زكاة، صدقات اور ان كے مصارف كا بيان

آیت 215:   یَسْئَلُوْنَکَ مَاذَا یُنْفِقُوْنَ :   «یہ آپ سے پوچھتے ہیں کہ کیا خرچ کریں؟»

            یعنی انفاق کے لیے جو کہا جا رہا ہے تو ہم کیا خرچ کریں؟ کتنا خرچ کریں؟ انسان بھلائی کے لیے جو بھی خرچ کرے تو اس میں سب سے پہلا حق کن کا ہے؟

             قُلْ مَآ اَنْفَقْتُمْ مِّنْ خَیْرٍ :   «کہہ دیجیے جو بھی تم خرچ کرو مال و اسباب میں سے»

             فَلِلْوَالِدَیْنِ وَالْاَقْرَبِیْنَ وَالْیَتٰمٰی وَالْمَسٰکِیْنِ وَابْنِ السَّبِیْلِ :   «تو والدین‘ رشتے داروں‘ یتیموں‘ مسکینوں اور مسافروں کے لیے (خرچ کرو)۔ »

            سب سے پہلا حق والدین کا ہے‘ اس کے بعد درجہ بدرجہ قرابت داروں‘ یتیموں‘ مسکینوں اور مسافروں کا حق ہے۔

             وَمَا تَفْعَلُوْا مِنْ خَیْرٍ فَاِنَّ اللّٰہَ بِہ عَلِیْمٌ :   «اور جو خیر بھی تم کماؤ گے اللہ اس سے اچھی طرح باخبر ہے۔ »

            تم جو بھی اچھا کام کرو گے تو جان لو کہ وہ اللہ کے علم میں ہے۔  ضرورت نہیں ہے کہ دنیا اس سے واقف ہو‘ تمہیں اگر اللہ سے اجر لینا ہے تو وہ تورات کے اندھیرے میں بھی دیکھ رہا ہے۔  اگر تمہارے دائیں ہاتھ نے دیا ہے اور بائیں کو پتا نہیں چلا تو اللہ کو تو پھر بھی پتا چل گیا ہے۔  تو تم خاطر جمع رکھو‘ تمہاری ہر نیکی اللہ کے علم میں ہے اور وہ اسے ضائع نہیں کرے گا۔  

            اب اگلی آیت میں قتال کے مضمون کا تسلسل ہے۔  میں نے سورۃ البقرۃ کے نصف ِآخر کے مضامین کو چار مختلف رنگوں کی لڑیوں سے تشبیہہ دی تھی‘ جن کو باہم بٹ لیا جائے تو چاروں رنگ کٹے پھٹے نظر آتے ہیں اور اگر انہیں کھول دیا جائے تو ہر رنگ مسلسل نظر آتا ہے۔  

 آیت 267:    یٰٓــاَیـُّـہَا الَّذِیْنَ اٰمَنُوْٓا اَنْفِقُوْا مِنْ طَیِّبٰتِ مَا کَسَبْتُمْ :   «اے ایمان والو! اپنے کمائے ہوئے پاکیزہ مال میں سے خرچ کرو۔ »

            اللہ کے دین کے لیے خرچ کرنا ہے‘ اللہ کے نام پر دینا ہے تو جو کچھ تم نے کمایا ہے اس میں سے اچھی چیز‘ پاکیزہ چیز‘ بہتر چیز نکالو۔  

             وَمِمَّآ اَخْرَجْنَا لَـکُمْ مِّنَ الْاَرْضِ :   «اوراس میں سے خرچ کرو جو کچھ ہم نے نکالا ہے تمہارے لیے زمین سے۔ »

            ظاہر بات ہے کہ زمین سے جو بھی نباتات باہر آ رہی ہیں ان کا پیدا کرنے والا اللہ ہے۔  چاہے کوئی چراگاہ ہے تو اس کے اندر جو ہریاول ہے وہ اللہ ہی نے پیدا کی ہے ۔  کھیت کے اندر آپ نے محنت کی ہے‘ ہل چلایا ہے‘ بیج ڈالے ہیں‘ لیکن فصل کا اُگانا تو آپ کے اختیار میں نہیں ہے‘ یہ تو اللہ کے ہاتھ میں ہے۔   «پالتا ہے بیج کو مٹی کی تاریکی میں کون؟»  چنانچہ فرمایا کہ جو کچھ ہم نے تمہارے لیے زمین سے نکالا ہے اُس میں سے ہماری راہ میں خرچ کرو!

             وَلاَ تَـیَمَّمُوا الْخَبِیْثَ مِنْہُ تُنْفِقُوْنَ :   «اور اس میں سے ردّی مال کا ارادہ نہ کرو کہ اسے خرچ کر دو!»

