آیت 19:   یٰٓــاَہْلَ الْکِتٰبِ قَدْ جَآء کُمْ رَسُوْلُــنَا:   ،،اے اہل ِکتاب! تمہارے پاس آ چکا ہے ہمارا رسول،،

             یُــبَــیِّنُ لَــکُمْ عَلٰی فَتْرَۃٍ مِّنَ الرُّسُلِ:   ،،جو تمہارے لیے (دین کو)  واضح کر رہا ہے رسولوں  کے ایک وقفے کے بعد،،

             حضرت عیسیٰ  اور محمد رسول اللہ کے درمیان چھ سو برس ایسے گزرے ہیں  کہ اس دوران دنیا میں  کوئی نبی،  کوئی رسول نہیں  رہا۔  اس وقفے کو اصطلاح میں «فترت» کہا جاتا ہے۔   پھر حضور  کی بعثت ہوئی اور پھراس کے بعد تاقیام ِقیامت رسالت کا دروازہ بند ہو گیا۔  

             اَنْ تَقُوْلُوْا مَا جَآء نَا مِنْ بَشِیْرٍ وَّلاَ نَذِیْرٍ:  ،،مبادا تم کہو کہ ہمارے پاس تو آیا ہی نہیں  تھا کوئی بشارت دینے والا اور نہ کوئی خبردار کرنے والا،،

             فَقَدْ جَآء کُمْ بَشِیْـرٌ وَّنَذِیْــرٌ:   ،،تو (سن لو!)  آ گیا ہے تمہارے پاس  بشارت دینے والا اور خبردار کرنے والا۔ ،،

             وَاللّٰہُ عَلٰی کُلِّ شَیْئٍ قَدِیْرٌ:  ،،اور اللہ ہر چیز پر قادر ہے۔ ،،

            سورۃ النساء میں  یہی بات اس انداز سے بیان ہو چکی ہے:  رُسُلاً مُّـبَشِّرِیْنَ وَمُنْذِرِیْنَ لِئَلاَّ یَکُوْنَ لِلنَّاسِ عَلَی اللّٰہِ حُجَّۃٌ بَعْدَ الرُّسُلِ وَکَانَ اللّٰہُ عَزِیْزًا حَکِیْمًا..