غزوه احد

یہاں سے سوره آل عمران کے نصف ِثانی کے دوسرے حصے کا آغاز ہو رہا ہے ‘ جو چھ رکوعات پر محیط ہے۔ یہ چھ رکوع مسلسل غزوه اُحد کے حالات و واقعات اور ان پر تبصرے پر مشتمل ہیں۔ غزوئہ اُحد شوال 3ھ میں پیش آیا تھا۔ اس سے پہلے رمضان ۲ھ میں غزوئہ بدر پیش آچکا تھا‘ جس کا تذکرہ ہم سورۃ الانفال میں پڑھیں گے۔ اس لیے کہ ترتیب مصحف نہ تو ترتیب زمانی کے اعتبار سے ہے اور نہ ہی ترتیب ِنزولی کے مطابق۔ غزوئہ بدر میں اللہ تعالیٰ نے مسلمانوں کو بہت زبردست فتح دی تھی اور کفارِ مکہ کو بڑی زَک پہنچی تھی۔ ان کے ستر (70) سربرآوردہ لوگ مارے گئے تھے‘ جن میں قریش کے تقریباً سارے بڑے بڑے سردار بھی شامل تھے۔ اہل مکہ کے سینوں میں انتقام کی آگ بھڑک رہی تھی اور ان کے انتقامی جذبات لاوے کی طرح کھول رہے تھے۔ چنانچہ ایک سال کے اندر اندر انہوں نے پوری تیاری کی اور تمام ساز و سامان جو وہ جمع کر سکتے تھے جمع کر لیا۔ ابوجہل غزوئہ بدر میں مارا جا چکا تھا اور اب قریش کے سب سے بڑے سردار ابوسفیان تھے۔ (ابو سفیان چونکہ بعد میں ایمان لے آئے تھے اور صحابیت کے مرتبے سے سرفراز ہوئے تھے لہٰذا ہم ان کا نام احترام سے لیتے ہیں۔) ابو سفیان تین ہزار جنگجوئوں کا لشکر لے کر مدینہ پر چڑھ دوڑے ۔ اہل مکہ اپنی فتح یقینی بنانے کے لیے اس دفعہ اپنے بچوں اور خاص طور پر خواتین کو بھی ساتھ لے کر آئے تھے تاکہ ان کی غیرت بیدار رہے کہ اگر کہیں میدان سے ہمارے قدم اکھڑ گئے تو ہماری عورتیں مسلمانوںکے قبضے میں چلی جائیں گی۔ ابوسفیان کی بیوی ہندہ بنت عتبہ بھی لشکر کے ہمراہ تھی۔ (وہ بھی بعد میں فتح مکہ کے موقع پر ایمان لے آئی تھیں۔) غزوئہ بدر میں ہندہ کا باپ‘ بھائی اور چچا مسلمانوں کے ہاتھوں واصل جہنم ہو چکے تھے‘ لہٰذا اس کے سینے کے اندر بھی انتقام کی آگ بھڑک رہی تھی۔ مکہ کا شاید ہی کوئی گھر بچا ہو جس کا کوئی فرد غزوئہ بدر میں مارا نہ گیا ہو ۔

            اس موقع پر نبی اکرم  نے مدینہ منورہ میں ایک مشاورت منعقد فرمائی کہ اب کیا حکمت عملی اختیار کرنی چاہیے‘جبکہ تین ہزار کا لشکر مدینہ پر چڑھائی کرنے آ رہا ہے۔ رسول اللہ  کا اپنا رجحان اس طرف تھا کہ اس صورت حال میں ہم اگر مدینہ میں محصور ہو کر مقابلہ کریں تو بہتر رہے گا۔ عجیب اتفاق ہے کہ رئیس المنافقین عبداللہ بن اُبی کی بھی یہی رائے تھی ۔ لیکن وہ لوگ جو بدر کے بعد ایمان لائے تھے اور وہ جو غزوئہ بدر میں شریک نہیں ہوپائے تھے ان میں سے خاص طور پر نوجوانوں کی طرف سے خصوصی جوش و خروش کا مظاہرہ ہو رہا تھا کہ ہمیں میدان میں نکل کر دشمن کا ڈٹ کر مقابلہ کرنا چاہیے‘ ہمیں تو شہادت درکار ہے‘ ہمیں آخر مو ت سے کیا ڈر ہے؟  

شہادت ہے مطلوب و مقصودِ مؤمن

نہ مالِ غنیمت نہ کشور کشائی!

چنانچہ رسول اللہ  نے اُن کے جذبات کا لحاظ کرتے ہوئے فیصلہ فرما دیا کہ دشمن کا کھلے میدان میں مقابلہ کیا جائے گا۔ نبی اکرم  نے ایک ہزار کی نفری لے کر مدینہ سے جبل اُحد کی جانب کوچ فرمایا‘ لیکن راستے ہی میں عبداللہ بن اُبی اپنے تین سو آدمیوں کو ساتھ لے کر یہ کہہ کر واپس چلا گیا کہ جب ہمارے مشورے پر عمل نہیں ہوتا اور ہماری بات نہیں مانی جاتی تو ہم خواہ مخواہ اپنی جانیں جوکھوں میں کیوں ڈالیں؟ تین سو منافقین کے چلے جانے کے بعد اسلامی لشکر میں صرف سات سو افراد باقی رہ گئے تھے‘ جن میں کمزور ایمان والے بھی تھے۔ چنانچہ دامن اُحد میں پہنچ کر مدینہ کے دو خاندانوں بنو حارثہ اور بنوسلمہ کے قدم بھی تھوڑی دیر کے لیے ڈگمگائے اور انہوںنے واپس لوٹنا چاہا‘ لیکن پھر اللہ تعالیٰ نے ان کو حوصلہ دیا اور ان کے قدم جما دیے۔

            اس کے بعد جنگ ہوئی تو اللہ کی طرف سے مدد آئی۔ اللہ نے لشکر اسلام کو فتح دے دی اور مشرکین کے قدم اکھڑ گئے۔ نبی اکرم  نے اُحد پہاڑ کو اپنی پشت پر رکھا تھا اور اس کے دامن میں صف بندی کی تھی۔ سامنے دشمن کا لشکر تھا۔ پہاڑ میں ایک درّہ تھا اور حضور  کو اندیشہ تھا کہ ایسا نہ ہو کہ وہاں سے ہم پر حملہ ہو جائے اور ہم دو طرف سے چکی کے دو پاٹوں کے درمیان آجائیں۔ لہٰذا آپ  نے اس درّہ پر حضرت عبداللہ بن جبیر  کی امارت میں پچاس تیر انداز تعینات فرما دیے تھے اور انہیں تاکید فرمائی تھی یہاں سے مت ہلنا۔ چاہے تم دیکھو کہ ہم سب مارے گئے ہیں اور ہمار اگوشت چیلیں اور کوّے نوچ رہے ہیں تب بھی یہ جگہ مت چھوڑنا! لیکن جب مسلمانوں کو فتح ہو گئی تو درّے پر مامور حضرات میں اختلاف ِرائے ہو گیا۔ ان میں سے اکثر نے کہا کہ رسول اللہ  نے ہمیں جو اتنی تاکید فرمائی تھی وہ تو شکست کی صورت میں تھی‘ اب تو فتح ہو گئی ہے‘ لہٰذا اب ہمیں بھی چل کر مالِ غنیمت جمع کرنے میں باقی سب لوگوں کا ساتھ دینا چاہیے۔ حضرت عبداللہ بن جبیر  وہاں کے لوکل کمانڈر تھے‘ وہ انہیں منع کرتے رہے کہ یہاں سے ہرگز مت ہٹو‘ رسول اللہ  کا حکم یاد رکھو۔ لیکن وہ توحضور  کے حکم کی تاویل کر چکے تھے۔ ان میں سے 35 افراد درّہ چھوڑ کر چلے گئے اور صرف 15 باقی رہ گئے۔

