آیت ۱۲:   وَجَعَلْنَا الَّیْلَ وَالنَّہَارَ اٰیَتَیْنِ فَمَحَوْنَآ اٰیَۃَ الَّیْلِ وَجَعَلْنَآ اٰیَۃَ النَّہَارِ مُبْصِرَۃً لِّتَبْتَغُوْا فَضْلاً مِّنْ رَّبِّکُمْ:   «اور ہم نے بنایا رات اور دن کو دو نشانیاں، تو تاریک کر دیا ہم نے رات کی نشانی کو اور روشن بنا دیا ہم نے دن کی نشانی کو، تا کہ تم تلاش کرو اپنے رب کا فضل»

            دن کو روشن بنایا تا کہ اس کی روشنی میں تم لوگ آسانی سے کسب معاش کے لیے دوڑ دھوپ کرسکو۔

              وَلِتَعْلَمُوْا عَدَدَ السِّنِیْنَ وَالْحِسَابَ وَکُلَّ شَیْئٍ فَصَّلْنٰہُ تَفْصِیْلاً :   «اور تاکہ تم جان لو سالوں کی گنتی اور (نظام الاوقات کا) حساب، اور ہر چیز کو ہم نے کھول کھول کر بیان کر دیا ہے۔»

            یہ دن اور رات کا الٹ پھیر ہی ہے جو نظام الاوقات کا بنیادی ڈھانچہ فراہم کرتا ہے اور دنوں سے ہفتے، مہینے اور پھر سال بنتے ہیں۔