آیت 78:    اَیْنَ مَا تَـکُوْنُوْا یُدْرِکْکُّمُ الْمَوْتُ: ’’تم جہاں کہیں بھی ہو گے موت تم کو پالے گی‘‘

            ظاہر ہے قتال سے جی چرانے کا اصل سبب موت کا خوف تھا۔ چنانچہ ان کے دلوں کے اندر جو خوف تھا اسے ظاہر کیا جا رہا ہے۔ ان پر واضح کیا جا رہا ہے کہ موت سے کوئی مفر نہیں‘ تم جہاں کہیں بھی ہو گے موت تمہیں پا لے گی۔

             وَلَـوْ کُنْتُمْ فِیْ بُرُوْجٍ مُّشَیَّدَۃٍ: ’’خواہ تم بڑے مضبوط قلعوں کے اندر ہی ہو۔‘‘

            اگرچہ تم بہت مضبوط (fortified) قلعوں کے اندر اپنے آپ کو محصور کر لو۔ پھر بھی موت سے نہیں بچ سکتے۔

             وَاِنْ تُصِبْـہُمْ حَسَنَۃٌ یَّــقُوْلُــوْا ہٰذِہِ مِنْ عِنْدِ اللّٰہِ: ’’اور اگر انہیں کوئی بھلائی پہنچتی ہے تو کہتے ہیں یہ اللہ کی طرف سے ہے۔‘‘

            منافقین کا ایک طرزِ عمل یہ بھی تھا کہ اگر مسلمانوں کو کوئی کامیابی حاصل ہو جاتی‘ فتح نصیب ہو جاتی‘ کوئی اور بھلائی پہنچ جاتی‘ حضور  کی تدبیر کے اچھے نتائج نکل آتے تو اسے حضور  کی طرف منسوب نہیں کرتے تھے‘ بلکہ کہتے تھے کہ یہ اللہ کا فضل و کرم ہوا ہے‘ یہ سب اللہ کی طرف سے ہے۔

             وَاِنْ تُصِبْہُمْ سَیِّئۃٌ یَّــقُوْلُوْا ہٰذِہ مِنْ عِنْدِکَ: ’’اور اگر انہیں کوئی تکلیف پہنچ جائے تو کہتے ہیں کہ (اے محمد) یہ آپ کی وجہ سے ہے۔‘‘

            آپ نے یہ غلط اقدام کیا تو اس کے نتیجے میں ہم پر یہ مصیبت آ گئی۔ یہ آپ کا فیصلہ تھا کہ کھلے میدان میں جا کر جنگ کریں گے‘ ہم نے تو آپ کو مشورہ دیا تھا کہ مدینے کے اندر محصور ہو کر جنگ کریں۔

             قُلْ کُلٌّ مِّنْ عِنْدِ اللّٰہِ: ’’کہہ دیجیے سب کچھ اللہ ہی کی طرف سے ہے۔‘‘

            یہ سب چیزیں‘ خیر ہو‘ شر ہو‘ تکلیف ہو‘ آسانی ہو‘ مشکل ہو‘ جو بھی صورتیں ہیں سب اللہ کی طرف سے ہیں۔

             فَمَا لِہٰٓــؤُلَآء الْقَوْمِ لاَ یَکَادُوْنَ یَفْقَہُوْنَ حَدِیْثًا: ’’تو ان لوگوں کو کیا ہو گیا ہے کہ یہ کوئی بات بھی نہیں سمجھتے!‘‘