            خالد بن ولید (جو اُس وقت تک ایمان نہیں لائے تھے) مشرکین کی گھڑ سوار فوج (cavalry) کے کمانڈر تھے۔ ان کی عقابی نگاہ نے دیکھ لیا کہ وہ درہ خالی ہے۔ ان کی پیدل فوج (infantry) شکست کھا چکی تھی اور بھگدڑ مچ چکی تھی۔ ایسے میں وہ اپنے دو سو گھڑ سواروں کے دستے کے ساتھ اُحد کا چکر کاٹ کر پشت سے اس درے کے راستے مسلمانوں پر حملہ آور ہو گئے۔ درّے پر صرف پندرہ تیر انداز باقی تھے‘ ان کے لیے دو سو گھڑ سواروں کی یلغار کو روکنا ممکن نہیں تھا اور وہ مزاحمت کرتے ہوئے شہید ہو گئے۔ اس اچانک حملے سے یکلخت جنگ کا پانسہ پلٹ گیا اور مسلمانوں کی فتح شکست میں بدل گئی ۔ ستر صحابہ کرام شہید ہو گئے۔ رسول اللہ  خود بھی زخمی ہو گئے۔ َخود کی کڑیاں آپ کے رخسار میں گھس گئیں اور دندانِ مبارک شہید ہو گئے ۔ خون اتنا بہا کہ آپ  پر بے ہوشی طاری ہو گئی ‘ اور یہ بھی مشہور ہو گیا کہ حضور  کا انتقال ہو گیا ہے۔اس سے مسلمانوں کے حوصلے پست ہو گئے ۔ لیکن پھر جب رسول اللہ  نے لوگوں کو پکارا تو لوگ ہمت کر کے جمع ہوئے۔ تب آپ  نے یہ فیصلہ کیا کہ اس وقت پہاڑ پر چڑھ کر بچائو کر لیا جائے ‘اور آپ تمام مسلمانوں کو لے کر کوہِ اُحد پر چڑھ گئے ۔ اس موقع پر ابوسفیان اور خالد بن ولید کے مابین اختلافِ رائے ہو گیا۔ خالد بن ولید کا کہنا تھا کہ ہمیں ان کے پیچھے پہاڑ پر چڑھنا چاہیے اور انہیںختم کر کے ہی دم لینا چاہیے۔ لیکن ابوسفیان بڑے حقیقت پسند اور زیرک شخص تھے۔ انہوں نے کہا کہ نہیں‘ مسلمان اونچائی پر ہیں ‘ وہ اوپر سے پتھر پھینکیں گے اور تیر برسائیں گے تو ہمارے لیے شدید جانی نقصان کا اندیشہ ہے۔ ہم نے بدر کا بدلہ لے لیا ہے‘ یہی بہت ہے۔ چنانچہ مشرکین وہاں سے چلے گئے۔ مطالعۂ آیات سے قبل غزوئہ احد کے سلسلۂ واقعات کا یہ اجمالی خاکہ ذہن میں رہنا چاہیے۔

 آیت 121:    وَاِذْ غَدَوْتَ مِنْ اَہْلِکَ  تُبَـوِّیُٔ الْمُؤْمِنِیْنَ مَقَاعِدَ لِلْقِتَالِ:  ’’اور (اے نبی !) یاد کیجیے جبکہ صبح کو آپ اپنے گھر سے نکلے تھے اور مسلمانوں کو جنگ کے مورچوں میں مامور کر رہے تھے۔‘‘

            غزوہ اُحد کی صبح آپ  حضرت عائشہ کے حجرے سے برآمد ہوئے تھے اور جنگ کے میدان میں صف بندی کر رہے تھے‘ وہاں مورچے معین کر رہے تھے اور ان میں صحابہ کرام کو مامور کر رہے تھے۔

             وَاللّٰہُ سَمِیْعٌ عَلِیْمٌ:  ’’جبکہ اللہ سب کچھ سننے والا جاننے والا ہے۔‘‘ 

آیت 122:   اِذْ ہَمَّتْ طَّـآئِفَتٰنِ مِنْکُمْ اَنْ تَفْشَلاَ:  ’’جبکہ تم میں سے دو گروہ بزدلی دکھانے پر آمادہ ہو گئے تھے‘‘

            انہوں نے کچھ کمزوری دکھائی‘ حوصلہ چھوڑنے لگے اور ان کے پاؤں لڑکھڑائے۔

             وَاللّٰہُ وَلِیُّہُمَا:  ’’حالانکہ اللہ ان کا پشت پناہ تھا۔‘‘

             وَعَلَی اللّٰہِ فَلْیَتَوَکَّلِ الْمُؤْمِنُوْنَ:  ’’اور اللہ ہی پر توکل کرنا چاہیے اہل ایمان کو۔‘‘

            َجنگ کے آغاز سے پہلے انصار کے دو گھرانوں بنو حارثہ اور بنو سلمہ کے قدم وقتی طور پر ڈگمگا گئے تھے‘ بربنائے طبع بشری ان کے حوصلے پست ہونے لگے تھے اور انہوں نے واپسی کا ارادہ کر لیا تھا‘ لیکن اللہ تعالیٰ نے ان کے دلوں کو ثبات عطا فرمایا اور ان کے قدموں کو جما دیا۔ پھر ان کا ذکر قرآن میں کر دیا گیا۔ اور وہ اس پر فخر کرتے تھے کہ ہم وہ لوگ ہیں جن کا ذکر اللہ  تعالیٰ نے قرآن میں  «مِنْکُمْ» اور «وَاللّٰہُ وَلِیُّہُمَا» کے الفاظ میں کیا ہے۔ غور طلب بات یہ ہے کہ تین سو منافقین جو میدانِ جنگ سے چلے گئے تھے اللہ تعالیٰ نے ان کا ذکر تک نہیں کیا۔  گویا وہ اس لائق بھی نہیں ہیں کہ ان کا براہِ راست ذکر کیا جائے۔ البتہ آخر میں ان کا ذکر بالواسطہ طور پر (indirectly) آئے گا۔ 

 آیت 123:  وَلَقَدْ نَصَرَکُمُ اللّٰہُ بِبَدْرٍ وَّاَنْتُمْ اَذِلَّـــۃٌ: ’’اور اللہ نے تو تمہاری مدد بدر میں بھی کی تھی جبکہ تم بہت کمزور تھے۔‘‘

            غزوه بدر میں ایک ہزار مشرکین کے مقابلے میں اہل ایمان صرف تین سو تیرہ تھے‘ جبکہ سب کے پاس تلواریں بھی نہیں تھیں۔ کل آٹھ تلواریں تھیں۔ کفارِ مکہ ایک سو گھوڑوں کا رسالہ لے کر آئے تھے اور ادھر صرف دو گھوڑے تھے۔ اُدھر سات سو اونٹ تھے اور اِدھر ستر اونٹ تھے۔ اس سب کے باوجود اللہ نے تمہاری مدد کی تھی اور تمہیں اپنے سے طاقتور دشمن پر غلبہ عطا فرمایا تھا۔

             فَاتَّـقُوا اللّٰہَ لَـعَلَّـکُمْ تَشْکُرُوْنَ:  ’’تو اللہ کا تقویٰ اختیار کرو تاکہ تم اللہ کا (صحیح معنی میں) شکر ادا کر سکو۔‘‘ 

 آیت 124:   اِذْ تَقُوْلُ لِلْمُؤْمِنِیْنَ اَلَنْ یَّـکْفِیَکُمْ اَنْ یُّمِدَّکُمْ رَبُّـکُمْ بِثَلٰـثَۃِ اٰلٰـفٍ مِّنَ الْمَلٰٓئِکَۃِ مُنْزَلِیْنَ:  ’’(اے نبی) جب آپ کہہ رہے تھے اہل ایمان سے کہ کیا تمہارے لیے یہ کافی نہیں ہے کہ تمہارا ربّ تمہاری مدد کرے تین ہزار فرشتوں سے جو آسمان سے اُترنے والے ہوں گے؟‘‘

     یعنی اے مسلمانو! اگر مقابلے میں تین ہزار کا لشکر آ گیا ہے تو کیا غم ہے۔ میں تمہیں خوشخبری دیتا ہوں کہ اللہ تعالیٰ تمہاری مدد کو تین ہزار فرشتے بھیجے گا جو آسمان سے اُتریں گے۔اللہ تعالیٰ نے اپنے نبی  کی اس خوشخبری کو‘ جو ایک طرح سے استدعا بھی ہو سکتی تھی‘ فوری طور پر شرفِ قبولیت عطا فرمایا اور اس کی منظوری کا اعلان فرما دیا۔

 آیت 125:    بَلٰٓی اِنْ تَصْبِرُوْا وَتَـتَّـقُوْا وَیَاْتُوْکُمْ مِّنْ فَوْرِہِمْ ہٰذَا:  ’’کیوں نہیں (اے مسلمانو!) اگر تم صبر کرو گے اور تقویٰ کی روش پر رہو گے اور اگر وہ فوری طور پر تم پر حملہ آور ہو جائیں‘‘

             یُمْدِدْکُمْ رَبُّـکُمْ بِخَمْسَۃِ اٰلٰفٍ مِّنَ الْمَلٰٓئِکَۃِ مُسَوِّمِیْنَ: ’’تو تمہارا ربّ تمہاری مدد کرے گا پانچ ہزار فرشتوں کے ذریعے سے جو نشان زدہ گھوڑوں پر آئیں گے۔‘‘ 

