آیت 135:  قُلْ یٰقَوْمِ اعْمَلُوْا عَلٰی مَکَانَتِکُمْ اِنِّیْ عَامِلٌ:  ’’کہہ دیجیے اے میری قوم کے لوگو! کر لو جو کچھ کر سکتے ہو اپنی جگہ پر، میں بھی کر رہا ہوں (جو مجھے کرنا ہے)۔،،

            یہ گویا چیلنج کرنے کا سا انداز ہے کہ مجھے تم لوگوں کو دعوت دیتے ہوئے بارہ برس ہو گئے ہیں۔ تم نے اس دعوت کے خلاف ایڑی چوٹی کا زور لگایا ہے، ہر ہر طرح سے مجھے ستایا ہے، تین سال تک شعب بنی ہاشم میں محصور رکھا ہے، میرے ساتھیوں پر تم لوگوں نے تشدد کا ہر ممکن حربہ آزمایا ہے۔ غرض تم میرے خلاف جو کچھ کر سکتے تھے کرتے رہے ہو، ابھی مزید بھی جو کچھ تم کر سکتے ہو کر لو، جو میرا فرض منصبی ہے وہ میں ادا کر رہا ہوں ۔

            فَسَوْفَ تَعْلَمُوْنَ مَنْ تَکُوْنُ لَہ عَاقِبَۃُ الدّارِ اِنَّہ لاَ یُفْلِحُ الظّٰلِمُوْنَ:  ’’تو عنقریب تمہیں معلوم ہو جائے گا کہ کس کے لیے ہے عاقبت کا گھر۔ یقینا ظالم کبھی فلاح نہیں پائیں گے۔،،

            عاقبت کی دائمی کامیابی کس کے لیے ہے؟ کس کے لیے وہاں جنت ہے، رَوح و ریحان ہے اور کس کے لیے دوزخ کا عذاب ہے؟ یہ عنقریب تم لوگوں کو معلوم ہو جائے گا۔