آیت ۳۷:  وَکَذٰلِکَ اَنْزَلْنٰہُ حُکْمًا عَرَبِیًّا: «اور اسی طرح ہم نے اس کو اتارا ہے عربی میں قول فیصل بنا کر۔»

            «حکم» بمعنی «فیصلہ» یعنی یہ قرآنِ عربی قول ِفیصل بن کر آیا ہے۔ جیسا کہ سورۃ الطارق میں فرمایا: اِنَّہ لَقَوْلٌ فَصْلٌ وَّمَا ہُوَ بِالْہَزْلِ. «یہ کلام (حق کو باطل سے) جدا کرنے والا ہے اور کوئی بے ہودہ بات نہیں ہے۔»

             وَلَئِنِ اتَّبَعْتَ اَہْوَآءَہُمْ بَعْدَ مَا جَآءَکَ مِنَ الْعِلْمِِ  مَالَکَ مِنَ اللّٰہِ مِنْ وَّلِیٍّ وَّلاَ وَاقٍ: «اور (اے نبی!) اگر آپ نے ان کی خواہشات کی پیروی کی اس کے بعد کہ آپ کے پاس صحیح علم آچکا ہے تو نہیں ہو گا آپ کے لیے بھی اللہ کی طرف سے نہ کوئی حمایتی اور نہ کوئی بچانے والا۔»