 آیت 126:    وَمَا جَعَلَہُ اللّٰہُ اِلاَّ بُشْرٰی لَـکُمْ:  ’’اور اللہ نے اس کو نہیں بنایا مگر تمہارے لیے بشارت‘‘

             وَلِتَطْمَئِنَّ قُلُوْبُـکُمْ بِہ:  ’’اور تاکہ تمہارے دل اس سے مطمئن ہو جائیں۔‘‘

              وَمَا النَّصْرُ اِلاَّ مِنْ عِنْدِ اللّٰہِ الْعَزِیْزِ الْحَکِیْمِ:  ’’ورنہ مدد تو ہونی ہی اللہ کی طرف سے ہے جو غالب اور حکمت والا ہے۔‘‘

            یہ تو اللہ تعالیٰ کی طرف سے بشارت کے طور پر تمہارے دلوںکے اطمینان کے لیے تمہیں بتا دیا گیا ہے‘ ورنہ اللہ فرشتوں کو بھیجے بغیر بھی تمہاری مدد کر سکتا ہے ‘ وہ «کُن فیکون» کی شان رکھتا ہے۔ تمہیں یہ بشارت تمہاری طبع بشری کے حوالے سے دی گئی ہے کہ اگر تین ہزار کی تعداد میں دشمن سامنے ہوا تو تمہاری مدد کو تین ہزار فرشتے اتر آئیں گے ‘ اور اگر وہ فوری طور پر حملہ آور ہو گئے تو ہم پانچ ہزار فرشتے بھیج دیں گے۔ 

 آیت 127:    لِیَـقْطَعَ طَرَفًا مِّنَ الَّذِیْنَ کَفَرُوْا:  ’’(اور یہ مدد وہ تمہیں اس لیے دے گا) تاکہ کافروں کا ایک بازو کاٹ دے ‘‘

             اَوْ یَکْبِتَہُمْ فَـیَنْقَلِبُوْا خَآئِبِیْنَ:  ’’یا انہیں ذلیل کر دے کہ وہ خائب و خاسر ہو کر لوٹ جائیں۔‘‘

            یہ بات ذہن میں رہے کہ یہاں غزوہ اُحد کے حالات و واقعات اور ان پر تبصرہ زمانی ترتیب سے نہیں ہے۔ سب سے پہلے رسول اللہ  کا اپنے گھر سے نکل کر میدانِ جنگ میں مورچہ بندی کا ذکر ہوا۔ پھر اس سے پہلے کا ذکر ہو رہا ہے جب خبریں پہنچی ہوں گی کہ تین ہزار کا لشکر مدینہ پر حملہ آور ہونے کے لیے آ رہا ہے اور رسول اللہ  نے اہل ایمان کو اللہ تعالیٰ  کی مدد و نصرت کی خوشخبری دی ہو گی۔ اب اس جنگ کے دوران مسلمانوں سے جو کچھ خطائیں اور غلطیاں ہوئیں ان کی نشان دہی کی جا رہی ہے۔ خود آنحضور  سے بھی خطا کا ایک معاملہ ہوا‘ اس پر بھی گرفت ہے‘ بلکہ سب سے پہلے اسی معاملے کو لیا جا رہا ہے۔ جب آپ  شدید زخمی ہو گئے اور آپ پر بے ہوشی طاری ہو گئی‘ پھر جب ہوش آیا تو آپ  کی زبان پر یہ الفاظ آ گئے:

«کَیْفَ یُفْلِحُ قَوْمٌ خَضَبُوْا وَجْہَ نَبِـیِّھِمْ بِالدَّمِ وَھُوَ یَدْعُوْھُمْ اِلَی اللّٰہِ»

’’یہ قوم کیسے فلاح پائے گی جس نے اپنے نبی کے چہرے کو خون سے رنگ دیا جبکہ وہ انہیں اللہ کی طرف بلا رہا تھا!‘‘

تلوار کا وار آنحضور  کے رُخسار کی ہڈی پر پڑا تھا  اور اس سے آپ کے دو دانت بھی شہید ہو گئے تھے۔ زخم سے خون کا فوارہ چھوٹا تھا جس سے آپ  کا پورا چہرہ مبارک لہولہان ہو گیا تھا۔ خون اتنی مقدار میں بہہ گیا تھا کہ آپ  پر بے ہوشی طاری ہو گئی۔ آپ  ہوش میں آئے تو زبانِ مبارک سے یہ الفاظ ادا ہو گئے۔ اس پر یہ آیت نازل ہوئی: لَـیْسَ لَکَ مِنَ الْاَمْرِ شَیْئٌ … اے نبی اس معاملے میں آپ كا کوئی اختیار نہیں ہے‘ آپ کا کام دعوت دینا اور تبلیغ کرنا ہے۔ لوگوں کی ہدایت اور ضلالت کے فیصلے ہم کرتے ہیں۔ اور دیکھئے اللہ نے کیا شان دکھائی؟ جس شخص کی وجہ سے مسلمانوں کو ہزیمت اٹھانا پڑی ‘ یعنی خالد بن ولید  اللہ تعالیٰ نے حضور  ہی کی زبانِ مبارک سے اسے «سَیفٌ مِن سُیوفِ اللّٰہ»  (اللہ کی تلواروں میں سے ایک تلوار) کا خطاب دلوا دیا۔

 آیت 140:   اِنْ یَّمْسَسْکُمْ قَرْحٌ فَقَدْ مَسَّ الْقَوْمَ قَرْحٌ مِّثْلُہ:  ’’اگر تمہیں اب چرکا لگا ہے تو تمہارے دشمن کو بھی ایسا ہی چرکا اس سے پہلے لگ چکا ہے۔‘‘

            اہل ایمان کو غزوہ اُحد میں اتنی بڑی چوٹ پہنچی تھی کہ ستر صحابہ ‘ شہید ہو گئے۔ ان میں حضرت حمزہ بھی تھے اور مصعب بن عمیر  بھی۔ انصار کا کوئی گھرانہ ایسا نہیں تھا جس کا کوئی فرد شہید نہ ہوا ہو۔ رسول اللہ  اور مسلمان جب مدینہ واپس آئے تو ہر گھر میں کہرام مچا ہوا تھا ۔ اُس وقت تک میت پر بین کرنے کی ممانعت نہیں ہوئی تھی ۔ عورتیں مرثیے کہہ رہی تھیں‘ بین َکر رہی تھیں‘ ماتم  کر رہی تھیں۔ اس حالت میں خود آنحضور  کی زبانِ مبارک سے الفاظ نکل گئے: «لٰــکِنَّ حَمْزَۃَ لَا بَوَاکِی لَــہ!»’’ہائے حمزہ کے لیے تو کوئی رونے والیاں بھی نہیں ہیں!‘‘ کیونکہ مدینہ میں حضرت حمزہ  کی کوئی رشتہ دار خواتین نہیں تھیں۔ حمزہ  تو مہاجر تھے۔ انصار کے گھرانوں کی خواتین اپنے اپنے مقتولوں پر آنسو بہا رہی تھیں اور بین کر رہی تھیں۔ پھر انصار نے اپنے گھروں سے جا کر خواتین کو حضرت حمزہ  کی ہمشیرہ حضرت صفیہ کے گھر بھیجا کہ وہاں جا کر تعزیت کریں۔ بہرحال دکھ تو محمد رسول اللہ  کو بھی پہنچا ہے۔ آخر آپ کے سینے کے اندر ایک حسّاس دل تھا‘ پتھر کا کوئی ٹکڑا تو نہیں تھا۔ یہاں اللہ تعالیٰ اہل ایمان کی دلجوئی کے لیے فرما رہا ہے کہ اتنے غمگین نہ ہو‘ اتنے ملول نہ ہو‘ اتنے دل گرفتہ نہ ہو۔ اس وقت اگر تمہیں کوئی چرکا لگا ہے تو تمہارے دشمن کو اس جیسا چرکا اس سے پہلے لگ چکا ہے۔ ایک سال پہلے ان کے بھی ستر افراد مارے گئے تھے۔   ّ

             وَتِلْکَ الْاَیَّامُ نُدَاوِلُہَا بَیْنَ النَّاسِ:  ’’یہ تو دن ہیں جن کو ہم لوگوں میں الٹ پھیر کرتے رہتے ہیں۔‘‘

            یہ زمانے کے نشیب و فراز ہیں جنہیں ہم لوگوں کے درمیان گردش دیتے رہتے ہیں۔ کسی قوم کو ہم ایک سی کیفیت میں نہیں رکھتے۔

