آیت ۹۱:  وَاَوْفُوْا بِعَہْدِ اللّٰہِ اِذَا عٰـہَدْتُّم:  «اور اللہ کے عہد کو پورا کروجب کہ تم عہد کر چکے ہو»

            یہاں بنی اسرائیل کا وہ وعدہ مراد ہے جس کی تفصیل بعد میں مدنی سورتوں میں آئی۔ مدنی سورتوں میں اِن کے اس عہد کا بار بار ذکر کیا گیا ہے:  وَاِذْ اَخَذْنَا مِیْثَاقَکُمْ:  (البقرۃ: ۶۳)۔ یہاں پر اس عہد کی تفصیل میں جائے بغیر صرف اس کا تذکرہ کر دیا گیا کہ «عاقلاں را اشارہ کافی است»۔ مقصد یہ تھا کہ بنی اسرائیل کے صاحبانِ علم وبصیرت بات کو سمجھنا چاہیں تو سمجھ لیں۔

             وَلاَ تَنْقُضُوا الْاَیْمَانَ بَعْدَ تَوْکِیْدِہَا وَقَدْ جَعَلْتُمُ اللّٰہَ عَلَیْکُمْ کَفِیْلاً:  «اور اپنی قسموں کو مت توڑو مضبوطی سے باندھنے کے بعد، جبکہ تم اللہ کو اپنے اوپر گواہ ٹھہرا چکے ہو۔»

             اِنَّ اللّٰہَ یَعْلَمُ مَا تَفْعَلُوْنَ:  «یقینا اللہ جانتا ہے جو کچھ تم کر رہے ہو۔»

            یعنی یہ عہد تم نے اللہ کو گواہ بنا کر اور اللہ کی قسمیں کھا کر باندھا ہوا ہے۔