كن عورتوں سے نكاح حرام هے

  آیت 221:    وَلاَ تَنْکِحُوا الْمُشْرِکٰتِ حَتّٰی یُؤْمِنَّ :   «اور مشرک عورتوں سے نکاح نہ کرو جب تک کہ وہ ایمان نہ لے آئیں۔ »

       وَلَاَمَۃٌ مُّؤْمِنَۃٌ خَیْرٌ مِّنْ مُّشْرِکَۃٍ وَّلَوْ اَعْجَبَتْکُمْ :   «اورایک مؤمنہ لونڈی بہتر ہے ایک آزاد مشرکہ عورت سے اگرچہ وہ تمہیں اچھی بھی لگتی ہو۔ »

        وَلاَ تُنْکِحُوا الْمُشْرِکِیْنَ حَتّٰی یُؤْمِنُوْا :   «اور اپنی عورتیں مشرکوں کے نکاح میں مت دو جب تک کہ وہ ایمان نہ لے آئیں۔ »

       وَلَـعَبْدٌ مُّؤْمِنٌ خَیْرٌ مِّنْ مُّشْرِکٍ وَّلَوْ اَعْجَبَکُمْ :   «اورایک مؤمن غلام بہتر ہے ایک آزاد مشرک مرد سے اگرچہ وہ تمہیں پسند بھی ہو۔ »

      خواہ وہ صاحب حیثیت اور مال دار ہو‘ لیکن دولت ایمان سے محروم ہو تو تمہارے لیے جائز نہیں ہے کہ اپنی بہن یا بیٹی اس کے نکاح میں دے دو۔

        اُولٰٓئِکَ یَدْعُوْنَ اِلَی النَّارِ :   «یہ لوگ آگ کی طرف بلا رہے ہیں۔ »

      اگر ان سے رشتے ناتے جوڑو گے تو وہ تمہیں بھی جہنم میں لے جائیں گے اور تمہاری اولاد کو بھی۔

      وَاللّٰـہُ یَدْعُوْٓا اِلَی الْجَنَّۃِ وَالْمَغْفِرَۃِ بِاِذْنِہ :   «اور اللہ تمہیں بلا رہا ہے جنت کی طرف اور مغفرت کی طرف اپنے حکم سے۔ »

        وَیُـبَـیِّنُ اٰیٰـتِہ لِلنَّاسِ لَعَلَّہُمْ یَتَذَکَّرُوْنَ :   «اور وہ اپنی آیات واضح کر رہا ہے لوگوں کے لیے تاکہ وہ نصیحت حاصل کریں۔ » 

 آیت 23:   حُرِّمَتْ عَلَیْـکُمْ اُمَّہٰتُـکُمْ وَبَنٰـتُـکُمْ وَاَخَوٰتُـکُمْ: ’’حرام کر دی گئیں تم پر تمہاری مائیں اور تمہاری بیٹیاں اور تمہاری بہنیں‘‘

             وَعَمّٰتُـکُمْ وَخٰلٰـتُـکُمْ: ’’اور تمہاری پھوپھیاں اور تمہاری خالائیں‘‘

             وَبَنٰتُ الْاَخِ وَبَنٰتُ الْاُخْتِ: ’’اور تمہاری بھتیجیاں اور بھانجیاں‘‘

             وَاُمَّہٰتُـکُمُ الّٰتِیْ اَرْضَعْنَـکُمْ: ’’اور تمہاری وہ مائیں جنہوں نے تمہیں دودھ  پلایا ہے‘‘

             وَاَخَوٰتُـکُمْ مِّنَ الرَّضَاعَۃِ: ’’اور تمہاری دودھ شریک بہنیں‘‘

             وَاُمَّہٰتُ نِسَآئِکُمْ: ’’اور تمہاری بیویوں کی مائیں‘‘

            جن کو ہم ساس یا خوش دامن کہتے ہیں۔

             وَرَبَــآئِبُـکُمُ الّٰتِیْ فِیْ حُجُوْرِکُمْ: ’’اور تمہاری ربیبائیں جو تمہاری گودوں میں پلی بڑھی ہوں‘‘