             وَلِیَعْلَمَ اللّٰہُ الَّذِیْنَ اٰمَنُوْا:  ’’اور یہ اس لیے ہوتا ہے کہ اللہ دیکھ لے کہ کون حقیقتاً مؤمن ہیں‘‘

            اگر امتحان اور آزمائش نہ آئے‘ تکلیف نہ آئے‘ قربانی نہ دینی پڑے‘ کوئی زک نہ پہنچے تو کیسے پتا چلے کہ حقیقی مؤمن کون ہے؟ امتحان وآزمائش سے تو پتا چلتا ہے کہ کون ثابت قدم رہا۔ اللہ تعالیٰ جاننا چاہتا ہے‘ دیکھنا چاہتا ہے‘ ظاہر کرنا چاہتا ہے کہ کس نے اپنا سب کچھ لگا دیا؟ کس نے صبر کیا؟

             وَیَتَّخِذَ مِنْکُمْ شُہَدَآءَ:  ’’اور وہ چاہتا ہے کہ تم میں سے کچھ کو مقامِ شہادت عطا کرے۔‘‘

            انہیں اپنی گواہی کے لیے قبول کر لے۔

             وَاللّٰہُ لاَ یُحِبُّ الظّٰلِمِیْنَ:  ’’اللہ ظالموں کو پسند نہیں کرتا۔‘‘

            اگر تمہیں تکلیف پہنچی ہے تو اس کا یہ مطلب نہیں ہے کہ اللہ نے کفار کی مدد کی ہے اور ان کو پسند کیا ہے (معاذاللہ!)

 آیت 141:   وَلِیُمَحِّصَ اللّٰہُ الَّذِیْنَ اٰمَنُوْا وَیَمْحَقَ الْکٰفِرِیْنَ:  ’’اور یہ اس لیے ہوا ہے کہ اللہ اہل ایمان کو بالکل پاک صاف کر دے اور کافروں کو مٹا دے۔‘‘

            مسلمانوں میں سے خاص طور پر انصارِ مدینہ کی آزمائش مطلوب ہے جو ابھی ایمان لائے ہیں‘ ان میںکچھ پختہ ایمان والے ہیں‘ کچھ کمزور ایمان والے ہیں اور کچھ منافق بھی ہیں۔ اللہ چاہتا ہے کہ وہ پورے طریقے سے پختہ ہو جائیں ‘اور اگر کوئی کچا ہی رہتا ہے تو وہ اہل ایمان سے کٹ جائے‘ تاکہ بحیثیت ِ مجموعی جماعتی قوت کو کوئی ضعف نہ پہنچے۔ تو یہ جو تمہارے اندر ہر طرح کے لوگ گڈمڈ ہو گئے ہیں کہ کچھ مؤمن صادق ہیں‘ پختہ ایمان والے ہیں‘ کچھ کمزور ایمان والے ہیں اور کچھ منافق بھی ہیں‘ تو اللہ تعالیٰ نے یہ تمحیص کی ہے کہ سب کو چھانٹ کر الگ کردیا ہے۔ چنانچہ عبداللہ بن اُبی اور اس کے تین سو ساتھیوں کے نفاق کا پردہ چاک ہو گیا‘ ورنہ ان کی اصلیت تم پر کیسے ظاہر ہوتی؟ ’’بحث و تمحیص‘‘ ہم اردو میں بھی استعمال کرتے ہیں۔ بحث کا معنی ہے کریدنا اور تمحیص الگ الگ کرنا۔ 

 آیت 142:    اَمْ حَسِبْتُمْ اَنْ تَدْخُلُوا الْجَنَّـۃَ:  ’’کیا تم نے سمجھا تھا کہ جنت میں یون ہی داخل ہو جاؤ گے‘‘

             وَلَمَّا یَعْلَمِ اللّٰہُ الَّذِیْنَ جٰہَدُوْا مِنْکُمْ وَیَعْلَمَ الصّٰبِرِیْنَ:  ’’حالانکہ ابھی تو اللہ نے دیکھا ہی نہیں ہے تم میں سے کون واقعتا (اللہ کی راہ میں) جہاد کرنے والے ہیں اور صبر و استقامت کا مظاہرہ کرنے والے ہیں۔‘‘

            گویا  ع  ’’ابھی عشق کے امتحاں اور بھی ہیں!‘‘ ابھی تو تمہارے لیے اس راستے میں کڑی سے کڑی منزلیں آنے والی ہیں۔ یاد رہے کہ یہ مضمون ہم سورۃ البقرۃ کی (آیت:214) میں پڑھ آئے ہیں۔ نوٹ کیجیے کہ زیر مطالعہ آیت کا نمبر: 142 ہے ‘ یعنی ہندسوں کی صرف ترتیب بدلی ہوئی ہے۔ 

 آیت 143:    وَلَـقَدْ کُنْتُمْ تَمَنَّوْنَ الْمَوْتَ مِنْ قَـبْلِ اَنْ تَلْقَوْہُ:  ’’اور تم تو موت کی تمنا کر رہے تھے اس سے پہلے کہ اُس سے ملاقات ہوتی۔‘‘

             فَقَدْ رَاَیْتُمُوْہُ وَاَنْتُمْ تَنْظُرُوْنَ:  ’’سو اب تم نے اسے دیکھ لیا ہے اپنی آنکھوں سے۔‘‘

            یہاں روئے سخن اُن لوگوں کی طرف ہے جو نئے نئے ایمان لائے تھے اور ان میں سے خاص طور پر نوجوانوں نے کہا تھا کہ ہمیں تو شہادت چاہیے اور ہم تو کھلے میدان میں جا کر مقابلہ کریں گے۔ ان کے جذبات پر تھوڑا سا تبصرہ ہو رہا ہے کہ اُس وقت تو جوشِ قتال اور ذوقِ شہادت کا اظہار ہو رہا تھا‘ اب تم نے موت دیکھ لی ہے نا! تو یہ ہے موت جسے انسان اتنی آسانی کے ساتھ قبول نہیں کرتا۔

 آیت 152:  وَلَقَدْ صَدَقَـکُمُ اللّٰہُ وَعْدَہ اِذْ تَحُسُّوْنَہُمْ بِاِذْنِہ:  ’’اور اللہ نے تو تم سے (تائید و نصرت کا) جو وعدہ کیا تھا وہ پورا کر دیا جبکہ تم ان کو تہ تیغ کر رہے تھے اللہ کے حکم سے۔‘‘

            غزوہ اُحد میں جو عارضی شکست ہو گئی تھی اور مسلمانوں کو زَک پہنچی تھی‘ جس سے ان کے دل زخمی تھے اس کے ضمن میں اب یہ آیت ایک قول فیصل کے انداز میں آئی ہے کہ دیکھو مسلمانو! تم ہم سے کوئی شکایت نہیں کر سکتے‘ اللہ نے تم سے تائید و نصرت کا جو وعدہ کیا تھا وہ پورا کر دیا تھاجبکہ تم انہیں اللہ کے حکم سے قتل کر رہے تھے‘ گاجر مولی کی طرح کاٹ رہے تھے۔ تمہیں فتح حاصل ہو گئی تھی اور ہمارا وعدہ پورا ہو چکا تھا۔

             حَتّٰی اِذَا فَشِلْتُمْ وَتَنَازَعْتُمْ فِی الْاَمْرِ:  ’’یہاں تک کہ جب تم ڈھیلے پڑ گئے اور امر میں تم نے جھگڑا کیا‘‘

            «فَشِلْتُمْ» کا ترجمہ بعض مترجمین نے کچھ اور بھی کیا ہے‘ لیکن میرے نزدیک یہاں نظم (ڈسپلن) کو ڈھیلا کرنا مراد ہے۔ اسلامی نظم ِجماعت میں سمع و طاعت کو بنیادی اہمیت حاصل ہے‘ اور ظاہر ہے کہ سمع و طاعت میں ایک ہی شخص کی اطاعت مقصود نہیں ہوتی۔ رسول اللہ  کی اطاعت بھی فرض تھی اور آپ  اگر کسی کو امیر مقرر کرتے تو اس کی اطاعت بھی فرض تھی۔ حضرت ابوہریرہ روایت کرتے ہیں کہ رسول اللہ  نے ارشادفرمایا:

«مَنْ اَطَاعَنِیْ فَقَدْ اَطَاعَ اللّٰہَ‘ وَمَنْ عَصَانِیْ فَقَدْ عَصَی اللّٰہَ‘ وَمَنْ اَطَاعَ اَمِیْرِیْ فَقَدْ اَطَاعَنِیْ‘ وَمَنْ عَصٰی اَمِیْرِیْ فَقَدْ عَصَانِیْ»