            ایسا نہ ہو کہ اللہ کی راہ میں خرچ کرنے کے لیے ردّی اور ناکارہ مال چھانٹنے کی کوشش کرنے لگو۔  مثلاً بھیڑ بکریوں کا گلہ ہے‘ اس میں سے تمہیں زکوٰۃ کے لیے بھیڑیں اور بکریاں نکالنی ہیں تو ایسا ہرگز نہ ہو کہ جو کمزور ہیں‘ ذرا لاغر ہیں‘ بیمار ہیں‘ نقص والی ہیں انہیں نکال کر گنتی پوری کر دو۔  اسی طرح عشر ُنکالنا ہے تو ایسا نہ کرو کہ گندم کے جس حصے پر بارش پڑ گئی تھی وہ نکال دو۔  تیمم کے معنی قصد اور ارادہ کرنے کے ہیں۔

             وَلَسْتُمْ بِاٰخِذِیْہِ اِلَّآ اَنْ تُغْمِضُوْا فِیْہِ :   «اور تم ہرگز نہیں ہو گے اس کو لینے والے (اگر وہ شے تم کو دی جائے) الا یہ کہ چشم پوشی کر جاؤ۔ »   ّ

            ایسا بھی تو ہو سکتا ہے کہ تم محتاج ہو جاؤ اور تمہیں ضرورت پڑ جائے‘ پھر اگر تمہیں کوئی ایسی چیز دے گا تو تم قبول نہیں کرو گے‘ اِلا ّیہ کہ چشم پوشی کرنے پر مجبور ہو جاؤ۔  احتیاج اس درجے کی ہو کہ نفیس یا خبیث جو شے بھی مل جائے چشم پوشی کرتے ہوئے اسے قبول کر لو۔ ورنہ آدمی اپنے طیب ِخاطر کے ساتھ ردی شے قبول نہیں کر سکتا۔

             وَاعْلَمُوْٓا اَنَّ اللّٰہَ غَنِیٌّ حَمِیْدٌ:   «اور خوب جان رکھو کہ اللہ تعالیٰ غنی ہے اور حمید ہے۔ »

            یہاں «غنی» کا لفظ دوبارہ آیا ہے۔  یہ نہ سمجھو کہ تم کسی محتاج اور ضرورت مند کو دے رہے ہو‘ بلکہ یوں سمجھو کہ اللہ کو دے رہے ہو‘ جو غنی ہے ‘سب کی ضرورتیں پوری کرنے والا ہے اور حمید ہے‘ یعنی اپنی ذات میں خود محمود ہے۔  ایک تو کسی شے کی اچھائی یا حسن یا کمال ایسا ہوتا ہے کہ جسے ظاہر کیا جائے کہ بھئی دیکھو اس میں یہ خوبصورتی ہے۔  اور ایک وہ خوبصورتی ہوتی ہے جو ازخود ظاہر ہو۔    «حاجت ِمشاطہ ّنیست روئے دل آرام را!»  تو اللہ تعالیٰ اتنا ستودہ صفات ہے کہ وہ اپنی ذات میں از خود محمود ہے‘ اسے کسی حمد کی حاجت نہیں ہے۔  

 آیت 271:    اِنْ تُبْدُوا الصَّدَقٰتِ فَنِعِمَّا ہِیَ :   «اگر تم صدقات کو علانیہ دو تو یہ بھی اچھا ہے۔ »

            خاص طور پر زکوٰۃ کا معاملہ تو علانیہ ہی ہے۔  تو اگر تم اپنے صدقات ظاہر کر کے دو تو یہ بھی ٹھیک ہے۔ اس لیے کہ کم سے کم فقراء کا حق تو ادا ہو گیا‘ کسی کی ضرورت تو پوری ہو گئی۔  

             وَاِنْ تُخْفُوْہَا وَتُؤْتُوْہَا الْفُقَرَآءَ فَہُوَ خَیْرٌ لَّــکُمْ :   «اور اگر تم انہیں چھپاؤ اور چپکے سے ضرورت مندوں کو دے دو تو یہ تمہارے لیے بہتر ہے۔ »

            یاد رہے کہ یہ بات صدقاتِ نافلہ کے لیے ہے۔  لیکن جو صدقات واجبہ ہیں‘ جو لازماً دینے ہیں‘ مثلاً زکوٰۃ اور عشر‘ ان کے لیے اخفاء نہیں ہے۔  یہ دین کی حکمت ہے‘ اس کو ذہن میں رکھیے کہ فرض عبادات علانیہ ادا کی جائیں گی۔  یہ وسوسہ بھی شیطان بہت سوں کے دلوں میں ڈال دیتا ہے کہ کیا پانچ وقت مسجد میں جا کر نماز پڑھنے سے لوگوں پر اپنے تقویٰ کا رعب ڈالنا چاہتے ہو؟ گھر میں پڑھ لیا کرو! یا داڑھی اس لیے رکھو گے کہ لوگ تمہیں سمجھیں کہ بڑا متقی ہے؟ ایسے وساوسِ شیطانی کو کوئی اہمیت نہیں دینی چاہیے اور جو چیز فرض و واجب ہے‘ وہ علی الاعلان کرنی چاہیے‘ اس کے اظہار میں کوئی رکاوٹ نہیں آنی چاہیے۔  ہاں جو نفلی عبادات ہیں‘ صدقاتِ نافلہ ہیں یا نفل نماز ہے اسے چھپا کر کرنا چاہیے۔  نفل عبادت کا اظہار بہت بڑا فتنہ ہے۔  لہٰذا فرمایا کہ اگر تم اپنے صدقات چھپا کر چپکے سے ضرورت مندوں کو دے دو تو وہ تمہارے لیے بہت بہتر ہے۔

