ایک مرتبہ پھر اس کا ذکر فرمایا۔

             وَالَّذِیْنَ عَقَدَتْ اَیْمَانُکُمْ فَاٰتُوْہُمْ نَصِیْبَہُمْ: ’’اور جن کے ساتھ تمہارے عہد و پیمان ہوں تو ان کو ان کا حصہ دو۔‘‘    ّ

            ایک نیا مسئلہ یہ پیدا ہو گیا تھا کہ جن لوگوں کے ساتھ دوستی اور بھائی چارہ ہے یا مواخات کا رشتہ ہے (مدینہ منورہ میں رسول اللہ  نے ایک انصاری اور ایک مہاجر کو بھائی بھائی بنا دیا تھا) تو کیا ان کا وراثت میں بھی حصہ ہے؟ اس آیت میں فرمایا گیا کہ وراثت تو اُسی قاعدہ کے مطابق ورثاء میں تقسیم ہونی چاہیے جو ہم نے مقرر کر دیا ہے۔ جن لوگوں کے ساتھ تمہارے دوستی اور بھائی چارے کے عہد و پیمان ہیں‘ یاجو منہ بولے بھائی یا بیٹے ہیں ان کا وراثت میں کوئی حصہ نہیں ہے‘ البتہ اپنی زندگی میں ان کے ساتھ جو بھلائی کرنا چاہو کر سکتے ہو‘ انہیں جو کچھ دینا چاہو دے سکتے ہو‘ اپنی وراثت میں سے بھی کچھ وصیت کرنا چاہو تو کر سکتے ہو۔ لیکن جو قانونِ وراثت طے ہو گیا ہے اُس میں کسی ترمیم و تبدیلی کی گنجائش نہیں۔وراثت میں حق دار کوئی اور نہیں ہوگا سوائے اُس کے جس کو اللہ نے مقرر کر دیا ہے۔

             اِنَّ اللّٰہَ کَانَ عَلٰی کُلِّ شَیْئٍ شَہِیْدًا: ’’یقینا اللہ تعالیٰ ہر چیز پر گواہ ہے۔‘‘ 

            اس آخری آیت میں پھر ایک استفتاء ہے۔ آیت: 12 میں قانونِ وراثت کے ضمن میں ایک لفظ آیا تھا کلالہ‘ یعنی وہ مرد یا عورت جس کے نہ تو والدین زندہ ہوں اور نہ اس کی کوئی اولاد ہو۔ اس کے بارے میں بتایا گیا تھا کہ اگر اُس کے  بہن بھائی ہوں تو اس کی وراثت کا حکم یہ ہے۔ لیکن وہ حکم لوگوں پر واضح نہیں ہو سکا تھا۔ لہٰذا یہاں اس حکم کی مزید وضاحت کی گئی ہے۔ آیت: 12 کے حکم کو صرف اَخیافی بہن بھائیوں کے ساتھ مخصوص مان لینے کے بعد اس توضیحی حکم میں کلالہ کی وراثت کا ہر پہلو واضح ہو جاتا ہے۔

آیت 176:   یَسْتَفْتُوْنَکَ قُلِ اللّٰہُ یُـفْتِیْکُمْ فِی الْْکَلٰلَۃِ: ’’(اے نبی) یہ آپ سے فتوی مانگ رہے ہیں۔ کہو کہ اللہ تمہیں کلالہ کے بارے میں فتویٰ دے رہا ہے۔‘‘

             اِنِ امْرُؤٌ ہَلَکَ لَیْسَ لَہ وَلَـدٌ وَّلَــہٓ اُخْتٌ فَلَہَا نِصْفُ مَا تَرَکَ: ’’ اگر کوئی شخص فوت ہو گیا اور اس کی کوئی اولاد نہیں (اور نہ ماں باپ ہیں) اور اس کی صرف ایک بہن ہے تو اس کے لیے اس کے ترکے میں سے نصف ہے۔‘‘

            ایسی صورت میں اس کی بہن ایسے ہی ہے جیسے ایک بیٹی ہو تو اسے ترکے میں سے آدھا حصہ ملے گا۔

             وَہُوَ یَرِثُہَآ اِنْ لَّمْ یَکُنْ لَّہَا وَلَـدٌ: ’’اور وہ مرد (بھائی) اس (بہن) کا مکمل وارث ہو گا اگر اس (بہن) کی کوئی اولاد نہیں۔‘‘

            یعنی اگر کلالہ عورت تھی جس کی کوئی اولاد نہیں‘ کوئی والدین نہیں تو اس کا وارث اس کا بھائی بن جائے گا‘ اس کی پوری وراثت اس کے بھائی کو چلی جائے گی۔