’’جس نے میری اطاعت کی اُس نے اللہ کی اطاعت کی‘ اور جس نے میری نافرمانی کی اس نے اللہ کی نافرمانی کی۔ اور جس نے میرے مقرر کردہ امیر کی اطاعت کی اُس نے میری اطاعت کی‘ اور جس نے میرے نامزد کردہ امیر کی نافرمانی کی اُس نے میری نافرمانی کی۔‘‘

اگرچہ رسول اللہ  کے حکم کی تو انہوں نے تاویل کر لی تھی کہ حضور  نے جو یہ فرمایا تھا کہ اگر ہم سب بھی اللہ کی راہ میں قتل ہو جائیں اور تم دیکھو کہ چیلیں اور کوے ہمارا گوشت کھا رہے ہیں تب بھی یہاں سے نہ ہٹنا‘ تو یہ شکست کی صورت میں تھا‘ لیکن اب تو فتح ہو گئی ہے۔ چنانچہ انہوں نے جان بوجھ کر اللہ کے رسول  کے حکم کی خلاف ورزی نہیں کی تھی۔ لیکن انہوں نے اپنے مقامی امیر (لوکل کمانڈر) کے حکم کی خلاف ورزی کی تھی۔ میرے نزدیک یہاں «عَصَیْتُمْ» سے یہی حکم عدولی مراد ہے۔ اسلامی نظم ِجماعت میں اوپر سے لے کر نیچے تک‘ سپہ سالار سے لے کر لوکل کمانڈر تک‘ درجہ بدرجہ نظامِ سمع وطاعت کی پابندی ضروری ہے۔ فوج کا ایک سپہ سالار ہے‘ لیکن پھر پوری فوج کے کئی حصے ہوتے ہیں اور ہر ایک کا ایک امیر ہوتا ہے۔ میسرہ‘ میمنہ‘ قلب اور ہراول دستہ وغیرہ‘ ہر ایک کا ایک کمانڈر ہوتا ہے۔ اب اگر ان کمانڈروں کے احکام سے سرتابی ہو گی تو ایسی فوج کا جو انجام ہو گا وہ معلوم ہے۔ چنانچہ ایک جماعت کے اندر درجہ بدرجہ جو بھی نظامِ سمع و طاعت ہے اُس کی پوری پوری پابندی ضروری ہے۔

             وَعَصَیْتُم مِّنْ بَعْدِ مَآ اَرٰٹکُمْ مَّا تُحِبُّونَ:  ’’اور تم نے نافرمانی کی اس کے بعد کہ تم نے وہ چیز دیکھ لی جو تمہیں محبوب ہے۔‘‘

             «عَصَیْتُمْ» کے بارے میں وضاحت ہو چکی ہے کہ اس سے مراد اللہ کے رسول  کی نافرمانی نہیں‘ بلکہ لوکل کمانڈر کی نافرمانی ہے۔  مِّنْ بَعْدِ مَآ اَرٰٹکُمْ مَّا تُحِبُّونَ. سے اکثر مفسرین نے مالِ غنیمت مراد لیا ہے‘ کہ درّے پر مامور حضرات مالِ غنیمت کی طلب میں درّہ چھوڑ کر چلے گئے‘ لیکن میرے نزدیک یہ بات درست نہیں ہے۔ اس لیے کہ مالِ غنیمت کی تقسیم کا قانون تو غزوہ بدر کے بعد سورۃ الانفال میں نازل ہو چکا تھا۔ اس کی رو سے چاہے کوئی شخص کچھ جمع کرے یا نہ کرے اسے مالِ غنیمت میں سے برابر کا حصہ ملے گا۔ یہاں مِّنْ بَعْدِ مَـآ اَرٰٹکُمْ مَّا تُحِبُّونَ. سے مراد دراصل ’’فتح‘‘ ہے اور اس کے لیے «القُرآن یفُسِّر بعضُہ بَعْضًا» کی رُو سے سورۃ الصف کی یہ آیت ہماری رہنمائی کرتی ہے: وَاُخْرٰی تُحِبُّوْنَـھَا  نَصْرٌ مِّنَ اللّٰہِ وَفَتْحٌ قَرِیْبٌ. (آیت: 13) گویا بندہ مؤمن کو دنیا میں فتح و نصرت محبوب تو ہوتی ہے‘ لیکن اسے اس کو اپنا مقصود نہیں بنانا۔ اس کا مقصود اللہ کی رضا جوئی اور اپنے فرض کی ادائیگی ہے۔ باقی کامیابی یا ناکامی اللہ کی مرضی اور اس کی حکمت کے تحت ہوتی ہے۔ اللہ کب فتح لانا چاہتا ہے وہ بہتر جانتا ہے۔

             مِنْکُمْ مَّنْ یُّرِیْدُ الدُّنْیَا:  ’’تم میں سے وہ بھی ہیں جو دنیا چاہتے ہیں‘‘

            یعنی وہ خواہش رکھتے ہیں کہ دنیا میں فتح و نصرت اور کامیابی حاصل ہو جائے‘ ہمارا بول بالا ہو جائے‘ ہماری حکومت قائم ہو جائے۔

             وَمِنْکُمْ مَّنْ یُّرِیْدُ الْاٰخِرَۃَ:  ’’اور تم میں وہ بھی ہیں جو صرف آخرت کے طالب ہیں‘‘۔

             ثُمَّ صَرَفَـکُمْ عَنْہُمْ لِیَبْتَلِیَکُمْ: ’’پھر اللہ نے تمہارا رُخ پھیر دیا اُن کی طرف سے تاکہ تمہاری آزمائش کرے۔‘‘

            پہلے وہ بھاگ رہے تھے اور تم ان کا تعاقب کر رہے تھے‘ اب معاملہ الٹا ہو گیا کہ تم پسپا ہوگئے اور اپنی جانیں بچانے کے لیے اِدھر اُدھر جائے پناہ ڈھونڈنے لگے۔ تمہاری یہ پسپائی تمہارے لیے آزمائش تھی۔

             وَلَقَدْ عَفَا عَنْکُمْ:  ’’اور اللہ تمہیں معاف کر چکا ہے۔‘‘

            تم میں سے جس کسی سے جو بھی خطا ہوئی اللہ نے اسے معاف فرما دیا ہے۔

             وَاللّٰہُ ذُوْ فَضْلٍ عَلَی الْمُؤْمِنِیْنَ:  ’’اور اللہ تعالیٰ اہل ایمان کے حق میں بہت فضل والاہے۔‘‘ 

 آیت 153:   اِذْ تُصْعِدُوْنَ وَلاَ تَلْونَ عَلٰٓی اَحَدٍ:  ’’یاد کرو‘ جب کہ تم (پہاڑ پر) چڑھے چلے جا رہے تھے (جان بچانے کے لیے) اور کسی کی طرف مڑ کر بھی نہیں دیکھ رہے تھے‘‘

             وَّالرَّسُوْلُ یَدْعُوْکُمْ فِیْ اُخْرٰکُمْ:  ’’اور رسول  تمہیں پکار رہے تھے تمہارے پیچھے سے‘‘

             غزوہ اُحد میں خالد بن ولید کے اچانک حملے سے ایک بھگدڑ سی مچ گئی تھی۔ بعض صحابہ  نے رسول اللہ  کو اپنے حفاظتی حصار میں لے لیا تھا اور انہوں نے اپنے جسموں کو ڈھال بن کر آنحضور  کی حفاظت کی۔ بہت سے لوگ سراسیمہ ہو کر اپنی جان بچانے کی خاطر بھاگ کھڑے ہوئے۔ بعض کوہِ اُحد پر چڑھے جا رہے تھے۔ اللہ کے رسول  انہیں پکار پکار کر واپس بلا رہے تھے۔

             فَاَثَابَکُمْ غَـمًّام بِغَمٍّ: ’’تو اللہ تعالیٰ تم پر غم کے بعد غم مسلسل ڈالتا رہا‘‘

             لِّـکَیْلاَ تَحْزَنُوْا عَلٰی مَا فَاتَـکُمْ وَلاَ مَآ اَصَابَکُمْ:  ’’تاکہ (آيندہ کے لیے تمہیں یہ سبق ملے کہ) تم غمگین نہ ہوا کرو اُس پر کہ جو تمہارے ہاتھ سے جاتا رہے اور نہ اُس تکلیف پر کہ جو تم پر آ پڑے۔‘‘

