آیت ۵۱:  اَوْ خَلْقًا مِّمَّا یَکْبُرُ فِیْ صُدُوْرِکُمْ:   «یا ایسی مخلوق (بن جاؤ) جو تمہارے دلوں میں ان سے بھی سخت ہو۔»

            اے نبی! ان سے کہیے کہ آپ تو ہڈیوں کی بات کرتے ہو اور اپنے جسموں کے ریزہ ریزہ ہو کر ختم ہو جانے کا تصور لیے بیٹھے ہو۔  تم اگر پتھر اور لوہا بھی بن جاؤ یا اپنی سوچ کے مطابق اس سے بھی بڑھ کر کسی عجیب مخلوق کا روپ دھار لو، تب بھی تمہیں ازسرنو اٹھا لیا جائے گا۔

              فَسَیَقُوْلُوْنَ مَنْ یُّعِیْدُنَا:   «پھر کہیں گے کہ کون ہمیں دوبارہ لوٹائے گا؟»

              قُلِ الَّذِیْ فَطَرَکُمْ اَوَّلَ مَرَّۃٍ:   «آپ کہیے کہ وہی جس نے پہلی مرتبہ تمہیں پیدا کیا تھا۔»

              فَسَیُنْغِضُوْنَ اِلَیْکَ رُؤُوْسَہُمْ وَیَقُوْلُوْنَ مَتٰی ہُوَ:   «پھر وہ آپ کے سامنے اپنے سروں کو مٹکائیں گے اور کہیں گے کہ یہ کب ہو گا؟»

            لا جواب ہو کر اپنے سروں کو مٹکاتے ہوئے بولیں گے کہ چلو مان لیا کہ یہ سب کچھ ممکن ہے، مگر یہ تو بتائیے کہ ایسا ہو گا کب؟

              قُلْ عَسٰٓی اَنْ یَّکُوْنَ قَرِیْبًا:   «آپ کہیے کہ ہو سکتا ہے (اس کا وقت) قریب ہی ہو۔»

            عجب نہیں کہ تمہاری شامت کی وہ گھڑی آیا ہی چاہتی ہو، زیادہ دور نہ ہو۔