آیت ۱۷:  فَمَنْ اَظْلَمُ مِمَّنِ افْتَرٰی عَلَی اللّٰہِ کَذِبًا اَوْ کَذَّبَ بِاٰیٰتِہ:  «تو اُس شخص سے بڑھ کر کون ظالم ہو گاجس نے اللہ کی طرف جھوٹ بات منسوب کی یا جھٹلایا اُس کی آیات کو!»

            یعنی یہ قرآن جو میں تم لوگوں کو سنا رہا ہوں، اگر یہ اللہ کی طرف سے نہیں ہے اور میں اسے اپنی طرف سے گھڑ کر پیش کر رہا ہوںتو مجھ سے بڑھ کر ظالم کوئی نہیں، اور اگر یہ واقعتا اللہ کی آیات ہیں تو تم لوگوں کو معلوم ہونا چاہیے کہ جو شخص اللہ کی آیات کو جھٹلا دے، اُس سے بڑھ کر ظالم اور گنہگار کوئی دوسرا نہیں ہو سکتا۔ اب اس معیارِ حقیقت کو سامنے رکھتے ہوئے تم میں سے ہر شخص کو چاہیے کہ وہ اپنی سوچ اور اپنے عمل کا جائزہ لے اور دیکھے کہ وہ کون سی روش اختیار کر رہا ہے۔

             اِنَّہ لاَ یُفْلِحُ الْمُجْرِمُوْنَ:  «یقینا مجرم لوگ فلاح نہیں پایا کرتے۔»