            یعنی  ع  ’’رنج سے خوگر ہوا انساں تو مٹ جاتا ہے رنج!‘‘ آدمی کو اگر کبھی اتفاقاً ہی رنج و غم کا سامنا کرنا پڑے تو اس کا اثر بہت زیادہ ہوتا ہے‘ لیکن جب پے در پے رنج و غم اٹھانے پڑیں تو ان کی شدت میں کمی واقع ہوجاتی ہے۔ دامن اُحد میں مسلمانوں کو پے در پے تکالیف برداشت کرنا پڑیں۔ سب سے بڑا رنج جو پیش آیا وہ حضور  کے انتقال کی خبر تھی‘ جس پر کسی کو اپنے تن بدن کا تو ہوش ہی نہیں رہا کہ خود اس کو کیا زخم لگا ہے۔ اس طرح اللہ تعالیٰ نے اُس وقت کی کیفیت میں ایک تخفیف پیدا کر دی۔

             وَاللّٰہُ خَبِیْرٌ بِمَا تَعْمَلُوْنَ: ’’اور اللہ باخبر ہے اس سے جو تم کر رہے تھے۔‘‘ 

 آیت 154:    ثُمَّ اَنْزَلَ عَلَیْکُمْ مِّنْ بَعْدِ الْغَمِّ اَمَنَۃً:  ’’پھر اس غم کے بعد اللہ تعالیٰ نے تم پر اطمینان نازل فرمایا‘‘

             نُّـعَاسًا یَّغْشٰی طَـآئِفَۃً مِّنْکُمْ:  ’’یعنی نیند جو تم میں سے ایک گروہ پر طاری ہو گئی‘‘

            انسان کو نیند جو آتی ہے یہ اطمینانِ قلب کا مظہر ہوتی ہے کہ جیسے اب اُس نے سب کچھ بھلا دیا۔ عین حالت جنگ میں ایسی کیفیت اللہ کی رحمت کا مظہر تھی۔

             وَطَائِفَۃٌ قَدْ اَہَمَّتْہُمْ اَنْـفُسُہُمْ:  ’’اور ایک گروہ ایسا تھا کہ جنہیں اپنی جانوں کی پڑی ہوئی تھی‘‘

             یَظُنُّوْنَ بِاللّٰہِ غَیْرَ الْحَقِّ ظَنَّ الْجَاہِلِیَّۃِ:   ’’وہ اللہ کے بارے میں ناحق جہالت والے گمان کر رہے تھے۔‘‘

            عبد اللہ بن اُبی اور اس کے تین سو ساتھی تو میدانِ جنگ کے راستے ہی سے واپس ہو گئے تھے۔ اس کے بعد بھی اگر مسلمانوں کی جماعت میں کچھ منافقین باقی رہ گئے تھے تو ان کا حال یہ تھا کہ اُس وقت انہیں اپنی جانوں کے لالے پڑے ہوئے تھے۔ ایسی کیفیت میں انہیں اونگھ کیسے آتی؟ ان کا حال تو یہ تھا کہ ان کے دلوں میں وسوسے آ رہے تھے کہ اللہ نے تو مدد کا وعدہ کیا تھا‘ لیکن وہ وعدہ پورا نہیں ہوا‘ اللہ کی بات سچی ثابت نہیں ہوئی۔ اس طرح ان کے دل و دماغ میں خلافِ حقیقت زمانہ ٔ جاہلیت کے گمان پیداہو رہے تھے۔

             یَقُوْلُوْنَ ہَلْ لَّــنَا مِنَ الْاَمْرِ مِنْ شَیْئٍ:  ’’وہ کہہ رہے تھے کہ ہمارے لیے بھی اختیار میں کوئی حصہ ہے یا نہیں؟‘‘

            یہ وہ لوگ ہو سکتے ہیں جنہوں نے جنگ سے قبل مشورہ دیا تھا (جیسے حضور  کی اپنی رائے بھی تھی) کہ مدینے کے اندر محصور رہ کر جنگ کی جائے۔ جب ان کے مشورے پر عمل نہیں ہوا تو وہ کہنے لگے کہ ان معاملات میں ہمارا بھی کوئی اختیار ہے یا ساری بات محمد ہی کی چلے گی؟ یہ بھی جماعتی زندگی کی ایک خرابی ہے کہ ہر شخص چاہتا ہے کہ میری بات بھی مانی جائے‘ میری رائے کو بھی اہمیت دی جائے۔ آخر ہم سب اپنے امیر ہی کی رائے کیوں مانتے چلے جائیں؟ ہمارا بھی کچھ اختیار ہے یا نہیں؟

             قُلْ اِنَّ الْاَمْرَ کُلَّہ لِلَّہِ:  ’’کہہ دیجیے کہ سارا معاملہ اللہ کے اختیار میں ہے۔‘‘

             یُخْفُوْنَ فِیْ اَنْفُسِہِمْ مَّا لاَ یُبْدُوْنَ لَـکَ:  ’’(اے نبی) یہ اپنے دل میں وہ بات چھپا رہے ہیں جو آپ پر ظاہر نہیں کر رہے۔‘‘

            ان کے دل میں کیا ہے‘ اب اللہ کھول کر بتا رہا ہے۔

             یَـقُوْلُوْنَ لَـوْ کَانَ لَنَا مِنَ الْاَمْرِ شَیْئٌ مَّا قُتِلْنَا ہٰہُنَا:  ’’یہ (اپنے دل میں) کہتے ہیں کہ اگر اختیار میں ہمارا بھی کچھ حصہ ہوتا تو ہم یہاں نہ مارے جاتے۔‘‘

            اگر ہماری رائے مانی جاتی‘ ہمارے مشورے پر عمل ہوتا تو ہم یہاں قتل نہ ہوتے۔ یعنی ہمارے اتنے لوگ یہاں پر شہید نہ ہوتے۔

             قُلْ لَّــوْ کُنْتُمْ فِیْ بُیُوْتِکُمْ:  ’’ان سے کہیے اگر تم سب کے سب اپنے گھروں میں ہوتے‘‘

             لَـبَرَزَ الَّذِیْنَ کُتِبَ عَلَیْہِمُ الْـقَتْلُ اِلٰی مَضَاجِعِہِمْ:  ’’تب بھی جن لوگوں کا قتل ہونا مقدر تھا وہ اپنی قتل گاہوں تک پہنچ کر رہتے۔‘‘

             اللہ کی مشیت میں جن کے لیے طے تھا کہ انہیں شہادت کی خلعت فاخرہ پہنائی جائے گی وہ خود بخود اپنے گھروں سے نکل آتے اور کشاں کشاں ان جگہوں پر پہنچ جاتے جہاں انہوں نے خلعت شہادت زیب تن کرنی تھی۔ یہ تو اللہ تعالیٰ کے فیصلے ہوتے ہیں‘ تمہاری تدبیر سے ان کا کوئی تعلق نہیں ہے۔

             وَلِیَبْتَلِیَ اللّٰہُ مَا فِیْ صُدُوْرِکُمْ:  ’’اور یہ (معاملہ جو پیش آیا) اس لیے تھا کہ اللہ اسے آزمالے جو کچھ تمہارے سینوں میں تھا‘‘

             وَلِیُمَحِّصَ مَا فِیْ قُلُوْبِکُمْ:  ’’اور تاکہ وہ بالکل پاک اور خالص کر دے جو کچھ تمہارے دلوں میں ہے۔‘‘

             وَاللّٰہُ عَلِیْمٌم بِذَاتِ الصُّدُوْرِ:  ’’اور اللہ تعالیٰ سینوں کے اندر مخفی باتوں کو بھی جانتا ہے۔‘‘ 

  آیت 155:   اِنَّ الَّذِیْنَ تَوَلَّوْا مِنْکُمْ یَوْمَ الْتَقَی الْجَمْعٰنِ:  ’’تم میں سے وہ لوگ جو میدانِ جنگ سے چلے گئے اُس دن جب دو گروہ ایک دوسرے کے مقابلے میں آئے‘‘

            یہ ایسے مخلص حضرات کا تذکرہ ہے جو اچانک حملے کے بعد جنگ کی شدت سے گھبرا کر اپنی جان بچانے کے لیے وقتی طو رپر پیٹھ پھیر گئے ۔ان میں سے کچھ لوگ کوہِ اُحد پر چڑھ گئے تھے اور کچھ اس سے ذرا آگے بڑھ کر میدان ہی سے باہر چلے گئے تھے۔ ان میں بعض کبار صحابہj کا نام بھی آتا ہے۔ دراصل یہ بھگڈر مچ جانے کے بعد ایسی اضطراری کیفیت تھی کہ اُس میں کسی سے بھی کسی ضعف اور کمزوری کا اظہار ہو جانا بالکل قرین قیاس بات ہے۔

