آیت 30:  وَاِذْ یَمْکُرُ بِکَ الَّذِیْنَ کَفَرُوْا: ’’اور یاد کیجیے جب کفار آپ کے خلاف سازشیں کر رہے تھے‘‘

             لِیُثْبِتُوْکَ اَوْ یَقْتُلُوْکَ اَوْ یُخْرِجُوْکَ: ’’کہ آپ کو قید کر دیں یا قتل کر دیں یا (مکہ سے) نکال دیں۔‘‘

            یہ ان سازشوں کا ذکر ہے جو قریش مکہ ہجرت سے پہلے کے زمانے میں رسول اللہ کے خلاف کر رہے تھے۔ آپ کی مخالفت میں اُن کے باقی تمام حربے ناکام ہو گئے تو وہ (نعوذ باللہ) آپ کے قتل کے درپے ہو گئے اور اس بارے میں سنجیدگی سے صلاح مشورے کرنے لگے۔

             وَیَمْکُرُوْنَ وَیَمْکُرُ اللّٰہُ وَاللّٰہُ خَیْرُ الْمٰکِرِیْنَ: ’’وہ بھی چالیں چل رہے تھے اور اللہ بھی منصوبہ بندی کر رہا تھا۔ اللہ بہترین منصوبہ بندی کرنے والا ہے۔‘‘