             فَاِنْ کَانَتَا اثْنَتَـیْنِ فَلَہُمَا الثُّلُثٰنِ مِمَّا تَرَکَ:  ’’پھر اگر دو (یا دو سے زیادہ) بہنیں ہوں تو وہ ترکے میں سے دو تہائی کی حق دار ہوں گی۔‘‘

             وَاِنْ کَانُوْٓا اِخْوَۃً  رِّجَالاً وَّنِسَآءًا فَلِلذَّکَرِ مِثْلُ حَظِّ الْاُنْثَـیَیْنِ:  ’’اور اگر کئی بہن بھائی ہوں تو ایک مرد کے لیے دو عورتوں کے برابر حصہ ہو گا۔‘‘

            یعنی بھائی کو بہن سے دوگنا ملے گا۔ البتہ یہ بات اہم ہے کہ آیت: 12 میں جو حکم دیا گیا تھا وہ اَخیافی بہن بھائیوں کے بارے میں تھا۔ یعنی ایسے بہن بھائی جن کی ماں ایک ہو اور باپ علیحدہ علیحدہ ہوں۔ اُس زمانے کے عرب معاشرے میں تعد ّدِ ازواج کے عام رواج کی وجہ سے ایسے مسائل معمولات کا حصہ تھے۔ باقی عینی یاعلاتی بہن بھائیوں (جن کے ماں اور باپ ایک ہی ہوں یا مائیں الگ الگ ہوں اور باپ ایک ہی ہو) کا وہی عام قانون ہو گا جو بیٹے اور بیٹی کا ہے۔ جس نسبت سے بیٹے اور بیٹی میں وراثت تقسیم ہوتی ہے ایسے ہی ان بہن بھائیوں میں ہو گی۔

             یُـبَـیِّنُ اللّٰہُ لَـکُمْ اَنْ تَضِلُّوْا وَاللّٰہُ بِکُلِّ شَیْئٍ عَلِیْمٌ:  ’’اللہ واضح کیے دیتا ہے تمہارے لیے مبادا کہ تم گمراہ ہو جاؤ‘ اور اللہ ہر چیز کا علم رکھنے والا ہے۔‘‘

            تعارفِ قرآن کے دوران میں نے بتایا تھا کہ قرآن حکیم کی ایک تقسیم سات احزاب یا منزلوں کی ہے۔ اس اعتبار سے سورۃ النساء پر پہلی منزل ختم ہو گئی ہے۔  فالحمد للّٰہ علی ذٰلک!

آیت 106:   یٰٓـاَیـُّـہَا الَّذِیْنَ اٰمَنُوْا شَہَادَۃُ بَیْنِکُمْ اِذَا حَضَرَ اَحَدَکُمُ الْمَوْتُ حِیْنَ الْوَصِیَّۃِ اثْنٰنِ ذَوَا عَدْلٍ مِّنْکُمْ :  ،،اے اہل ِایمان،  تمہارے درمیان شہادت (کا نصاب)  ہے جبکہ تم میں  سے کسی کو موت آ جائے اور وہ وصیّت کر رہا ہو،  تو تم میں  سے دو معتبر اشخاص (بطور گواہ)  موجود ہوں ،،

            یعنی موت سے قبل وصیت کے وقت اپنے لوگوں  میں  سے دو گواہ (مرد)  مقرر کر لو۔  واضح رہے کہ وصیت کل ترکے کے ایک تہائی حصے سے زیادہ کی نہیں  ہو سکتی۔  اگر جائیداد زیادہ ہے تو اس کا ایک تہائی حصہ بھی خاصا زیادہ ہو سکتا ہے۔   ُ

             اَوْ اٰخَرٰنِ مِنْ غَیْرِکُمْ اِنْ اَنْتُمْ ضَرَبْتُمْ فِی الْاَرْضِ فَاَصَابَتْکُمْ مُّصِیْبَۃُ الْمَوْتِ:   ،،یا دوسرے دو آدمی تمہارے غیروں  میں  سے اگر تم زمین میں  سفر پر(نکلے ہوئے)  ہو اور(حالت سفر میں)  تمہیں موت کی مصیبت پیش آ جائے۔ ،،

            یعنی حالت ِسفر میں  اگر کسی کی موت کا وقت آ پہنچے اور وہ وصیت کرنا چاہتا ہو توایسی صورت میں گواہان غیر قوم،  کسی دوسری بستی، کسی دوسری برادری اور دوسرے قبیلے سے بھی مقرر کیے جا سکتے ہیں ، مگر عام حالات میں  اپنی بستی،  اپنے خاندان میں  رہتے ہوئے کوئی شخص انتقال کر رہا ہے تو اسے وصیّت کے وقت اپنے لوگوں ،  رشتہ داروں  اور قرابت داروں  میں  سے ہی دو معتبر آدمیوں  کو گواہ بنانا چاہیے۔