             اِنَّمَا  اسْتَزَلَّہُمُ الشَّیْطٰنُ بِبَعْضِ مَا کَسَبُوْا:  ’’اصل میں شیطان نے ان کے پاؤں پھسلا دیے تھے ان کے بعض افعال کی وجہ سے۔‘‘

            کسی وقت کوئی تقصیر ہو گئی ہو‘ کوئی کوتاہی ہو گئی ہو‘ یا کسی کمزوری کا اظہار ہو گیا ہو‘ یہ مخلص مسلمانوں سے بھی بعید نہیں۔ ایسا معاملہ ہر ایک سے پیش آ سکتا ہے۔ معصوم تو صرف نبی ہوتے ہیں۔ انسانی کمزوریوں کی وجہ سے شیطان کو موقع مل جاتا ہے کہ کسی وقت وہ اڑنگا لگا کر اُس شخص کو پھسلا دے‘ خواہ وہ کتنا ہی نیک اور کتنا ہی صاحب ِ رُتبہ ہو۔

              وَلَقَدْ عَفَا اللّٰہُ عَنْہُمْ:  ’’اور اللہ انہیں معاف کر چکا ہے۔‘‘

            یہ الفاظ بہت اہم ہیں ۔ بعض گمراہ فرقے اس بات کو بہت اچھالتے ہیں اور بعض صحابہ کرام  کی توہین کرتے ہیں‘ ان پر تنقید کرتے ہیں کہ یہ میدانِ جنگ سے پیٹھ دکھا کر بھاگ گئے تھے۔ لیکن وہ یہ بھول جاتے ہیں کہ اللہ تعالیٰ ان کی معافی کا اعلان کر چکا ہے۔ اس کے بعد  اب کسی مسلمان کے لیے جائز نہیں ہے کہ اُن پر زبانِ طعن دراز کرے۔

              اِنَّ اللّٰہَ غَفُوْرٌ حَلِیْمٌ:  ’’یقینا اللہ تعالیٰ معاف فرمانے والا اور بردبار ہے۔‘‘ 

 آیت 165:  اَوَلَمَّـآ اَصَابَتْـکُمْ مُّصِیْـبَـۃٌ قَدْ اَصَبْتُمْ مِّثْلَیْہَا قُلْتُمْ اَنّٰی ہٰذَا:  ’’اور کیا جب تم پر ایک مصیبت آئی‘ جبکہ تم اس سے دگنی مصیبت اُن کو پہنچا چکے ہو تو تم کہنے لگے کہ یہ کہاں سے آ گئی؟‘‘

            یعنی یہ کیوں ہو گیا؟ اللہ نے پہلے مدد کی تھی‘ اب کیوں نہیں کی؟

              قُلْ ہُوَ مِنْ عِنْدِ اَنْفُسِکُمْ:  ’’(اے نبی) کہہ دیجیے یہ تمہارے اپنے نفسوں (کی شرارت کی وجہ) سے ہوا ہے۔‘‘

            غلطی تم نے کی تھی‘ امیر کے حکم کی خلاف ورزی تم نے کی تھی‘ جس کا خمیازہ تم کو بھگتنا پڑا۔

              اِنَّ اللّٰہَ عَلٰی کُلِّ شَیْئٍ قَدِیْـرٌ:  ’’یقینا اللہ تو ہر چیز پر قادر ہے۔‘‘

            گویا اسی مضمون کو یہاں دہرا کر لایا گیا ہے جو پیچھے آیت: 152 میں بیان ہو چکا ہے کہ اللہ تو وعدہ اپنا پورا کر چکا تھا اور تم  دشمن پر غالب آ چکے تھے‘ مگر تمہاری اپنی غلطی کی وجہ سے جنگ کا پانسہ پلٹ گیا۔ اللہ چاہتا تو تمہیں کوئی سزا نہ دیتا‘ بغیر سزا دیے معاف کر دیتا‘ لیکن اللہ کی حکمت کا تقاضا یہ ہوا کہ تمہیں سزا دی جائے۔ اس لیے کہ ابھی تو بڑے بڑے مراحل آنے ہیں۔ اگر اسی طرح تم نظم کو توڑتے رہے اور احکام کی خلاف ورزی کرتے رہے تو پھر تمہاری حیثیت ایک جماعت کی تو نہیں ہو گی‘ پھر تو ایک انبوہ ہو گا‘ ’’ہجومِ مؤمنین‘‘ ہو گا‘ جبکہ اللہ کے دین کو غالب کرنے کے لیے ایک منظم جماعت‘ لشکر‘ فوج‘ حزب اللہ درکار ہے۔

 آیت 166:  وَمَـآ اَصَابَکُمْ یَوْمَ الْتَقَی الْجَمْعٰنِ فَبِاِذْنِ اللّٰہِ:  ’’اور جو بھی مصیبت تم پر آئی ہے اُس دن جب دونوں لشکر آپس میں بھڑ گئے تھے وہ اللہ کے اِذن سے آئی ہے‘‘

            اللہ کے اذن کے بغیر تو یہ تکلیف نہیں آ سکتی تھی۔

             وَلِیَعْلَمَ الْمُؤْمِنِیْنَ: ’’اور یہ اس لیے تھی کہ اللہ ظاہر کردے ایمان والوں کو۔‘‘

            یہ ظاہر ہو جائے کہ کون ہیں اصل مؤمن‘ حقیقی مؤمن جو صبر و استقامت کا مظاہرہ کرتے ہیں۔

 آیت167:  وَلِیَعْلَمَ الَّذِیْنَ نَافَقُوْا:  ’’اور تاکہ ان لوگوں کو بھی ظاہر کر دے جنہوں نے منافقت اختیار کی۔‘‘

            ’’لِیَعْلَمَ‘‘ کا معنی ہے ’’تاکہ جان لے‘‘--- لیکن چونکہ اللہ تعالیٰ ہر چیز کا جاننے والا ہے لہٰذا ایسے مقامات پر ترجمہ کیا جاتا ہے: ’’تاکہ اللہ ظاہر کر دے‘‘۔ جیسا کہ اللہ تعالیٰ نے واقعتا ظاہر کر دیا کہ کون مؤمن ہے اور کون منافق! عبداللہ بن اُبی اپنے تین سو ساتھیوں کو لے کر چلا گیا تو سب پر ان کا نفاق ظاہر ہو گیا۔ اب آئندہ اہل ایمان ان کی بات پر اعتبار تو نہیں کریں گے‘ ان کی چکنی چپڑی باتیں کان لگا کر تو نہیں سنیں گے۔ تو اللہ تعالیٰ نے چاہا کہ یہ بالکل واضح ہو جائے کہ Who is who & what is what?۔

             وَقِیْلَ لَہُمْ تَـعَالَــوْا قَاتِلُوْا فِیْ سَبِیْلِ اللّٰہِ اَوِ ادْفَعُوْا:  ’’اور ان (منافقوں) سے کہا گیا کہ آئو اللہ کی راہ میں جنگ کرو یا (کم از کم اپنے شہر کا)دفاع کرو۔‘‘

            عبد اللہ بن اُبی جب اپنے تین سو آدمیوں کو لے کر واپس جا رہا تھا تو اس وقت ان سے کچھ لوگوں نے کہا ہو گا کہ بیوقوفو! کہاں جا رہے ہو؟ اس وقت تو لشکر سامنے ہے۔ اگر ایک ہزار میں سے تین سو آدمی نکل جائیں گے تو باقی لوگوں کے دلوں میں بھی کچھ نہ کچھ کمزوری پیدا ہو گی۔اگر تم میدانِ جنگ میں دشمن کا مقابلہ نہیںکر سکتے تو کم از کم مدینہ کے دفاع کے لیے تو کمربستہ ہو جائو۔ اگر مدینہ پر حملہ ہوا تو کیا ہو گا؟ اگر یہاں پر یہ لشکر شکست کھا گیا تو کیا دشمن تمہاری بہوبیٹیوں کو اپنی باندیاںبنا کر نہیں لے جائیں گے؟

             قَالُـوْا لَـوْ نَعْلَمُ قِتَالاً لاَّتَّــبَعْنٰــکُمْ:  ’’انہوںنے کہا کہ اگر ہم سمجھتے کہ جنگ ہونی ہے تو ہم ضرور تمہارا ساتھ دیتے۔‘‘