             وَیُکَفِّرُ عَنْکُمْ مِّنْ سَیِّاٰتِکُمْ :   «اور اللہ تعالیٰ تم سے تمہاری برائیوں کو دور کر دے گا۔ »

             وَاللّٰہُ بِمَا تَعْمَلُوْنَ خَبِیْرٌ :   «اور جو کچھ تم کر رہے ہو اللہ تعالیٰ اس سے باخبر ہے۔ »

            اب واضح کیا جا رہا ہے کہ انفاق فی سبیل اللہ کا سب سے بڑھ کر حق دار کون ہے۔  

 آیت 273:    لِلْفُقَرَآءِ الَّذِیْنَ اُحْصِرُوْا فِیْ سَبِیْلِ اللّٰہِ :   «یہ ان ضرورت مندوں کے لیے ہے جو گِھر کر رہ گئے ہیں اللہ کی راہ میں»

            جیسے رسول اللہ  کے دور میں اصحابِ صفہ تھے کہ مسجد نبوی میں آ کر بیٹھے ہوئے ہیں اوراپنا وقت تلاشِ معاش میں َصرف نہیں کر رہے‘ آنحضور  سے علم سیکھ رہے ہیں اور جہاں جہاں سے مطالبہ آرہا ہے کہ معلمین اور مبلغین ّکی ضرورت ہے وہاں ان کو بھیجا جا رہا ہے۔  اگر وہ معاش کی ّجدوجہد ُکرتے تو یہ تعلیم کیسے حاصل کرتے؟ اسی طرح دین کی کسی خدمت کے لیے کچھ لوگ اپنے آپ کو وقف کر دیتے ہیں تو وہ اس کا مصداق ہوں گے۔  آپ نے دین کی دعوت و تبلیغ اور نشر واشاعت کے لیے کوئی تحریک اٹھائی ہے تو اس میں کچھ نہ کچھ ہمہ وقتی کارکن درکار ہوں گے۔  ان کارکنوں کی معاش کا مسئلہ ہو گا۔  وہ آٹھ آٹھ گھنٹے دفتروں میں جا کر کام کریں اور وہاں افسروں کی ڈانٹ ڈپٹ بھی سنیں‘ آنے جانے میں بھی دو دو گھنٹے لگائیں تو اب وہ دین کے کام کے لیے کون سا وقت نکالیں گے اور کیا کام کریں گے؟ لہٰذا کچھ لوگ تو ہونے چاہئیں جو اس کام میں ہمہ وقت لگ جائیں۔  لیکن پیٹ تو ان کے ساتھ بھی ہیں‘ اولاد تو ان کی بھی ہو گی۔  

             لاَ یَسْتَطِیْعُوْنَ ضَرْبًا فِی الْاَرْضِ :   «وہ (اپنے کسب معاش کے لیے) زمین میں دوڑ دھوپ نہیں کر سکتے۔ »

            زمین کے اندر گھوم پھر کر تجارت کرنے کا ان کے پاس وقت ہی نہیں ہے۔  

             یَحْسَبُہُمُ الْجَاہِلُ اَغْنِیَـآءَ مِنَ التَّعَفُّفِ :   «نا واقف آدمی ان کو خوشحال خیال کرتا ہے ان کی خود داری کے سبب۔ »

            یہ اس طرح کے فقیر تو ہیں نہیں جو لپٹ کر مانگتے ہوں۔  ان کی خود داری کی وجہ سے عام طورپر جو ناواقف شخص ہے وہ سمجھتا ہے کہ یہ غنی ہیں‘ خوشحال ہیں‘ انہیں کوئی ضرورت ہی نہیں‘ انہوں نے کبھی مانگا ہی نہیں۔  لیکن اس کی وجہ یہ ہے کہ وہ اس طرح کے سوالی نہیں ہیں‘ وہ فقیر نہیں ہیں‘ انہوں نے تو اللہ تعالیٰ کے دین کے لیے اپنے آپ کو لگا دیا ہے۔  یہ تمہارا کام ہے کہ انہیں تلاش کرو اور ان کی ضروریات پوری کرو۔  

             تَعْرِفُہُمْ بِسِیْمٰہُمْ :   «تم پہچان لو گے انہیں ان کے چہروں سے۔ »

            ظاہر بات ہے کہ فقر و احتیاج کا اثر چہرے پر تو آ جاتا ہے۔  اگر کسی کو صحیح غذا نہیں مل رہی ہے تو چہرے پر اس کا اثر ظاہر ہو گا۔  

             لاَ یَسْئَلُوْنَ النَّاسَ اِلْحَافًا :   «وہ لوگوں سے لپٹ کر سوال نہیں کرتے۔ »

            وہ ان سائلوں کی طرح نہیں ہیں جو اصل میں اپنی محنت کا صلہ وصول کرتے ہیں کہ آپ کے سر ہو کر آپ سے زبردستی کچھ نہ کچھ نکلوا لیتے ہیں۔  یہ بڑا اہم مسئلہ ہے کہ اقامت ِدین کی ّجدوجہد ُمیں جو لوگ ہمہ وقت لگ جائیں ‘ آخر ان کے لیے ذریعہ ٔ معاش کیا ہو؟ اس وقت اس پر تفصیل سے گفتگو ممکن نہیں۔  بہرحال یہ سمجھ لیجیے کہ یہ دو رکوع انفاق کے موضوع پر قرآن حکیم کا نقطہ ٔعروج ہیں اور یہ آخری آیت ان میں اہم ترین ہے۔  

