آیت ۲۶    وَاَنْزَلَ الَّذِیْنَ ظَاہَرُوْہُمْ مِّنْ اَہْلِ الْکِتٰبِ مِنْ صَیَاصِیْہِمْ: ’’اور اللہ نے اُتار لیا

اہل ِکتاب میں سے ان لوگوں کو جنہوں نے ان (مشرکین) کی مدد کی تھی، ان کے قلعوں سے‘‘

        بنو قریظہ کا جرم یہ تھا کہ انہوں نے مسلمانوں سے بد عہدی کر کے حملہ آور قبائل کے ساتھ گٹھ جوڑ کر لیا تھا۔ چنانچہ اللہ کی مشیت کے مطابق انہیں اپنے قلعوں اور گڑھیوں سے نکل کر مسلمانوں کے آگے ہتھیار ڈالنا پڑے۔

        وَقَذَفَ فِیْ قُلُوْبِہِمُ الرُّعْبَ: ’’اور ان کے دلوں میں اُس نے رعب ڈال دیا‘‘

        فَرِیْقًا تَقْتُلُوْنَ وَتَاْسِرُوْنَ فَرِیْقًا: ’’تو اب ان میں سے کچھ کو تم قتل کر رہے ہو اور کچھ کو تم قیدی بنا رہے ہو۔‘‘

        یعنی حضرت سعد بن معاذ کے فیصلے کے مطابق جنگ کے قابل مرد قتل کر دیے گئے، جبکہ بوڑھوں، عورتوں اور بچوں کو قیدی بنا لیا گیا۔