             مِّنْ نِّسَآئِکُمُ الّٰتِیْ دَخَلْتُمْ بِہِنَّ: ’’تمہاری اُن بیویوں سے جن کے ساتھ تم نے مقاربت کی ہو‘‘

             فَاِنْ لَّمْ تَـکُوْنُوْا دَخَلْتُمْ بِہِنَّ فَلاَ جُنَاحَ عَلَـیْـکُمْ: ’’اور اگر تم نے ان بیویوں سے مقاربت نہ کی ہو تو تم پر کچھ گناہ نہیں‘‘

            ’’ربیبہ‘‘ بیوی کی اُس لڑکی کو کہا جاتا ہے جو اس کے سابق شوہر سے ہو۔ اگر موجودہ شوہر اس بیوی سے تعلق زن و شو قائم ہونے کے بعد اس کو طلاق دے دے تو ربیبہ کو اپنے نکاح میں نہیں لا سکتا‘ یہ اس کے لیے حرام ہے۔ لیکن اگر اس بیوی کے ساتھ تعلق زن و شو قائم نہیں ہوا اوراسے طلاق دے دی تو پھر ربیبہ کے ساتھ نکاح ہو سکتا ہے۔چنانچہ فرمایا کہ اگر تم نے ان بیویوں کے ساتھ مقاربت نہ کی ہو تو پھر (انہیں چھوڑ کر ان کی لڑکیوں سے نکاح کر لینے میں) تم پر کوئی گناہ نہیں۔  ِ

             وَحَلَآئِلُ اَ بْـنَــآئِکُمُ الَّذِیْنَ مِنْ اَصْلاَبِکُمْ: ’’اور تمہارے اُن بیٹوں کی بیویاں جو تمہاری صلب سے ہوں‘‘

            جن کو ہم بہوئیں کہتے ہیں۔ اپنے صلبی بیٹے کی بیوی سے نکاح حرام ہے۔ البتہ منہ بولے بیٹے کی مطلقہ بیوی سے نکاح میں کوئی حرج نہیں۔   ُ  ّ 

             وَاَنْ تَجْمَعُوْا بَیْنَ الْاُخْتَــیْنِ: ’’اور یہ (بھی تم پر حرام کر دیا گیا ہے) کہ تم بیک وقت دو بہنوں کو ایک نکاح میں جمع کرو‘‘

             اِلاَّ مَا قَدْ سَلَفَ: ’’سوائے اس کے کہ جو گزر چکا۔‘‘

             اِنَّ اللّٰہَ کَانَ غَفُوْرًا رَّحِیْمًا: ’’یقینا اللہ غفور اور رحیم ہے۔‘‘

            جو پہلے ہو گیا سو ہو گیا۔ اب گڑے مردے تو اکھاڑے نہیں جا سکتے۔ لیکن آئندہ کے لیے یہ محرمات ابدیہ ہیں۔ اس میں رسول اللہ نے اضافہ کیا ہے کہ جس طرح دو بہنوں کو بیک وقت نکاح میں نہیں رکھ سکتے اسی طرح خالہ بھانجی کو اور پھوپھی بھتیجی کو بھی بیک وقت نکاح میںنہیں رکھ سکتے۔ یہ محرماتِ ابدیہ ہیں کہ جن کے ساتھ کسی حال میں‘  کسی وقت شادی نہیں ہوسکتی۔ اب وہ محرمات بیان ہو رہی ہیں جو عارضی ہیں۔   ّ   ُ

 آیت 24:    وَّالْمُحْصَنٰتُ مِنَ النِّسَآءِ: ’’اور وہ عورتیں (بھی تم پر حرام ہیں) جو کسی اور کے نکاح میں ہوں‘‘