             وَمَا تُنْفِقُوْا مِنْ خَیْرٍ فَاِنَّ اللّٰہَ بِہ عَلِیْمٌ :   «اور جو مال بھی تم خرچ کرو گے تو اللہ تعالیٰ اس کو خوب جانتا ہے۔ »

            یہ نہ سمجھنا کہ تمہارا انفاق اللہ  کے علم میں نہیں ہے۔  تم خاموشی کے ساتھ‘ اخفا کے ساتھ لوگوں کے ساتھ تعاون کرو گے تو اللہ تعالیٰ تمہیں اس کا بھر پور بدلہ دے گا۔ 

            اب ہم اس سورئہ مبارکہ کا جو رکوع پڑھ رہے ہیں یہ آج کے حالات میں اہم ترین ہے۔  یہ رکوع سود کی حرمت اور شناعت پر قرآن حکیم کا انتہائی اہم مقام ہے۔  اِس دَور میں اللہ تعالیٰ کے خلاف بغاوت کی سب سے بڑی صورت تو غیر اللہ کی حاکمیت کا تصور ہے‘ جو سب سے بڑا شرک ہے۔  اگرچہ نفسیاتی او ر داخلی اعتبار سے سب سے بڑا شرک مادّے پر توکل ّہے‘ لیکن خارجی اور واقعاتی دنیا میں اس وقت سب سے بڑا شرک غیر اللہ کی حاکمیت ہے‘ جو اَب «عوامی حاکمیت» کی شکل اختیار کر گئی ہے۔  اس کے بعد اس وقت کے گناہوں اور بدعملی میں سب سے بڑا فتنہ اور فساد سود کی بنیاد پر ہے۔ اِس وقت دنیا میں سب سے بڑی شیطنت جو یہودیوں کے ذریعے سے پورے کرئہ ارضی کو اپنی گرفت میں لینے کے لیے بے تاب ہے ‘وہ یہی سود کا ہتھکنڈا ہے۔  یہاں اس کی حرمت دو ٹوک انداز میں بیان کر دی گئی۔  اس مقام پر میرے ذہن میں کبھی کبھی ایک سوال پیدا ہوتا تھا کہ اس رکوع کی پہلی آیت کا تعلق تو انفاق فی سبیل اللہ سے ہے ‘ لہٰذا اسے پچھلے رکوع کے ساتھ شامل ہونا چاہیے تھا‘ لیکن بعد میں یہ حقیقت مجھ پر منکشف ہوئی کہ اس آیت کو بڑی حکمت کے ساتھ اس رکوع کے ساتھ شامل کیا گیا ہے۔  وہ حکمت مَیں بعد میں بیان کروں گا۔

 آیت 274:    اَلَّذِیْنَ یُنْفِقُوْنَ اَمْوَالَہُمْ بِالَّـیْلِ وَالنَّہَارِ :   «جو لوگ اپنا مال خرچ کرتے رہتے ہیں رات کو بھی اور دن میں بھی»

             سِرًّا وَّعَلاَنِیَۃً :   «خفیہ طور پر بھی اور علانیہ بھی»

            صدقاتِ واجبہ علانیہ اور صدقاتِ نافلہ خفیہ طور پر دیتے ہیں۔

             فَلَہُمْ اَجْرُہُمْ عِنْدَ رَبِّہِمْ وَلاَ خَوْفٌ عَلَیْہِمْ وَلاَ ہُمْ یَحْزَنُوْنَ :   «اُن کے لیے ان کا اجر (محفوظ) ہے ان کے ربّ کے پاس‘ نہ تو اُن پر کوئی خوف طاری ہو گا اور نہ ہی وہ کسی حزن سے دوچار ہوں گے۔ »

