آیت  153:    یَسْأَلُکَ اَہْلُ الْکِتٰبِ اَنْ تُـنَـزِّلَ عَلَیْہِمْ کِتٰــبًا مِّنَ السَّمَآءِ: ’’(اے نبی ) اہل ِکتاب آپ سے یہ مطالبہ کر رہے ہیں کہ آپ ان پر ایک کتاب آسمان سے اتار لائیں‘‘

            یعنی جیسے تورات اُتری تھی‘ ویسے ہی تحریری شکل میں ایک کتاب آسمان سے اترنی چاہیے۔ آپ تو کہتے ہیں مجھ پر وحی آتی ہے‘ لیکن کہاں لکھی ہوئی ہے وہ وحی؟  کون لایا ہے؟ ہمیں تو پتا نہیں۔ موسٰی  کو تو اُن کی کتاب لکھی ہوئی ملی تھی اور وہ پتھر کی تختیوں کی صورت میں اسے لے کر آئے تھے۔  آپ پر بھی اسی طرح کی کتاب نازل ہو تو ہم مانیں۔

             فَقَدْ سَاَلُوْا مُوْسٰٓی اَکْبَرَ مِنْ ذٰلِکَ:  ’’(یہ تعجب کی بات نہیں) انہوں نے موسٰی  سے اس سے بھی بڑھ  کر مطالبے کیے تھے‘‘

             اے نبی  آپ فکر نہ کریں‘ ان کی پروا نہ کریں۔ انہوں نے‘ ان کے آباء و اَجداد نے حضرت موسی سے اس سے بھی بڑے بڑے مطالبات کیے تھے۔

             فَقَالُــوْْٓا اَرِنَا اللّٰہَ جَہْرَۃً: ’’انہوں نے تو (اُن سے یہ بھی) کہا تھا کہ ہمیں دکھاؤ اللہ کو علانیہ‘‘   َ

            کہ ہم خود اپنی آنکھوں سے اُسے دیکھنا چاہتے ہیں‘ جب دیکھیں گے تب مانیں گے۔

             فَاَخَذَتْہُمُ الصّٰعِقَۃُ بِظُلْمِہِمْ:  ’’تو ان کو آ پکڑا تھا کڑک نے ان کے اس گناہ کی پاداش میں۔‘‘

             ثُمَّ اتَّخَذُوا الْعِجْلَ مِنْ بَعْدِ مَا جَآء تْہُمُ الْبَـیِّنٰتُ: ’’ پھر انہوں نے بچھڑے کو معبود بنا لیا اس کے بعد کہ اُن کے پاس بہت واضح نشانیاں آ چکی تھیں‘‘

            ان لوگوں کی ناہنجاری کا اندازہ کریں کہ نو نو معجزے حضرت موسٰی کے ہاتھوں دیکھنے کے بعد بھی انہوں نے بچھڑے کی پرستش شروع  کر دی۔

             فَعَفَوْنَا عَنْ ذٰلِکَ وَاٰتَیْنَا مُوْسٰی سُلْطٰنًا مُّبِیْنًا: ’’تو ہم نے ان تمام چیزوں سے بھی در گزر کیا‘اور ہم نے موسیٰ کو عطا کیا بڑا واضح غلبہ۔‘‘

            فرعون اور اس کے لاؤ لشکر کو ان کی آنکھوں کے سامنے غرق کر دیا۔