             تَحْبِسُوْنَہُمَا مِنْ بَعْدِ الصَّلٰوۃِ:  ،،تم ان دونوں  گواہوں  کو نماز کے بعد (مسجد میں)  روک لو،،

            یعنی جب وصیت کے بارے میں  متعلقہ لوگ پوچھیں  اور اس میں  کچھ شک کا احتمال ہو تو نماز کے بعد ان دونوں  گواہوں کو مسجد میں  روک لیا جائے۔

             فَـیُـقْسِمٰنِ بِاللّٰہِ  اِنِ ارْتَـبْتُمْ :  ،،پھر وہ دونوں  اللہ کی قسم کھائیں ،  اگرتمہیں  شک ہو،،

            اگر تمہیں  ان کے بارے میں  کوئی شک ہوکہ کہیں  یہ وصیّت کو بدل نہ دیں ،  کہیں  ان سے غلطی نہ ہو جائے تو تم ان سے قسم اٹھوا لو۔  وہ نماز کے بعد مسجد میں  حلف کی بنیاد پر شہادت دیں ،  اور اس طرح کہیں :

             لاَ نَشْتَرِیْ بِہ ثَمَنًا وَّلَــوْ کَانَ ذَا قُرْبٰی:  ،،ہم اس کی کوئی قیمت وصول نہیں  کریں  گے، اگرچہ کوئی قرابت دار ہی کیوں  نہ ہو،،

            یعنی ہم اس شہادت سے نہ تو خود کوئی ناجائز فائدہ اٹھائیں  گے،  نہ کسی کے حق میں  کوئی نا انصافی کریں  گے اور نہ ہی کسی رشتہ دار عزیز کو کوئی نا جائز فائدہ پہنچائیں  گے۔

             وَلاَ نَـکْتُمُ شَہَادَۃَ اللّٰہِ:   ،،اور نہ ہم چھپائیں  گے اللہ کی گواہی کو،،

            غور کریں  گواہی اتنی عظیم شے ہے کہ اسے «شَھَادَۃَ اللّٰہ ِ» کہا گیا ہے، یعنی اللہ کی گواہی،  اللہ کی طرف سے امانت۔

             اِنَّــآ اِذًا لَّمِنَ الْاٰثِمِیْنَ:  ،،اگر ہم ایسا کریں  تو یقینا ہم گنہگاروں  میں  شمار ہوں  گے۔ ،،

آیت 107:   فَاِنْ عُثِرَ عَلٰٓی اَنَّـہُمَا اسْتَحَقَّـآ اِثْمًا:  ،،پھر اگر معلوم ہو جائے کہ ان دونوں  نے (جھوٹ بول کر)  گناہ کمایا ہے،،

            حلفیہ بیان بھی غلط دیا ہے اوروصیّت میں  ترمیم کی ہے،  اس کے باوجود کہ نماز کے بعد مسجد کے اندر حلف اٹھا کر بات کر رہے ہیں ۔ آخر انسان ہیں  اور ہر معاشرے میں  ہر طرح کے انسان ہر وقت موجود رہتے ہیں ۔

             فَاٰخَرٰنِ یَـقُوْمٰنِ مَقَامَہُمَا:  ،،تو اب دو اور لوگ ان کی جگہ پر کھڑے ہوں ،،

             مِنَ الَّذِیْنَ اسْتَحَقَّ عَلَیْہِمُ الْاَوْلَیٰنِ:   ،،ان لوگوں  میں  سے جن کی حق تلفی کی ہے ان پہلے دو لوگوں  نے،،

             اب وہ کھڑے ہو کر کہیں  گے کہ یہ لوگ ہمارا حق تلف کر رہے ہیں، انہوں  نے وصیت کے اندر خیانت کی، ہے۔   ّ

             فَیُقْسِمٰنِ بِاللّٰہِ لَشَہَادَتُـنَـآ اَحَقُّ مِنْ شَہَادَتِہِمَا:  ،،پس وہ دونوں  اللہ کی قسم کھائیں کہ ہماری گواہی زیادہ برحق ہے ان دونوں کی گواہی سے،،

             وَمَا اعْتَدَیْنَـآ اِنَّــآ اِذًا لَّمِنَ الظّٰلِمِیْنَ:   ،،اور ہم نے کوئی زیادتی نہیں  کی ہے،  اگر ایسا ہو تو یقینا ہم ظالموں  میں  سے ہوں  گے۔ ،،