            اس کے برعکس معاملہ اُن کا ہے جو سود کھاتے ہیں ۔  وجہ کیا ہے؟ اصل مسئلہ ہے «قدرِ زائد» (surplus value) کا! آپ کا کوئی شغل ہے‘ کوئی کاروبار ہے یا ملازمت ہے‘ آپ کما رہے ہیں‘ اس سے آپ کا خرچ پورا ہو رہا ہے‘ کچھ بچت بھی ہو رہی ہے۔  اب اس بچت کا اصل مصرف کیا ہے؟ آیت: 219 میں ہم پڑھ آئے ہیں:  وَیَسْئَلُوْنَکَ مَاذَا یُنْفِقُوْنَ قُلِ الْعَفْوَ :   «لوگ آپ سے دریافت کرتے ہیں کہ (اللہ کی راہ میں) کتنا خرچ کریں؟ کہہ دیجیے جو بھی زائد از ضرورت ہو!» چنانچہ اصل راستہ تو یہ ہے کہ اپنی بچت کو اللہ کی راہ میں خرچ کر دو۔  یا محتاجوں کو دے دو یا اللہ کے دین کی نشرو اشاعت اور سر بلندی میں لگا دو۔  لیکن سود خورانہ ذہنیت یہ ہے کہ اس بچت کو بھی مزید کمائی کا ذریعہ بناؤ۔  لہٰذا اصل میں سود خوری انفاق فی سبیل اللہ کی ضد ہے ۔  یہ عقدہ مجھ پر اُس وقت کھلا جب میں نے «اَلْقُرْآنُ یُفَسِّرُ بَعْضُہ بَعْضًا» کے اصول کے تحت سورۃ الروم کی آیت: 39 کا مطالعہ کیا۔  وہاں بھی ان دونوں کو ایک دوسرے کے مقابلے میں لایا گیا ہے‘ اللہ کی رضا جوئی کے لیے انفاق اور اس کے مقابلے میں ربا ‘ یعنی سود پر رقم دینا۔  فرمایا:  وَمَآ اٰتَیْتُمْ مِّنْ رِّبًا لِّیَرْبُوَا فِیْ اَمْوَالِ النَّاسِ فَلَا یَرْبُوْا عِنْدَ اللّٰہِ :  «اور جو مال تم دیتے ہو سود پر تاکہ لوگوں کے اموال میں (شامل ہو کر) بڑھ جائے تو وہ اللہ کے ہاں نہیں بڑھتا»۔ محنت کوئی کر رہا ہے اور آپ اس کی کمائی میں سے اپنے سرمائے کی وجہ سے وصول کر رہے ہیں تو آپ کا مال اس کے مال میں شامل ہو کر اس کی محنت سے بڑھ رہا ہے۔  لیکن اللہ کے ہاں اس کی بڑھوتری نہیں ہوتی۔   وَمَآ اٰتَیْتُمْ مِّنْ زَکٰوۃٍ تُرِیْدُوْنَ وَجْہَ اللّٰہِ فَاُولٰٓئِکَ ہُمُ الْمُضْعِفُوْنَ :   «اور وہ جو تم زکوٰۃ (اور صدقات) میں دے دیتے ہو محض اللہ کی رضا جوئی کے لیے تویہی لوگ (اپنے مال اللہ کے ہاں) بڑھا رہے ہیں»۔ ان کا مال مسلسل بڑھ رہا ہے‘ اس کی بڑھوتری ہو رہی ہے۔  چنانچہ انفاق فی سبیل اللہ اور صدقات و زکوٰۃ وغیرہ کا معاملہ سود کے بالمقابل اور اس کے برعکس ہے۔ اپنے اس بچت کے مال کو یا تو کوئی اللہ کی راہ میں خرچ کرے گا یا پھر سودی منافع حاصل کرنے کا ذریعہ بنائے گا۔  اور آپ کو معلوم ہے کہ آج کے بینکنگ کے نظام میں سب سے زیادہ زور بچت (saving) پر دیا جاتا ہے اور اس کے لیے سیونگ اکاؤنٹ اور بہت سی ُپرکشش منافع بخش سکیمیں متعارف کرائی جاتی ہیں۔  ان کی طرف سے یہی ترغیب دی جاتی ہے کہ بچت کرو مزید کمانے کے لیے! بچت اس لیے نہیں کہ اپنا پیٹ کاٹو اور غرباء کی ضروریات پوری کرو‘ اپنا معیارِ زندگی کم کرو اور اللہ کے دین کے لیے خرچ کرو۔  نہیں‘ بلکہ اس لیے کہ جو کچھ تم بچاؤ وہ ہمیں دو‘ تاکہ وہ ہم زیادہ شرح سود پر دوسروں کو دیں اور تھوڑی شرح سود تمہیں دے دیں۔  چنانچہ انفاق اور سود ایک دوسرے کی ضد ہیں۔  فرمایا:

آیت 141:  وَہُوَ الَّذِیْٓ اَنْشَاَ جَنّٰتٍ مَّعْرُوْشٰتٍ وَّغَیْرَ مَعْرُوْشٰتٍ :  ’’اور وہی ہے(اللہ) جس نے پیدا کیے باغات وہ بھی جو ٹٹیوں پر چڑھائے جاتے ہیں اور وہ بھی جو نہیں چڑھائے جاتے،،

            ’ ’معروشات،، کے زمرے میں بیل نما پودے آتے ہیں، جن کا اپنا تنا نہیں ہوتا جس پر خود وہ کھڑے ہوسکیں۔ اس لیے ایسے پودوں کوسہارا دے کر کھڑا کرنا پڑتا ہے، جیسے انگور کی بیل وغیرہ۔ دوسری طرف ’’غیر معروشات،، میں عام درخت شامل ہیں جو خود اپنے مضبوط تنے پر کھڑے ہوتے ہیں، جیسے انار یا آم کا درخت ہے۔

            وَّالنَّخْلَ وَالزَّرْعَ مُخْتَلِفًا اُکُلُہ وَالزَّیْتُوْنَ وَالرُّمَّانَ مُتَشَابِہًا وَّغَیْرَمُتَشَابِہٍ:  ’’اور کھجور اور کھیتی، جس کے ذائقے مختلف ہیں، اور زیتون اور انار، ایک دوسرے سے ملتے جلتے بھی اور مختلف بھی۔،،

