آیت ۱۹:  وَمَا کَانَ النَّاسُ اِلآَّ اُمَّۃً وَّاحِدَۃً فَاخْتَلَفُوْا:  «اور نہیں تھے لوگ مگر ایک ہی اُمت، پھر (بعد میں) انہوں نے اختلاف کیا۔»

            یہ مضمون سورۃ البقرۃ میں بھی گزر چکا ہے۔ حضرت آدم سے انسانوں کی نسل چلی ہے، چنانچہ جس طرح تمام انسان نسلاً ایک تھے اسی طرح نظریاتی طور پر بھی وہ سب ایک ہی اُمت تھے۔ بنی نوع ِانسان کے مابین تمام نظریاتی اختلافات بعد کی پیداوار ہیں۔

             وَلَوْلاَ کَلِمَۃٌ سَبَقَتْ مِنْ رَّبِّکَ:  «اور اگر ایک بات تیرے رب کی طرف سے پہلے سے طے نہ پا چکی ہوتی»

            اللہ تعالیٰ نے ہر فرد اور ہر قوم کے لیے ایک اجل مقرر فر ما دی ہے۔ اسی طرح پوری کائنات کی اجل بھی طے شدہ ہے۔ اگر یہ سب کچھ طے نہ ہو چکا ہوتا:

             لَقُضِیَ بَیْنَہُمْ فِیْمَا فِیْہِ یَخْتَلِفُوْنَ:  «تو فیصلہ کر دیا جاتاان کے مابین ان تمام چیزوں میں جن میں یہ اختلاف کر رہے ہیں۔»