آیت ۴۰:  وَاِنْ مَّا نُرِیَنَّکَ بَعْضَ الَّذِیْ نَعِدُہُمْ اَوْ نَتَوَفَّیَنَّکَ: «اور خواہ ہم دکھا دیں آپ کو اس کا کچھ حصہ جس کی ہم ان کو دھمکی دے رہے ہیں، یا ہم آپ کو وفات دے دیں»

            یعنی یہ بھی ہو سکتا ہے کہ آپ کی زندگی ہی میں ان کو عذاب ِالٰہی میں سے کچھ حصہ مل جائے، اور یہ بھی ہو سکتاہے کہ آپ کی زندگی میں ان پر ایسا وقت نہ آئے، بلکہ عذاب کے ظہور میں آنے سے پہلے ہم آپ کو وفات دے دیں۔

             فَاِنَّمَا عَلَیْکَ الْبَلٰغُ وَعَلَیْنَا الْحِسَابُ: «پس آپ کے ذمہ تو پہنچانا ہی ہے اور ہمارے ذمہ حساب لینا ہے۔»

            آپ پر ہمارا پیغام پہنچانے کی ذمہ داری تھی، سو آپ نے یہ ذمہ داری احسن طریقہ سے ادا کر دی۔ اب اُن کو ہدایت دینا یا نہ دینا، اُن پر عذاب بھیجنا یا نہ بھیجنا اور ان کا حساب لینا، یہ سب کچھ ہمارے ذمے ہے اور ہم یہ فیصلے اپنی مشیت کے مطابق کریں گے۔