            یہ اللہ تعالیٰ کی صناعی کی مثالیں ہیں کہ اس نے مختلف النوع درخت، کھیتیاں اور پھل پیدا کیے، جو آپس میں ملتے جلتے بھی ہیں اور مختلف بھی۔ جیسے Citrus Family کے پھلوں میں کینو، فروٹر اورمالٹا وغیرہ شامل ہیں۔ بنیادی طور پر یہ سب ایک ہی قسم یا خاندان سے تعلق رکھتے ہیں اور شکل، ذائقہ وغیرہ میں ایک دوسرے کے مشابہ ہونے کے باوجود سب کی اپنی اپنی الگ پہچان ہے۔

            کُلُوْا مِنْ ثَمَرِہ اِذَا اَثْمَرَ وَاٰتُوْا حَقَّہ یَوْمَ حَصَادِہ:  ’’کھایا کرو ان کے پھلوں میں سے جبکہ وہ پھل دیں اور اللہ کا حق ادا کرو ان کے کاٹنے (اور توڑنے) کے دن،،

            یعنی جیسے زمین کی پیداوار میں سے عشر کا ادا کرنا فرض ہے، ایسے ہی ان پھلوں پر بھی زکوٰۃ دینے کا حکم ہے۔ لہٰذا کھیتی اور پھلوں کی پیداوار میں سے اللہ تعالیٰ کا حق نکال دیا کرو۔

            وَلاَ تُسْرِفُوْا اِنَّہ لاَ یُحِبُّ الْمُسْرِفِیْنَ:  ’’اور بے جا خرچ نہ کرو، یقینا اللہ کو بے جا خرچ کرنے والے پسند نہیں ہیں۔،، 

 آیت 60: اِنَّمَا الصَّدَقٰتُ لِلْفُقَرَآءِ وَالْمَسٰکِیْنِ وَالْعٰمِلِیْنَ عَلَیْہَا: ‘‘صدقات تو بس مفلسوں اور محتاجوں اور عاملین صدقات کے لیے ہیں‘‘

            صدقات سے مراد یہاں زکوٰۃ ہے۔ وَالْعٰمِلِیْنَ عَلَیْہَا میں محکمہ زکوٰۃ کے چھوٹے بڑے تمام ملازمین شامل ہیں جو زکوٰۃ اکٹھی کرنے‘ اس کا حساب رکھنے اور اسے مستحقین میں تقسیم کرنے یا اس محکمہ میں کسی بھی حیثیت میں مامور ہیں‘ ان سب ملازمین کی تنخواہیں اسی زکوٰۃ میں سے دی جائیں گی۔

            وَالْمُؤَلَّفَۃِ قُلُوْبُہُمْ: ‘‘اور ان کے لیے جن کی تالیف قلوب مطلوب ہو‘‘

            جب دین کی تحریک اور دعوت چل رہی ہو تو معاشرے کے بعض صاحب ِحیثیت افراد کی تالیف قلوب کے لیے زکوٰۃ کی رقم استعمال کی جا سکتی ہے تا کہ ایسے لوگوں کو کچھ دے دلا کر اُن کی مخالفت کا زور کم کیا جا سکے۔ فقہا ء کے نزدیک دین کے غالب ہو جانے کے بعد یہ مد ختم ہو گئی ہے‘ لیکن اگر پھر کبھی اس قسم کی صورتحال درپیش ہو تو یہ مد پھر سے بحال ہو جائے گی۔

            وَفِی الرِّقَابِ وَالْغٰرِمِیْنَ: ‘‘اور گردنوں کے چھڑانے میں‘ اور جن پر تاوان پڑا ہو (ان کے لیے)‘‘

            ایسا مقروض جو قرض کے بوجھ سے نکلنے کی مقدرت نہ رکھتا ہو یا ایسا شخص جس پر کوئی تاوان پڑ گیا ہو‘ ایسے لوگوں کی گلو خلاصی کے لیے زکوٰۃ کی رقم سے مدد کی جا سکتی ہے۔

            وَفِیْ سَبِیْلِ اللّٰہِ: ‘‘اور اللہ کی راہ میں‘‘

            یعنی اللہ کی راہ میں جہاد میں اور دعوت و اقامت دین کی جدوجہد میں بھی یہ رقم خرچ ہو سکتی ہے۔ لیکن زکوٰۃ اور صدقات کے سلسلے میں یہ نکتہ بہت اہم ہے کہ پہلی ترجیح کے طور پر اولین مستحقین وہ غرباء‘ یتامیٰ‘ مساکین اور بیوائیں ہیں جو واقعی محتاج ہوں۔ البتہ اگر زکوٰۃ کی کچھ رقم ایسے لوگوں کی مدد کے بعد بچ جائے تو وہ دین کے دوسرے کاموں میں صرف کی جا سکتی ہے۔

            وَابْنِ السَّبِیْلِ فَرِیْضَۃً مِّنَ اللّٰہِ وَاللّٰہُ عَلِیْمٌ حَکِیْمٌ: ‘‘اور مسافروں (کی امداد) میں۔ یہ اللہ کی طرف سے معین ہو گیا ہے۔ اور اللہ سب کچھ جاننے والا‘ حکمت والاہے۔‘‘

            «فَرِیْضَۃً مِّنَ اللّٰہِ» کے الفاظ احکامِ وراثت کے سلسلے میں سورۃ النساء کی  آیت ۱۱ میں بھی آئے ہیں۔ 