آیت 108:   ذٰلِکَ اَدْنٰٓی اَنْ یَّـاْتُوْا بِالشَّہَادَۃِ عَلٰی وَجْہِہَآ:  ،،یہ طریقہ کار قریب تر ہے کہ اس سے لوگ ٹھیک ٹھیک شہادت پیش کریں ،،

             اَوْ یَخَافُوْٓا اَنْ تُرَدَّ اَیْمَانٌ بَعْدَ اَیْمَانِہِمْ:   ،،یا (کم از کم) انہیں  خوف رہے کہ ہماری قسمیں  ان کی قسموں  کے بعد رد کر دی جائیں  گی۔ ،،

            کیونکہ انہیں  معلوم ہو گا کہ اگرہم نے جھوٹی قسم کھا بھی لی،  اور پھر اگر دوسرا فریق بھی قسم کھا گیا، تو ہمارا منصوبہ کامیاب نہیں  ہوگا۔ لہٰذا وہ اس کی ہمت نہیں  کریں  گے۔

             وَاتَّـقُوا اللّٰہَ وَاسْمَعُوْا:   ،،اور اللہ کا تقویٰ اختیار کرو اور سن رکھو۔ ،،

             وَاللّٰہُ لاَ یَہْدِی الْقَوْمَ الْفٰسِقِیْنَ:  ،،اللہ ایسے نا فرمانوں  کو ہدایت نہیں  دیتا۔ ،،

            اسی طرح کا معاملہ سورۃ النور (آیات6 تا 9) میں  بھی مذکور ہوا ہے کہ اگر کوئی شخص اپنی بیوی کو بدکاری کرتے ہوئے دیکھے اور اس کے پاس کوئی اور گواہ نہ ہو تو وہ چار مرتبہ قسم کھا کر کہے کہ میں  جو کہہ رہا ہوں  سچ کہہ رہا ہوں۔  تو اُس ایک شخص کی گواہی چار گواہوں  کے برابر ہو جائے گی۔ لیکن پھر اللہ تعالیٰ نے اس کا جواب بھی بتایا ہے، کہ اگر بیوی بھی چار مرتبہ قسم کھا کر کہہ دے کہ یہ جھوٹ بول رہا ہے،  مجھ پر تہمت لگا رہا ہے اور پانچویں  مرتبہ یہ کہے کہ مجھ پر اللہ کا غضب ٹوٹے اگر اس کا الزام درست ہو، تو شوہر کی گواہی ساقط  ہو جائے گی۔  اس طرح دونوں  طرف سے اللہ تعالیٰ نے معاملے کو متوازن کیا ہے۔     

  آیت 75:  وَالَّذِیْنَ اٰمَنُوْا مِنْ بَعْدُ وَہَاجَرُوْا وَجٰہَدُوْا مَعَکُمْ فَاُولٰٓئِکَ مِنْکُمْ: ’’اور جو لوگ بعد میں ایمان لائے اور انہوں نے ہجرت کی اور تمہارے ساتھ مل کر جہاد کیا‘ تو (اے مسلمانو!) وہ تم میں سے ہی ہیں۔‘‘

            وہ تمہاری جماعت‘ اسی اُمت اور حزب اللہ کا حصہ ہیں۔

             وَاُولُوا الْاَرْحَامِ بَعْضُہُمْ اَوْلٰی بِبَعْضٍ فِیْ کِتٰبِ اللّٰہِ: ’’اور رحمی رشتے دار اللہ کے قانون میں ایک دوسرے کے زیادہ حق دار ہیں۔‘‘

            یعنی شریعت کے قوانین میں خون کے رشتے مقدم رکھے گئے ہیں۔ مثلاً وراثت کا قانون خون کے رشتوں کو بنیاد بنا کر ترتیب دیا گیا ہے۔ اسی طرح شریعت کے تمام قواعد و ضوابط میں رحمی رشتوں کی اپنی ایک ترجیحی حیثیت ہے۔ خونی رشتوں کی ان قانونی ترجیحات کو بھائی چارے اور ولایت کے تعلقات کے ساتھ گڈ مڈ نہ کیا جائے۔

             اِنَّ اللّٰہَ بِکُلِّ شَیْئٍ عَلِیْمٌ: ’’یقینا اللہ ہر چیز کا علم رکھتا ہے۔‘‘

****بارک اللّٰہ لی ولکم في القرآن العظیم‘ ونفعني وایاکم بالآیات والذکر الحکیم****