آیت ۳۶:  وَالَّذِیْنَ اٰتَیْنٰـہُمُ الْکِتٰبَ یَفْرَحُوْنَ بِمَآ اُنْزِلَ اِلَیْکَ: «اور جن لوگوں کو ہم نے کتاب دی تھی وہ خوش ہور ہے ہیں اس (قرآن) سے جو (اے نبی !) آپ کی طرف نازل کیا گیا ہے»

            یہ مدینہ کے اہل کتاب میں سے نیک سرشت لوگوں کا ذکر ہے۔ اُن کو جب خبریں ملتی تھیں کہ مکہ میں آخری نبی  کا ظہور ہو چکا ہے تو وہ ان خبروں سے خوش ہوتے تھے۔

             وَمِنَ الْاَحْزَابِ مَنْ یُّنْکِرُ بَعْضَہ: «اور بعض گروہوں میں سے کچھ ایسے بھی ہیں جو اس کے بعض حصوں کا انکار کرتے ہیں۔»

             قُلْ اِنَّمَآاُمِرْتُ اَنْ اَعْبُدَ اللّٰہَ وَلَآ اُشْرِکَ بِہ اِلَیْہِ اَدْعُوْا وَاِلَیْہِ مَاٰبِ: «آپ کہیے کہ مجھے تو حکم ہوا ہے کہ میں اللہ کی بندگی کروں اور اس کے ساتھ شرک نہ کروں، اُسی کی طرف میں بلا رہا ہوں اور اسی کی طرف میرا لوٹنا ہے۔»