 آیت ۵۶: وَاَقِیْمُوا الصَّلٰوۃَ وَاٰتُوا الزَّکٰوۃَ وَاَطِیْعُوا الرَّسُوْلَ لَعَلَّکُمْ تُرْحَمُوْنَ: «اور نماز قائم کرو اور زکوٰۃ ادا کرو،اور رسول کی اطاعت کرو تا کہ تم پر رحم کیا جائے۔»

             یہاں روئے سخن منافقین کی طرف ہے۔ جیسا کہ پہلے بتایا جا چکا ہے کہ حضور کی شخصی اطاعت والا معاملہ ان پر بہت شاق گزرتا تھا اور ایسے ہر حکم پر وہ بار بار یہی کہتے تھے کہ آپ قرآنی آیات کے نزول کے بغیر ہی اپنی اطاعت کے بارے میں احکام جاری کرتے رہتے ہیں!

آیت ۶۷   وَالَّذِیْنَ اِذَآ اَنْفَقُوْا لَمْ یُسْرِفُوْا وَلَمْ یَقْتُرُوْا وَکَانَ بَیْنَ ذٰلِکَ قَوَامًا: ’’اور وہ لوگ کہ جب وہ خرچ کرتے ہیں تو نہ اسراف کرتے ہیں اور نہ بخل سے کام لیتے ہیں بلکہ (ان کا معاملہ) اس کے بین بین معتدل ہوتا ہے۔‘‘

      اگرچہ کسی بھی معاملے میں اعتدال قائم رکھنا دنیا کا مشکل ترین کام ہے مگر اللہ کے ان بندوں کی سیرت ایسی پختہ (mature) ہوتی ہے کہ انہیں اپنے اخراجات کے اندر اعتدال اور تواز ن قائم رکھنے میں مشکل پیش نہیں آتی۔

آیت ۳۹   وَمَآ اٰتَیْتُمْ مِّنْ رِّبًا لِّیَرْبُوَاْ فِیْٓ اَمْوَالِ النَّاسِ فَلَا یَرْبُوْا عِنْدَ اللّٰہِ: ’’اور جو کچھ تم دیتے ہو سود پر تا کہ بڑھتا رہے لوگوں کے مال میں تو اللہ کے ہاں اس میں کوئی بڑھوتری نہیں ہوتی۔‘‘

      اس آیت کا حوالہ سورۃ البقرۃ کی آیت ۲۷۵ کی تشریح کے ضمن میں بھی دیا گیا ہے۔ دراصل اپنے مستقبل کے لیے بچت کرنا انسان کی سرشت میں شامل ہے۔ پھر ہر شخص نہ صرف اپنی بچت کو سنبھال کر رکھنا چاہتا ہے بلکہ اس کی یہ بھی خواہش ہوتی ہے کہ اس کی بچائی ہوئی رقم وقت کے ساتھ ساتھ بڑھتی بھی رہے۔ قرآن اس بچت کو ’’العَفْو‘‘ یعنی قدرِ زائد (surplus value) قرار دے کر اسے انفاق فی سبیل اللہ کی مد میں اللہ کے بینک میں جمع کرانے کی ترغیب دیتا ہے : (وَیَسْئَلُوْنَکَ مَاذَا یُنْفِقُوْنَ  قُلِ الْعَفْوَ) (البقرۃ: ۲۱۹) ’’ اور (اے نبی!) یہ لوگ آپ سے پوچھتے ہیں کہ کیا خرچ کریں ؟آپ کہہ دیجیے کہ (وہ سب خرچ کر دو) جو ضرورت سے زائد ہے!‘‘

      انفاق فی سبیل اللہ کی مد میں ایسے مال سے محتاجوں اور ناداروں کی مدد بھی کی جا سکتی ہے اور اسے اللہ کے دین کی سربلندی کے لیے بھی کام میں لایا جا سکتا ہے۔ اس کا کم تر درجہ یہ بھی ہو سکتا ہے کہ قرضِ حسنہ کی شکل میں وقتی طور پر کسی ضرورت مند کی مدد کر دی جائے۔ بہر حال اللہ کا وعدہ ہے کہ اس کے راستے میں خرچ کیا ہوا مال اس کے ہاں محفوظ بھی رہے گا اور بڑھتا بھی رہے گا۔ یعنی آخرت میں اس کا اجر کئی گنا بڑھا کر دیا جائے گا۔

        وَمَآ اٰتَیْتُمْ مِّنْ زَکٰوۃٍ تُرِیْدُوْنَ وَجْہَ اللّٰہِ فَاُولٰٓئِکَ ہُمُ الْمُضْعِفُوْنَ: ’’اور جو تم زکوٰۃ دیتے ہو (اوراس سے) اللہ کی رضا چاہتے ہو، تو یہی لوگ ہیں جو (اللہ کے ہاں اپنے مال کو) بڑھانے والے ہیں ۔‘‘

      دنیا میں جو لوگ زکوٰۃ اور صدقات و خیرات کی صورت میں اللہ کے راستے میں خرچ کر رہے ہیں انہیں آخرت میں اس کا اجر دس گنا سے سات سو گنا تک بڑھا کر دیا جائے گا، بلکہ اللہ اگر چاہے گا تو اپنے فضل سے اسے اور بھی زیادہ بڑھا دے گا۔ ایسے لوگوں کو آخرت میں اجر موعود کے ساتھ ساتھ اللہ کی رضا بھی حاصل ہو گی۔

