آیت ۳۹:   ذٰلِکَ مِمَّآ اَوْحٰٓی اِلَیْکَ رَبُّکَ مِنَ الْحِکْمَۃِ:   «یہ ہے جو  (اے محمد!)  آپ کے رب نے آپ کی طرف وحی کی ہے حکمت میں سے۔»

            یہ احکامِ نوع انسانی کے لیے خزینہ ٔحکمت ہیں۔  انسانی تہذیب و تمدن، ثقافت اور اجتماعیت کے ان اصولوں پر کاربند ہو کر انسان اسی دنیا میں اپنی اجتماعی زندگی کو جنت بنا سکتا ہے۔

              وَلاَ تَجْعَلْ مَعَ اللّٰہِ اِلٰہًا اٰخَرَ فَتُلْقٰی فِیْ جَہَنَّمَ مَلُوْمًا مَّدْحُوْرًا:   «اور مت ٹھہراؤ اللہ کے ساتھ کوئی دوسرا معبود، ورنہ تم جھونک دیے جاؤ گے جہنم میں ملامت زدہ، دھتکارے ہوئے۔»

            یہاں قابل غور نکتہ یہ ہے کہ ان احکام میں اول و آخر توحید کا حکم دیا گیا ہے۔  آغاز میں   وَقَضٰی رَبُّکَ اَلاَّ تَعْبُدُوْٓا اِلآَّ اِیَّاہ:   کے الفاظ آئے تھے، جبکہ آخر میں اسی مضمون کو:   وَلاَ تَجْعَلْ مَعَ اللّٰہِ اِلٰہًا اٰخَر:   کے الفاظ میں پھر دہرایا گیا ہے۔