            چونکہ وہ کسی اور کے نکاح میں ہیں اس لیے آپ پر حرام ہیں۔ ایک عورت کو اگر اس کا شوہر طلاق دے دے تو آپ اس سے نکاح کر سکتے ہیں۔ چنانچہ یہ حرمت ابدی نوعیت کی نہیں ہے۔ ’’مُحْصَنٰت‘‘ اُن عورتوں کو کہا جاتا ہے جو کسی کی قید نکاح میں ہوں۔ ’’حِصن‘‘ قلعے کو کہتے ہیں اور ’’اِحصان‘‘ کے معنی کسی شے کو اپنی حفاظت میں لینے کے بھی اور کسی کی حفاظت میں ہونے کے بھی ۔ چنانچہ ’’مُحْصَنٰت‘‘ وہ عورتیں ہیں جو ایک خاندان کے قلعے کے اندر محفوظ ہیں اور شوہر والیاں ہیں۔ نیز یہ لفظ لونڈیوں کے مقابل آزاد خاندانی شریف زادیوں کے لیے بھی استعمال ہوتا ہے۔

             اِلاَّ مَا مَلَـکَتْ اَیْمَانُکُمْ:’’سوائے اس کے کہ جو تمہاری مِلکِ یمین بن جائیں۔‘‘

            یعنی جنگ کے نتیجے میں تمہارے ہاں کنیزیں بن کر آ جائیں۔ یہ عورتیں اگرچہ مشرکوں کی بیویاں ہیں لیکن وہ لونڈیوں کی حیثیت سے آپ کے لیے جائز ہوں گی۔

             کِتٰبَ اللّٰہِ عَلَـیْـکُمْ: ’’یہ تم پر اللہ کا لکھا ہوا فریضہ ہے۔‘‘

            یہ اللہ کا قانون ہے جس کی پابندی تم پر لازم کر دی گئی ہے۔

             وَاُحِلَّ لَـکُمْ مَّا وَرَآء ذٰلِکُمْ: ’’ان کے سوا جو عورتیں ہیں وہ تمہارے لیے حلال ہیں‘‘

            آپ نے دیکھا کہ کتنی تھوڑی سی تعداد میں محرمات ہیں‘ جن سے نکاح حرام قرار دے دیا گیا ہے‘ باقی کثیر تعداد حلال ہے۔ یعنی مباحات کا دائرہ بہت وسیع ہے جبکہ محرمات کا دائرہ بہت محدود ہے۔

             اَنْ تَـبْـتَغُوْا بِاَمْوَالِکُمْ: ’’کہ تم اپنے مال کے ذریعے ان کے طالب بنو‘‘

            یعنی ان کے مہر ادا کر کے ان کے ساتھ نکاح کرو۔

             مُّحْصِنِیْنَ غَیْرَ مُسٰفِحِیْنَ: ’’بشرطیکہ حصارِ نکاح میں ان کو محفوظ کرو‘ نہ یہ کہ آزاد شہوت رانی کرنے لگو۔‘‘

            یعنی نیت گھر بسانے کی ہو‘ صرف مستی نکالنے کی نہیں۔ اس کو محض ایک کھیل اور مشغلہ نہ بنا لو۔

             فَمَا اسْتَمْتَعْتُمْ بِہ مِنْہُنَّ فَاٰتُوْہُنَّ اُجُوْرَہُنَّ فَرِیْضَۃً: ’’پس جو بھی تم نے ان سے تمتع کیا ہو تو اس کے بدلے ان کے مہر ادا کرو‘  جو مقرر ہوئے تھے۔‘‘

             وَلاَ جُنَاحَ عَلَـیْکُمْ فِیْمَا تَرٰضَیْتُمْ بِہ مِنْ بَعْدِ الْفَرِیْضَۃِ: ’’البتہ اس کا تم پر کوئی گناہ نہیں ہے کہ مہر مقرر ہونے کے بعد باہمی رضامندی سے کوئی کمی بیشی کرلو۔‘‘

              اِنَّ اللّٰہَ کَانَ عَلِیْمًا حَکِیْمًا: ’’یقینا اللہ تعالیٰ علیم اور حکیم ہے۔‘‘