      اس آیت میں انفاق فی سبیل اللہ اور سود کا تقابل کر کے اس حقیقت کی طرف توجہ دلائی گئی ہے کہ انفاق فی سبیل اللہ کسی شخص کی بچت کا بہترین مصرف ہے۔ اس میں منافع (اجر وثواب) بہت زیادہ بھی ہے اور دائمی بھی۔ دوسری طرف سود پر رقم دینا کسی بچت کا بد ترین مصرف ہے، جس میں ایک شخص بغیر کوئی محنت کیے اور بغیر کوئی خطرہ مول لیے ایک طے شدہ رقم باقاعدگی سے حاصل کرتا رہتا ہے جبکہ اس کی اصل رقم بھی محفوظ رہتی ہے۔ اس کے بارے میں یہاں فرمایا گیا کہ سود کی شکل میں سرمائے میں بظاہر جو اضافہ ہوتا نظر آتا ہے اللہ کی نظر میں اس کی کوئی حقیقت نہیں ہے۔ صدقات اور سود کے تقابل کے حوالے سے دراصل یہاں دو متضاد ذہنیتوں کا تقابل بھی سامنے آتا ہے۔ ایک اس شخص کی ذہنیت ہے جو اپنے مال سے اللہ کی رضا کا متمنی ّہے جبکہ دوسرا شخص ا للہ کے احکام کی پروا کیے بغیر ہر قیمت پر اپنے سرمائے میں اضافہ چاہتا ہے۔

      یہاں ضمنی طور پر یہ بھی سمجھ لیں کہ ایک ایسا شخص جس کے پاس سرمایہ ہے مگر وہ خود محنت یا تجارت وغیرہ نہیں کر سکتا اوریہ بھی چاہتا ہے کہ اس کے سرمائے میں اضافہ ہوتا رہے اس کے لیے شریعت اسلامی میں مضاربت کا طریقہ ہے۔ اس کی صورت یہ ہے کہ ایک شخص اپنی رقم کسی دوسرے شخص کو کاروبار وغیرہ کے لیے دے اور اس سے منافع وغیرہ کی شرائط طے کر لے۔ اب اگر اس کاروبار میں منافع ہو گا تو سرمایہ فراہم کرنے والا شخص اس میں سے شرائط کے مطابق اپنے حصے کا حق دار ہو گا لیکن نقصان کی صورت میں تمام نقصان اسے خود ہی برداشت کرنا ہوگا۔ عامل (محنت کرنے والا) اس نقصان میں حصہ دار نہیں ہو گا۔ اس ضمن میں مزید تفصیل کے لیے فقہ کی کتب سے استفادہ کیا جاسکتا ہے۔ 

آيت 8: وَيُطْعِمُونَ الطَّعَامَ عَلَى حُبِّهِ مِسْكِينًا وَيَتِيمًا وَأَسِيرًا: «اور وه كھانا كھلاتے هيں الله كى محبت ميں مسكين كو، يتيم كو اور قيدى كو»۔

        عَلَى حُبِّهِ كا دوسرا مفهوم يه بھى هے كه وه مال كى محبت كے على الرغم (باوجود) كھانا كھلاتے هيں۔ يعنى ايك مفهوم تو يه هے كه وه لوگ الله كى محبت ميں بھوكوں كو كھانا كھلاتے هيں اور دوسرا يه كه اگرچه ان كے دلوں ميں بھى مال سے محبت كا جذبه هے اور ان كا جى بھى چاهتا هے كه وه اپنے مال كو سنبھال سنبھال كر ركھيں، ليكن اپنے ان جذبات كے باوجود وه محض الله كى رضا كے ليے مستحقين كو كھانا كھلانے ميں اپنا مال خرچ كرتے رهتے هيں۔ هم پڑھ چكے هيں كه حُبِ مال كا علاج هى انفاق فى سبيل الله هے اور الله كى راه ميں خرچ كرنے والوں كو قرآن مجيد ميں جگه جگه بشارتيں دى گئى هيں۔ ملاحظه هو سورة الحديد كى يه آيت: (إِنَّ الْمُصَّدِّقِينَ وَالْمُصَّدِّقَاتِ وَأَقْرَضُوا اللَّهَ قَرْضًا حَسَنًا يُضَاعَفُ لَهُمْ وَلَهُمْ أَجْرٌ كَرِيمٌ)

«يقيناً صدقه دينے والے مرد اور صدقه دينے والى عورتيں اور جو الله كو قرض حسنه ديں ان كو كئى گنا بڑھا كر ديا جائے گا اور ان كے ليے بڑا باعزت اجر هوگا۔»

آيت 9: إِنَّمَا نُطْعِمُكُمْ لِوَجْهِ اللَّهِ: «(اور كهتے هيں كه) هم تو آپ كو يه كھانا كھلارهے هيں صرف الله (كى رضا) كے ليے»

لا نُرِيدُ مِنكُمْ جَزَاء وَلا شُكُورًا: «هم آپ سے نه تو كوئى بدله چاهتے هيں اور نه هى شكريه»۔