            یعنی یہ تو درحقیقت نورا کشتی ہو رہی ہے‘ یہ حقیقت میں جنگ ہے ہی نہیں۔ یہ جو مکہ سے  محمد  کے ساتھی مہاجرین آئے ہیں اور اب یہ جو مکہ ہی سے لشکر ہم پر چڑھائی کر کے آیا ہے یہ سب ایک ہی تھیلے کے چٹے بٹے ہیں اور ہمارا ان سے کوئی سروکار نہیں۔

             ہُمْ لِلْکُفْرِ یَوْمَئِذٍ اَقْرَبُ مِنْہُمْ لِلْاِیْمَانِ:   ’’یہ لوگ اُس دن ایمان کی نسبت کفر سے قریب تر تھے۔‘‘

             یَـقُوْلُوْنَ بِاَفْوَاہِہِمْ  مَّا لَــیْسَ فِیْ قُلُوْبِہِمْ:  ’’یہ اپنے مونہوں سے وہ بات کہہ رہے ہیں جو ان کے دلوں میں نہیں ہے۔‘‘

             وَاللّٰہُ اَعْلَمُ بِمَا یَکْتُمُوْنَ:  ’’اور اللہ اس چیز کو خوب جانتا ہے جو کچھ وہ چھپا رہے ہیں۔‘‘ 

 آیت 168:   اَلَّذِیْنَ قَالُوْا لِاِخْوَانِہِمْ وَقَـعَدُوْا لَــوْ اَطَاعُوْنَا مَا قُتِلُوْا:  ’’یہ وہ لوگ ہیں جو خود تو بیٹھے رہے اور اپنے (شہید ہوجانے والے) بھائیوں کی نسبت کہا کہ اگر وہ بھی ہمارے ساتھ آ گئے ہوتے تو قتل نہ ہوتے۔‘‘

             قُلْ فَادْرَءُوْا عَنْ اَنْفُسِکُمُ الْمَوْتَ اِنْ کُنْتُمْ صٰدِقِیْنَ:  ’’تو (اے نبی ) ان سے کہیے اچھا اگر تم (اپنے اس قول میں) سچے ہو تو اپنی جانوں سے موت کو ہٹا کر دکھا دو۔‘‘

            کیا تم اپنے آپ سے موت کو ٹال لو گے؟ خود موت سے بچے رہو گے؟ کیا موت تمہیں اپنے گھروں میں نہیں آئے گی؟

  آیت 169:  وَلاَ تَحْسَبَنَّ الَّذِیْنَ قُتِلُوْا فِیْ سَبِیْلِ اللّٰہِ اَمْوَاتًا:  ’’اور ہرگز نہ سمجھنا اُن لوگوں کو جو اللہ کی راہ میں قتل ہو جائیں کہ وہ مردہ ہیں۔‘‘    ُ

            یہی مضمون قبل ازیں سورۃ البقرۃ میں آ چکا ہے:  وَلاَ تَقُوْلُوْا لِمَنْ یُقْتَلُ فِیْ سَبِیْلِ اللّٰہِ اَمْوَاتٌ بَلْ اَحْیَــآءٌ وَّلٰــکِنْ لاَّ تَشْعُرُوْنَ. 

             بَلْ اَحْیَــآءٌ عِنْدَ رَبِّہِمْ یُرْزَقُوْنَ: ’’بلکہ وہ تو زندہ ہیں‘ اپنے ربّ کے پاس رزق پا رہے ہیں۔‘‘ 

  آیت 170:  فَرِحِیْنَ بِمَآاٰتٰـٹہُمُ اللّٰہُ مِنْ فَضْلِہ:   ’’شاداں و فرحاں ہیں اُس پر جو کچھ اللہ تعالیٰ نے انہیں اپنے فضل سے عطا کیا ہے‘‘

             وَیَسْتَـبْشِرُوْنَ بِالَّذِیْنَ لَمْ یَلْحَقُوْا بِہِمْ مِّنْ خَلْفِہِمْ:  ’’اور بشارت حاصل کر رہے ہیں اُن لوگوں کے بارے میں جو ان کے پیچھے (دنیا میں) رہ گئے ہیں اور ابھی اُن سے نہیں ملے‘‘

             اَلاَّ خَوْفٌ عَلَـیْہِمْ وَلاَ ہُمْ یَحْزَنُوْنَ:  ’’کہ نہ اُن پر کوئی خوف ہو گا اور نہ وہ حزن سے دوچار ہوں گے۔‘‘ 

  آیت 171:   یَسْتَبْشِرُوْنَ بِنِعْمَۃٍ مِّنَ اللّٰہِ وَفَضْلٍ:  ’’وہ خوشیاں منا رہے ہیں اللہ تعالیٰ کی نعمت کی وجہ سے اور اس کے فضل کی بنا پر‘‘

              وَّاَنَّ اللّٰہَ لاَ یُضِیْعُ اَجْرَ الْمُؤْمِنِیْنَ:  ’’اوراس بات پر کہ اللہ تعالیٰ اہل ایمان کے اجر کو ضائع نہیں کرتا۔‘‘

            اب آگے جو آیات آ رہی ہیں ان کے بارے میں تاریخ وسیرت کی کتابوں میں دو قسم کی روایات آتی ہیں۔ ایک تو یہ کہ کفار کی فوج کے واپس چلے جانے کے بعد رسول اللہ  نے بعض ضروری امور نمٹائے اور شہداء کی تدفین کی۔ اس کے بعد آپ  کو اچانک خیال آیا کہ یہ کفار چلے توگئے ہیں‘ لیکن ہو سکتا ہے انہیں اپنی غلطی کا احساس ہوکہ اس وقت تو مسلمان اس حالت میں تھے کہ ہم انہیں ختم کر سکتے تھے‘ لہٰذا وہ کہیں دوبارہ پلٹ کر حملہ آور نہ ہو جائیں۔ چنانچہ رسول اللہ  نے مسلمانوں کو قریش کے تعاقب کے لیے تیار ہو جانے کا حکم دیا‘ تاکہ انہیں معلوم ہو جائے کہ ہم نے ہمت نہیں ہاردی۔ اس کے باوجود کہ اہل ایمان کے جسم زخموں سے چور چور تھے‘ اتنا بڑا صدمہ پہنچا تھا‘ وہ پھر تیار ہو گئے اور حضور  جان نثاروں کی ایک جماعت کے ساتھ کفار کے تعاقب میں حمراء الاسد تک گئے جو مدینہ سے آٹھ میل کے فاصلے پر ہے۔ ادھر ابوسفیان کو واقعتا اپنی غلطی کا احساس ہو چکا تھا اور وہ مقام روحاء پر رک کر اپنی فوج کی ازسرنوتنظیم کر کے واپس پلٹ کر مدینہ پر حملہ آور ہونے کا ارادہ کر رہا تھا۔ ادھر سے آنے والے ایک تاجر سے اس نے کہا بھی تھا کہ جا کر مسلمانوں کو بتا دو کہ میں بہت بڑا لشکر لے کر دوبارہ آ رہا ہوں۔ لیکن جب ابوسفیان نے دیکھا کہ مسلمانوں کے عزم و حوصلہ میں کوئی کمی نہیں آئی ہے اور وہ ان کے تعاقب میں آ رہے ہیں تو ارادہ بدل لیا اور لشکرکو مکہ کی طرف کوچ کا حکم دے دیا۔

            اسی طرح کا ایک اور واقعہ بیان ہوتا ہے کہ ابوسفیان جاتے ہوئے یہ کہہ گیا تھا کہ اب اگلے سال بدر میں دوبارہ ملاقات ہو گی۔ یعنی ایک سال پہلے بدر میں جنگ ہوئی تھی‘ اب اُحد میں ہمارا مقابلہ ہو گیا۔ اب اگلے سال پھر ہمارے اور تمہارے درمیان تیسرا مقابلہ بدر میں ہوگا۔ چنانچہ اگلے سال رسول اللہ  صحابہ کرامjکو لے کر بدر تک گئے۔ یہ مہم ’’بدرِ صغریٰ‘‘ کہلاتی ہے۔ ادھر سے ابوسفیان پورے لائو لشکر کے ساتھ آ گیا اور اس مرتبہ بھی کچھ لوگوں کے ذریعہ سے اہل ایمان میں خوف و ہراس پھیلانے کی کوشش کی کہ لوگو کیا کر رہے ہو ‘ قریش تو بہت بڑا لشکر لے کر آ رہے ہیں‘تم اس کا مقابلہ نہ کر پائو گے! تو اس کے جواب میں مسلمانوں نے صبر و توکل کا مظاہرہ کیا اور وہ کلمات کہے جو آگے آ رہے ہیں ۔ تو یہ آیات دونوں واقعات پر منطبق ہو سکتی ہیں۔