آیت ۵۰:  قُلْ اَرَءَیْتُمْ اِنْ اَتٰکُمْ عَذَابُہ بَیَاتًا اَوْ نَہَارًا مَّاذَا یَسْتَعْجِلُ مِنْہُ الْمُجْرِمُوْنَ:  «(اے نبی ! ان سے ) کہیے کیا تم نے غور کیا کہ اگر تمہارے اوپر اللہ کا عذاب (ناگہاں) آ دھمکے رات کو یا دن کے وقت، تو وہ کیا شے ہے جس کے بل پر یہ مجرم جلدی مچا رہے ہیں؟»

            یعنی یہ جو تم سینہ تان کر کہتے ہو کہ لے آؤ عذاب! اورپھر کہتے ہو کہ آ کیوں نہیں جاتا ہم پر عذاب! اور پھر استہزائیہ انداز میں استفسار کرتے ہو کہ یہ عذاب کا وعدہ کب پورا ہونے جا رہا ہے؟ تو کبھی تم لوگوں نے اس پہلو پر بھی غور کیا ہے کہ اگر وہ عذاب کسی وقت اچانک تم پر آ ہی گیا، رات کی کسی گھڑی میں یا دن کے کسی لمحے میں، تو اس سے حفاظت کے لیے تم نے کیا بندوبست کر رکھا ہے؟ آخر تم لوگ کس بل بوتے پر عذاب کو للکار رہے ہو؟ کس چیز کے بھروسے پر تم اس طرح جسارتیں کر رہے ہو؟